శ్రీమద్వాల్మీకీయ రామాయణే అరణ్యకాణ్డమ్ ।
అథ ఏకవింశస్సర్గః ।
స పునః పతితాం దృష్ట్వా క్రోధాచ్ఛూర్పణఖాం ఖరః ।
ఉవాచ వ్యక్తయా వాచా తామనర్థార్థమాగతామ్ ॥ 1 ॥
మయా త్విదానీం శూరాస్తే రాక్షసా రుధిరాశనాః ।
త్వత్ప్రియార్థం వినిర్దిష్టాః కిమర్థం రుద్యతే పునః ॥ 2 ॥
భక్తాశ్చైవానురక్తాశ్చ హితాశ్చ మమ నిత్యశః ।
హన్యమానా న హన్యన్తే న న కుర్యుర్వచో మమ ॥ 3 ॥
కిమేతచ్ఛ్రోతుమిచ్ఛామి కారణం యత్కృతే పునః ।
హా నాథేతి వినర్దన్తీ సర్పవల్లుఠసి క్షితౌ ॥ 4 ॥
అనాథవద్విలపసి నాథే తు మయి సంస్థితే ।
ఉత్తిష్ఠోత్తిష్ఠ మాభైషీర్వైక్లవ్యం త్యజ్యతామిహ ॥ 5 ॥
ఇత్యేవముక్తా దుర్ధర్షా ఖరేణ పరిసాన్త్వితా ।
విమృజ్య నయనే సాస్రే ఖరం భ్రాతరమబ్రవీత్ ॥ 6 ॥
అస్మీదానీమహం ప్రాప్తా హృతశ్రవణనాసికా ।
శోణితౌఘపరిక్లిన్నా త్వయా చ పరిసాన్త్వితా ॥ 7 ॥
ప్రేషితాశ్చ త్వయా వీర రాక్షసాస్తే చతుర్దశ ।
నిహన్తుం రాఘవం క్రోధాన్మత్ప్రియార్థం సలక్షణమ్ ॥ 8 ॥
తే తు రామేణ సామర్షాః శూలపట్టసపాణయః ।
సమరే నిహతాస్సర్వే సాయకైర్మర్మభేదిభిః ॥ 9 ॥
తాన్దృష్ట్వా పతితాన్భూమౌ క్షణేనైవ మహాబలాన్ ।
రామస్య చ మహత్కర్మ మహాంస్త్రాసోఽభవన్మమ ॥ 10 ॥
అహమస్మి సముద్విగ్నా విషణ్ణా చ నిశాచర ।
శరణం త్వాం పునః ప్రాప్తా సర్వతోభయదర్శినీ ॥ 11 ॥
విషాదనక్రాధ్యుషితే పరిత్రాసోర్మిమాలిని ।
కిం మాం న త్రాయసే మగ్నాం విపులే శోకసాగరే ॥ 12 ॥
ఏతే చ నిహతా భూమౌ రామేణ నిశితైః శరైః ।
యేఽపి మే పదవీం ప్రాప్తా రాక్షసాః పిశితాశనాః ॥ 13 ॥
మయి తే యద్యనుక్రోశో యది రక్షస్సు తేషు చ ।
రామేణ యది తే శక్తిస్తేజో వాస్తి నిశాచర ॥ 14 ॥
దణ్డకారణ్యనిలయం జహి రాక్షసకణ్టకమ్ ।
యది రామం మమామిత్రం న త్వమద్యవధిష్యసి ॥ 15 ॥
తవైవ చాగ్రతః ప్రాణాంస్త్యక్షామి నిరపత్రప ।
బుద్ధ్యాహమనుపశ్యామి న త్వం రామస్య సంయుగే ॥ 16 ॥
స్థాతుం ప్రతిముఖే శక్తస్సబలశ్చ మహాత్మనః ।
శూరమానీ న శూరస్త్వం మిథ్యారోపితవిక్రమః ॥ 17 ॥
మానుషౌ యో న శక్నోషి హన్తుం తౌ రామలక్ష్మణౌ ।
రామేణ యది తే శక్తిస్తేజో వాస్తి నిశాచర ॥ 18 ॥
దణ్డకారణ్యనిలయం జహి తం కులపాంసన ।
నిస్సత్వస్యాల్ప వీర్యస్య వాసస్తే కీదృశస్త్విహ ॥ 19 ॥
అపయాహి జనస్థానాతత్వరితస్సహబాన్ధవః ।
రామతేజోభిభూతో హి త్వం క్షిప్రం వినశిష్యసి ॥ 20 ॥
స హి తేజస్సమాయుక్తో రామో దశరథాత్మజః ।
భ్రాతా చాస్య మహావీర్యో యేన చాస్మి విరూపితా ॥ 21 ॥
ఏవం విలప్య బహుశో రాక్షసీ వితతోదరీ ।
కరాభ్యాముదరం హత్వా రురోద భృశదుఃఖితా ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాణ్డే ఏకవింశస్సర్గః ॥
