శ్రీమద్వాల్మీకీయ రామాయణే బాలకాణ్డమ్ ।
అథ ఏకవింశస్సర్గః ।
తచ్ఛ్రుత్వా వచనం తస్య స్నేహపర్యాకులాక్షరమ్ ।
సమన్యుః కౌశికో వాక్యం ప్రత్యువాచ మహీపతిమ్ ॥ 1 ॥
పూర్వమర్థం ప్రతిశ్రుత్య ప్రతిజ్ఞాం హాతుమిచ్ఛసి ।
రాఘవాణామయుక్తోఽయం కులస్యాస్య విపర్యయః ॥ 2 ॥
యదీదం తే క్షమం రాజన్ గమిష్యామి యథాఽగతమ్ ।
మిథ్యాప్రతిజ్ఞః కాకుత్స్థ సుఖీభవ సబాన్ధవః ॥ 3 ॥
తస్య రోషపరీతస్య విశ్వామిత్రస్య ధీమతః ।
చచాల వసుధా కృత్స్నా వివేశ చ భయం సురాన్ ॥ 4 ॥
త్రస్తరూపం తు విజ్ఞాయ జగత్సర్వం మహానృషిః ।
నృపతిం సువ్రతో ధీరో వసిష్ఠో వాక్యమబ్రవీత్ ॥ 5 ॥
ఇక్ష్వాకూణాం కులే జాతస్సాక్షాద్ధర్మ ఇవాపరః ।
ధృతిమాన్ సువ్రతః శ్రీమాన్నధర్మం హాతుమర్హసి ॥ 6 ॥
త్రిషు లోకేషు విఖ్యాతో ధర్మాత్మా ఇతి రాఘవ ।
స్వధర్మం ప్రతిపద్యస్వ నాధర్మం వోఢుమర్హసి ॥ 7 ॥
సంశ్రుత్యైవం కరిష్యామీత్యకుర్వాణస్య రాఘవ ।
ఇష్టాపూర్తవధో భూయాత్తస్మాద్రామం విసర్జయ ॥ 8 ॥
కృతాస్త్రమకృతాస్త్రం వా నైనం శక్ష్యన్తి రాక్షసాః ।
గుప్తం కుశికపుత్రేణ జ్వలనేనామృతం యథా ॥ 9 ॥
ఏష విగ్రహవాన్ ధర్మ ఏష వీర్యవతాం వరః ।
ఏష బుధ్యాఽధికో లోకే తపసశ్చ పరాయణమ్ ॥ 10 ॥
ఏషోఽస్త్రాన్ వివిధాన్వేత్తి త్రైలోక్యే సచరాచరే ।
నైనమన్యః పుమాన్వేత్తి న చ వేత్స్యన్తి కేచన ॥ 11 ॥
న దేవా నర్షయః కేచిన్నాసురా న చ రాక్షసాః ।
గన్ధర్వయక్షప్రవరాస్సకిన్నరమహోరగాః ॥ 12 ॥
సర్వాస్త్రాణి భృశాశ్వస్య పుత్రాః పరమధార్మికాః ।
కౌశికాయ పురా దత్తా యదా రాజ్యం ప్రశాసతి ॥ 13 ॥
తేఽపి పుత్రా భృశాశ్వస్య ప్రజాపతిసుతాసుతాః ।
నైకరూపా మహావీర్యా దీప్తిమన్తో జయావహాః ॥ 14 ॥
జయా చ సుప్రభా చైవ దక్షకన్యే సుమధ్యమే ।
తే సువాతేఽస్త్రశస్త్రాణి శతం పరమభాస్వరమ్ ॥ 15 ॥
పఞ్చాశతం సుతాన్ లేభే జయా నామ పరాన్ పురా ।
వధాయాసురసైన్యానామమేయాన్ కామరూపిణః ॥ 16 ॥
సుప్రభాఽజనయచ్చాపి పుత్రాన్పఞ్చాశతం పునః ।
సంహారాన్నామదుర్ధర్షాన్ దురాక్రామాన్ బలీయసః ॥ 17 ॥
తాని చాస్త్రాణి వేత్త్యేష యథావత్కుశికాత్మజః ।
అపూర్వాణాం చ జననే శక్తో భూయస్స ధర్మవిత్ ॥ 18 ॥
ఏవం వీర్యో మహాతేజా విశ్వామిత్రో మహాయశాః ।
న రామగమనే రాజన్ సంశయం కర్తుమర్హసి ॥ 19 ॥
తేషాం నిగ్రహణే శక్తస్స్వయం చ కుశికాత్మజః ।
తవ పుత్రహితార్థాయ త్వాముపేత్యాభియాచతే ॥ 20 ॥
ఇతి మునివచనాత్ప్రసన్నచిత్తో రఘువృషభస్తు ముమోద భాస్వరాఙ్గః ।
గమనమభిరురోచ రాఘవస్య ప్రథితయశాః కుశికాత్మజాయ బుధ్యా ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే ఏకవింశస్సర్గః ॥
