śrīmadvālmīkīya rāmāyaṇē bālakāṇḍam ।
atha trayōviṃśassargaḥ ।
prabhātāyāṃ tu śarvaryāṃ viśvāmitrō mahāmuniḥ ।
abhyabhāṣata kākutsthau śayānau parṇasaṃstarē ॥ 1 ॥
kausalyā suprajā rāma pūrvā sandhyā pravartatē ।
uttiṣṭha naraśārdūla kartavyaṃ daivamāhnikam ॥ 2 ॥
tasyarṣēḥ paramōdāraṃ vachaśśrutvā nṛpātmajau ।
snātvā kṛtōdakau vīrau jēpatuḥ paramaṃ japam ॥ 3 ॥
kṛtāhnikau mahāvīryau viśvāmitraṃ tapōdhanam ।
abhivādyābhisaṃhṛṣṭau gamanāyābhitasthatuḥ ॥ 4 ॥
tau prayātau mahāvīryau divyāṃ tripathagāṃ nadīm ।
dadṛśātē tatastatra sarayvāssaṅgamē śubhē ॥ 5 ॥
tatrāśramapadaṃ puṇyamṛṣīṇāmagyratējasām ।
bahuvarṣasahasrāṇi tapyatāṃ paramaṃ tapaḥ ॥ 6 ॥
taṃ dṛṣṭvā paramaprītau rāghavau puṇyamāśramam ।
ūchatustaṃ mahātmānaṃ viśvāmitramidaṃ vachaḥ ॥ 7 ॥
kasyāyamāśramaḥ puṇyaḥ kōnvasminvasatē pumān ।
bhagavan śrōtumichChāvaḥ paraṃ kautūhalaṃ hi nau ॥ 8 ॥
tayōstadvachanaṃ śrutvā prahasya munipuṅgavaḥ ।
abravīchChrūyatāṃ rāma yasyāyaṃ pūrva āśramaḥ ॥ 9 ॥
kandarpō mūrtimānāsītkāma ityuchyatē budhaiḥ ।
tapasyantamiha sthāṇuṃ niyamēna samāhitam ॥ 10 ॥
kṛtōdvāhaṃ tu dēvēśaṃ gachChantaṃ samarudgagaṇam ।
dharṣayāmāsa durmēdhā huṅkṛtaścha mahātmanā ॥ 11 ॥
avadagdhasya raudrēṇa chakṣuṣā raghunandana ।
vyaśīryanta śarīrātsvātsarvagātrāṇi durmatēḥ ॥ 12 ॥
tasya gātraṃ hataṃ tatra nirdagthasya mahātmanā ।
aśarīraḥ kṛtaḥ kāmaḥ krōdhāddēvēśvarēṇa hi ॥ 13 ॥
anaṅga iti vikhyātastadāprabhṛti rāghava ।
sa chāṅgaviṣayaśśrīmānyatrāṅgaṃ pramumōcha ha ॥ 14 ॥
tasyāyamāśramaḥ puṇyastasyēmē munayaḥ purā ।
śiṣyā dharmaparā nityaṃ tēṣāṃ pāpaṃ na vidyatē ॥ 15 ॥
ihādya rajanīṃ rāma vasēma śubhadarśana ।
puṇyayōssaritōrmadhyē śvastariṣyāmahē vayam ॥ 16 ॥
abhigachChāmahē sarvē śuchayaḥ puṇyamāśramam ।
snātāścha kṛtajapyāścha hutahavyā narōttama ॥ 17 ॥
tēṣāṃ saṃvadatāṃ tatra tapōdīrghēṇa chakṣuṣā ।
vijñāya paramaprītā munayō harṣamāgaman ॥ 18 ॥
arghyaṃ pādyaṃ tathā'tithyaṃ nivēdya kuśikātmajē ।
rāmalakṣmaṇayōḥ paśchādakurvannatithikriyām ॥ 19 ॥
satkāraṃ samanuprāpya kathābhirabhirañjayan ।
yathārhamajapan sandhyāmṛṣayastē samāhitāḥ ॥ 20 ॥
tatra vāsibhirānītā munibhissuvrataiḥ saha ।
nyavasan susukhaṃ tatra kāmāśramapadē tadā ॥ 21 ॥
kathābhirabhirāmābhirabhirāmau nṛpātmajau ।
ramayāmāsa dharmātmā kauśikō munipuṅgavaḥ ॥ 22 ॥
ityārṣē śrīmadrāmāyaṇē vālmīkīya ādikāvyē bālakāṇḍē trayōviṃśassargaḥ ॥
