శ్రీమద్వాల్మీకీయ రామాయణే బాలకాణ్డమ్ ।
అథ చతుశ్చత్వారింశస్సర్గః ।
స గత్వా సాగరం రాజా గఙ్గయాఽనుగతస్తదా ।
ప్రవివేశ తలం భూమేర్యత్ర తే భస్మసాత్కృతాః ॥ 1 ॥
భస్మన్యథాఽప్లుతే రామ గఙ్గాయాస్సలిలేన వై ।
సర్వలోకప్రభుర్బ్రహ్మా రాజానమిదమబ్రవీత్ ॥ 2 ॥
తారితా నరశార్దూల దివం యాతాశ్చ దేవవత్ ।
షష్ఠిః పుత్రసహస్రాణి సగరస్య మహాత్మనః ॥ 3 ॥
సాగరస్య జలం లోకే యావత్స్థాస్యతి పార్థివ ।
సగరస్యాత్మజాస్తావత్స్వర్గే స్థాస్యన్తి దేవవత్ ॥ 4 ॥
ఇయం చ దుహితా జ్యేష్ఠా తవ గఙ్గా భవిష్యతి ।
త్వత్కృతేన చ నామ్నాఽథ లోకే స్థాస్యతి విశ్రుతా ॥ 5 ॥
గఙ్గా త్రిపథగా రాజన్ దివ్యా భాగీరథీతి చ ।
త్రీన్ పథో భావయన్తీతి తతస్త్రిపథగా స్మృతా ॥ 6 ॥
పితామహానాం సర్వేషాం త్వమత్ర మనుజాధిప ।
కురుష్వ సలిలం రాజన్ ప్రతిజ్ఞామపవర్జయ ॥ 7 ॥
పూర్వకేణ హి తే రాజంస్తేనాతియశసా తదా ।
ధర్మిణాం ప్రవరేణాపి నైష ప్రాప్తో మనోరథః ॥ 8 ॥
తథైవాంశుమతా తాత లోకేఽప్రతిమతేజసా ।
గఙ్గాం ప్రార్థయతానేతుం ప్రతిజ్ఞా నాపవర్జితా ॥ 9 ॥
రాజర్షిణా గుణవతా మహర్షిసమతేజసా ।
మత్తుల్యతపసా చైవ క్షత్రధర్మస్థితేన చ ॥ 10 ॥
దిలీపేన మహాభాగ తవ పిత్రాఽతి తేజసా ।
పునర్న శఙ్కితాఽనేతుం గఙ్గాం ప్రార్థయతాఽనఘ ॥ 11 ॥
సా త్వయా సమనుక్రాన్తా ప్రతిజ్ఞా పురుషర్షభ ।
ప్రాప్తోఽసి పరమం లోకే యశః పరమసమ్మతమ్ ॥ 12 ॥
యచ్చ గఙ్గావతరణం త్వయా కృతమరిన్దమ ।
అనేన చ భవాన్ ప్రాప్తో ధర్మస్యాయతనం మహత్ ॥ 13 ॥
ప్లావయస్వ త్వమాత్మానం నరోత్తమ సదోచితే ।
సలిలే పురుషవ్యాఘ్ర శుచిః పుణ్యఫలో భవ ॥ 14 ॥
పితామహానాం సర్వేషాం కురుష్వ సలిలక్రియామ్ ।
స్వస్తి తేఽస్తు గమిష్యామి స్వం లోకం గమ్యతాం నృప ॥ 15 ॥
ఇత్యేవముక్త్వా దేవేశః సర్వలోకపితామహః ।
యథాఽఽగతం తథాఽగచ్ఛత్ దేవలోకం మహాయశాః ॥ 16 ॥
భగీరథోఽపి రాజర్షిః కృత్వా సలిలముత్తమమ్ ।
యథాక్రమం యథాన్యాయం సాగరాణాం మహాయశాః ॥ 17 ॥
కృతోదకశ్శుచీ రాజా స్వపురం ప్రవివేశ హ ।
సమృద్ధార్థో రఘుశ్రేష్ఠ స్వరాజ్యం ప్రశశాస హ ॥ 18 ॥
ప్రముమోద హ లోకస్తం నృపమాసాద్య రాఘవ ।
నష్టశోకస్సమృద్ధార్థో బభూవ విగతజ్వరః ॥ 19 ॥
ఏష తే రామ గఙ్గాయా విస్తరోఽభిహితో మయా ।
స్వస్తి ప్రాప్నుహి భద్రం తే సన్ధ్యాకాలోఽతివర్తతే ॥ 20 ॥
ధన్యం యశస్యమాయుష్యం పుత్ర్యం స్వర్గ్యమతీవ చ ।
యశ్శ్రావయతి విప్రేషు క్షత్రియేష్వితరేషు చ ॥ 21 ॥
ప్రీయన్తే పితరస్తస్య ప్రీయన్తే దైవతాని చ ।
ఇదమాఖ్యానమవ్యగ్రో గఙ్గావతరణం శుభమ్ ॥ 22 ॥
యశ్శృణోతి చ కాకుత్స్థ సర్వాన్ కామానవాప్నుయాత్ ।
సర్వే పాపాః ప్రణశ్యన్తి ఆయుః కీర్తిశ్చ వర్ధతే ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే చతుశ్చత్వారింశస్సర్గః ॥
