ശ്രീമദ്വാല്മീകീയ രാമായണേ ബാലകാംഡമ് ।
അഥ ത്രയോവിംശസ്സര്ഗഃ ।
പ്രഭാതായാം തു ശർവര്യാം വിശ്വാമിത്രോ മഹാമുനിഃ ।
അഭ്യഭാഷത കാകുത്സ്ഥൌ ശയാനൌ പര്ണസംസ്തരേ ॥ 1 ॥
കൌസല്യാ സുപ്രജാ രാമ പൂർവാ സംധ്യാ പ്രവര്തതേ ।
ഉത്തിഷ്ഠ നരശാര്ദൂല കര്തവ്യം ദൈവമാഹ്നികമ് ॥ 2 ॥
തസ്യര്ഷേഃ പരമോദാരം വചശ്ശ്രുത്വാ നൃപാത്മജൌ ।
സ്നാത്വാ കൃതോദകൌ വീരൌ ജേപതുഃ പരമം ജപമ് ॥ 3 ॥
കൃതാഹ്നികൌ മഹാവീര്യൌ വിശ്വാമിത്രം തപോധനമ് ।
അഭിവാദ്യാഭിസംഹൃഷ്ടൌ ഗമനായാഭിതസ്ഥതുഃ ॥ 4 ॥
തൌ പ്രയാതൌ മഹാവീര്യൌ ദിവ്യാം ത്രിപഥഗാം നദീമ് ।
ദദൃശാതേ തതസ്തത്ര സരയ്വാസ്സംഗമേ ശുഭേ ॥ 5 ॥
തത്രാശ്രമപദം പുണ്യമൃഷീണാമഗ്യ്രതേജസാമ് ।
ബഹുവര്ഷസഹസ്രാണി തപ്യതാം പരമം തപഃ ॥ 6 ॥
തം ദൃഷ്ട്വാ പരമപ്രീതൌ രാഘവൌ പുണ്യമാശ്രമമ് ।
ഊചതുസ്തം മഹാത്മാനം വിശ്വാമിത്രമിദം വചഃ ॥ 7 ॥
കസ്യായമാശ്രമഃ പുണ്യഃ കോന്വസ്മിന്വസതേ പുമാന് ।
ഭഗവന് ശ്രോതുമിച്ഛാവഃ പരം കൌതൂഹലം ഹി നൌ ॥ 8 ॥
തയോസ്തദ്വചനം ശ്രുത്വാ പ്രഹസ്യ മുനിപുംഗവഃ ।
അബ്രവീച്ഛ്രൂയതാം രാമ യസ്യായം പൂർവ ആശ്രമഃ ॥ 9 ॥
കംദര്പോ മൂര്തിമാനാസീത്കാമ ഇത്യുച്യതേ ബുധൈഃ ।
തപസ്യംതമിഹ സ്ഥാണും നിയമേന സമാഹിതമ് ॥ 10 ॥
കൃതോദ്വാഹം തു ദേവേശം ഗച്ഛംതം സമരുദ്ഗഗണമ് ।
ധര്ഷയാമാസ ദുര്മേധാ ഹുംകൃതശ്ച മഹാത്മനാ ॥ 11 ॥
അവദഗ്ധസ്യ രൌദ്രേണ ചക്ഷുഷാ രഘുനംദന ।
വ്യശീര്യംത ശരീരാത്സ്വാത്സർവഗാത്രാണി ദുര്മതേഃ ॥ 12 ॥
തസ്യ ഗാത്രം ഹതം തത്ര നിര്ദഗ്ഥസ്യ മഹാത്മനാ ।
അശരീരഃ കൃതഃ കാമഃ ക്രോധാദ്ദേവേശ്വരേണ ഹി ॥ 13 ॥
അനംഗ ഇതി വിഖ്യാതസ്തദാപ്രഭൃതി രാഘവ ।
സ ചാംഗവിഷയശ്ശ്രീമാന്യത്രാംഗം പ്രമുമോച ഹ ॥ 14 ॥
തസ്യായമാശ്രമഃ പുണ്യസ്തസ്യേമേ മുനയഃ പുരാ ।
ശിഷ്യാ ധര്മപരാ നിത്യം തേഷാം പാപം ന വിദ്യതേ ॥ 15 ॥
ഇഹാദ്യ രജനീം രാമ വസേമ ശുഭദര്ശന ।
പുണ്യയോസ്സരിതോര്മധ്യേ ശ്വസ്തരിഷ്യാമഹേ വയമ് ॥ 16 ॥
അഭിഗച്ഛാമഹേ സർവേ ശുചയഃ പുണ്യമാശ്രമമ് ।
സ്നാതാശ്ച കൃതജപ്യാശ്ച ഹുതഹവ്യാ നരോത്തമ ॥ 17 ॥
തേഷാം സംവദതാം തത്ര തപോദീര്ഘേണ ചക്ഷുഷാ ।
വിജ്ഞായ പരമപ്രീതാ മുനയോ ഹര്ഷമാഗമന് ॥ 18 ॥
അര്ഘ്യം പാദ്യം തഥാഽതിഥ്യം നിവേദ്യ കുശികാത്മജേ ।
രാമലക്ഷ്മണയോഃ പശ്ചാദകുർവന്നതിഥിക്രിയാമ് ॥ 19 ॥
സത്കാരം സമനുപ്രാപ്യ കഥാഭിരഭിരംജയന് ।
യഥാര്ഹമജപന് സംധ്യാമൃഷയസ്തേ സമാഹിതാഃ ॥ 20 ॥
തത്ര വാസിഭിരാനീതാ മുനിഭിസ്സുവ്രതൈഃ സഹ ।
ന്യവസന് സുസുഖം തത്ര കാമാശ്രമപദേ തദാ ॥ 21 ॥
കഥാഭിരഭിരാമാഭിരഭിരാമൌ നൃപാത്മജൌ ।
രമയാമാസ ധര്മാത്മാ കൌശികോ മുനിപുംഗവഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ത്രയോവിംശസ്സര്ഗഃ ॥
