શ્રીમદ્વાલ્મીકીય રામાયણે બાલકાંડમ્ ।
અથ ત્રયોવિંશસ્સર્ગઃ ।
પ્રભાતાયાં તુ શર્વર્યાં વિશ્વામિત્રો મહામુનિઃ ।
અભ્યભાષત કાકુત્સ્થૌ શયાનૌ પર્ણસંસ્તરે ॥ 1 ॥
કૌસલ્યા સુપ્રજા રામ પૂર્વા સંધ્યા પ્રવર્તતે ।
ઉત્તિષ્ઠ નરશાર્દૂલ કર્તવ્યં દૈવમાહ્નિકમ્ ॥ 2 ॥
તસ્યર્ષેઃ પરમોદારં વચશ્શ્રુત્વા નૃપાત્મજૌ ।
સ્નાત્વા કૃતોદકૌ વીરૌ જેપતુઃ પરમં જપમ્ ॥ 3 ॥
કૃતાહ્નિકૌ મહાવીર્યૌ વિશ્વામિત્રં તપોધનમ્ ।
અભિવાદ્યાભિસંહૃષ્ટૌ ગમનાયાભિતસ્થતુઃ ॥ 4 ॥
તૌ પ્રયાતૌ મહાવીર્યૌ દિવ્યાં ત્રિપથગાં નદીમ્ ।
દદૃશાતે તતસ્તત્ર સરય્વાસ્સંગમે શુભે ॥ 5 ॥
તત્રાશ્રમપદં પુણ્યમૃષીણામગ્ય્રતેજસામ્ ।
બહુવર્ષસહસ્રાણિ તપ્યતાં પરમં તપઃ ॥ 6 ॥
તં દૃષ્ટ્વા પરમપ્રીતૌ રાઘવૌ પુણ્યમાશ્રમમ્ ।
ઊચતુસ્તં મહાત્માનં વિશ્વામિત્રમિદં વચઃ ॥ 7 ॥
કસ્યાયમાશ્રમઃ પુણ્યઃ કોન્વસ્મિન્વસતે પુમાન્ ।
ભગવન્ શ્રોતુમિચ્છાવઃ પરં કૌતૂહલં હિ નૌ ॥ 8 ॥
તયોસ્તદ્વચનં શ્રુત્વા પ્રહસ્ય મુનિપુંગવઃ ।
અબ્રવીચ્છ્રૂયતાં રામ યસ્યાયં પૂર્વ આશ્રમઃ ॥ 9 ॥
કંદર્પો મૂર્તિમાનાસીત્કામ ઇત્યુચ્યતે બુધૈઃ ।
તપસ્યંતમિહ સ્થાણું નિયમેન સમાહિતમ્ ॥ 10 ॥
કૃતોદ્વાહં તુ દેવેશં ગચ્છંતં સમરુદ્ગગણમ્ ।
ધર્ષયામાસ દુર્મેધા હુંકૃતશ્ચ મહાત્મના ॥ 11 ॥
અવદગ્ધસ્ય રૌદ્રેણ ચક્ષુષા રઘુનંદન ।
વ્યશીર્યંત શરીરાત્સ્વાત્સર્વગાત્રાણિ દુર્મતેઃ ॥ 12 ॥
તસ્ય ગાત્રં હતં તત્ર નિર્દગ્થસ્ય મહાત્મના ।
અશરીરઃ કૃતઃ કામઃ ક્રોધાદ્દેવેશ્વરેણ હિ ॥ 13 ॥
અનંગ ઇતિ વિખ્યાતસ્તદાપ્રભૃતિ રાઘવ ।
સ ચાંગવિષયશ્શ્રીમાન્યત્રાંગં પ્રમુમોચ હ ॥ 14 ॥
તસ્યાયમાશ્રમઃ પુણ્યસ્તસ્યેમે મુનયઃ પુરા ।
શિષ્યા ધર્મપરા નિત્યં તેષાં પાપં ન વિદ્યતે ॥ 15 ॥
ઇહાદ્ય રજનીં રામ વસેમ શુભદર્શન ।
પુણ્યયોસ્સરિતોર્મધ્યે શ્વસ્તરિષ્યામહે વયમ્ ॥ 16 ॥
અભિગચ્છામહે સર્વે શુચયઃ પુણ્યમાશ્રમમ્ ।
સ્નાતાશ્ચ કૃતજપ્યાશ્ચ હુતહવ્યા નરોત્તમ ॥ 17 ॥
તેષાં સંવદતાં તત્ર તપોદીર્ઘેણ ચક્ષુષા ।
વિજ્ઞાય પરમપ્રીતા મુનયો હર્ષમાગમન્ ॥ 18 ॥
અર્ઘ્યં પાદ્યં તથાઽતિથ્યં નિવેદ્ય કુશિકાત્મજે ।
રામલક્ષ્મણયોઃ પશ્ચાદકુર્વન્નતિથિક્રિયામ્ ॥ 19 ॥
સત્કારં સમનુપ્રાપ્ય કથાભિરભિરંજયન્ ।
યથાર્હમજપન્ સંધ્યામૃષયસ્તે સમાહિતાઃ ॥ 20 ॥
તત્ર વાસિભિરાનીતા મુનિભિસ્સુવ્રતૈઃ સહ ।
ન્યવસન્ સુસુખં તત્ર કામાશ્રમપદે તદા ॥ 21 ॥
કથાભિરભિરામાભિરભિરામૌ નૃપાત્મજૌ ।
રમયામાસ ધર્માત્મા કૌશિકો મુનિપુંગવઃ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ત્રયોવિંશસ્સર્ગઃ ॥
