శ్రీమద్వాల్మీకీయ రామాయణే బాలకాణ్డమ్ ।
అథ సప్తపఞ్చాశస్సర్గః ।
తతస్సన్తప్తహృదయః స్మరన్నిగ్రహమాత్మనః ।
వినిశ్శ్వస్య వినిశ్శ్వస్య కృతవైరో మహత్మనా ॥ 1 ॥
స దక్షిణాం దిశం గత్వా మహిష్యా సహ రాఘవ ।
తతాప పరమం ఘోరం విశ్వామిత్రో మహత్తపః ॥ 2 ॥
ఫలమూలాశనో దాన్తశ్చకార సుమహత్తపః ।
అథాస్య జజ్ఞిరే పుత్రాస్సత్యధర్మపరాయణాః ।
హవిష్యన్దో మధుష్యన్దో దృఢనేత్రో మహారథః ॥ 3 ॥
పూర్ణే వర్షసహస్రే తు బ్రహ్మా లోకపితామహః ।
అబ్రవీన్మధురం వాక్యం విశ్వామిత్రం తపోధనమ్ ॥ 4 ॥
చితా రాజర్షిలోకాస్తే తపసా కుశికాత్మజ ।
అనేన తపసా త్వాం తు రాజర్షిరితి విద్మహే ॥ 5 ॥
ఏవముక్త్వా మహాతేజా జగామ సహ దైవతైః ।
త్రివిష్టపం బ్రహ్మలోకం లోకానాం పరమేశ్వరః ॥ 6 ॥
విశ్వామిత్రోఽపి తచ్ఛ్రుత్వా హ్రియా కిఞ్చిదవాఙ్ముఖః ।
దుఃఖేన మహతాఽఽవిష్టస్సమన్యురిదమబ్రవీత్ ॥ 7 ॥
తపశ్చ సుమహత్తప్తం రాజర్షిరితి మాం విదుః ।
దేవాస్సర్షిగణాస్సర్వే నాస్తి మన్యే తపఃఫలమ్ ॥ 8 ॥
ఇతి నిశ్చిత్య మనసా భూయ ఏవ మహాతపాః ।
తపశ్చకార కాకుత్స్థ పరమం పరమాత్మవాన్ ॥ 9 ॥
ఏతస్మిన్నేవ కాలే తు సత్యవాదీ జితేన్ద్రియః ।
త్రిశఙ్కురితి విఖ్యాత ఇక్ష్వాకుకులవర్ధనః ॥ 10 ॥
తస్య బుద్ధిస్సముత్పన్నా యజేయమితి రాఘవ ।
గచ్ఛేయం స్వశరీరేణ దేవానాం పరమాం గతిమ్ ॥ 11 ॥
స వసిష్ఠం సమాహూయ కథయామాస చిన్తితమ్ ।
అశక్యమితి చాప్యుక్తో వసిష్ఠేన మహాత్మనా ॥ 12 ॥
ప్రత్యాఖ్యాతో వసిష్ఠేన స యయౌదక్షిణాం దిశమ్ ।
తతస్తత్కర్మసిద్ధ్యర్థం పుత్రాం స్తస్య గతో నృపః ॥ 13 ॥
వాసిష్ఠా దీర్ఘతపసస్తపో యత్ర హి తేపిరే ।
త్రిశంఙ్కుస్సుమహాతేజా శ్శతం పరమభాస్వరమ్ ॥ 14 ॥
వసిష్ఠపుత్రాన్ దదృశే తప్యమానాన్ యశస్వినః ।
సోఽభిగమ్య మహాత్మనస్సర్వానేవ గురోస్సుతాన్ ॥ 15 ॥
అభివాద్యానుపూర్వ్యేణ హ్రియా కిఞ్చిదవాఙ్ముఖః ।
అబ్రవీత్సుమహాభగాన్సర్వానేవ కృతాఞ్జలిః ॥ 16 ॥
శరణం వః ప్రపద్యేఽహం శరణ్యాన్ శరణాగతః ।
ప్రత్యాఖ్యాతోఽస్మి భద్రం వో వసిష్ఠేన మహాత్మనా ॥ 17 ॥
యష్టుకామో మహాయజ్ఞం తదనుజ్ఞాతుమర్హథ ।
గురుపుత్రానహం సర్వాన్నమస్కృత్య ప్రసాదయే ॥ 18 ॥
శిరసా ప్రణతో యాచే బ్రాహ్మణాన్ తపసి స్థితాన్ ।
తే మాం భవన్తస్సిద్ధ్యర్థం యాజయన్తు సమాహితాః ॥ 19 ॥
సశరీరో యథాఽహం హి దేవలోకమవాప్నుయామ్ ।
ప్రత్యాఖ్యాతో వసిష్ఠేన గతిమన్యాం తపోధనాః ॥ 20 ॥
గురుపుత్రానృతే సర్వాన్నాహం పశ్యామి కాఞ్చన ।
ఇక్ష్వాకూణాం హి సర్వేషాం పురోధాః పరమా గతిః ॥ 21 ॥
పురోధసస్తు విద్వాంసస్తారయన్తి సదా నృపాన్ ।
తస్మాదనన్తరం సర్వే భవన్తో దైవతం మమ ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే సప్తపఞ్చాశస్సర్గః ॥
