శ్రీమద్వాల్మీకీయ రామాయణే అయోధ్యాకాణ్డమ్ ।
అథ ఏకోనసప్తతితమస్సర్గః ।
యామేవ రాత్రిం తే దూతాః ప్రవిశన్తి స్మ తాం పురీమ్ ।
భరతేనాపి తాం రాత్రిం స్వప్నో దృష్టోఽయమప్రియః ॥ 1 ॥
వ్యుష్టామేవ తు తాం రాత్రిం దృష్ట్వా తం స్వప్నమప్రియమ్ ।
పుత్రో రాజాధిరాజస్య సుభృశం పర్యతప్యత ॥ 2 ॥
తప్యమానం సమాజ్ఞాయ వయస్యాః ప్రియవాదినః ।
ఆయాసం హి వినేష్యన్త స్సభాయాం చక్రిరే కథాః ॥ 3 ॥
వాదయన్తి తథా శాన్తిం లాస యన్త్యపి చాపరే ।
నాటకాన్యపరే ప్రాహుర్హాస్యాని వివిధాని చ ॥ 4 ॥
స తైర్మహాత్మా భరతస్సఖిభిః ప్రియవాదిభిః ।
గోష్ఠీహాస్యాని కుర్వద్భిర్న ప్రాహృష్యత రాఘవః ॥ 5 ॥
తమబ్రవీత్ప్రియసఖో భరతం సఖిభిర్వృతమ్ ।
సుహృద్భిః పర్యుపాసీనః కిం సఖే నానుమోదసే ॥ 6 ॥
ఏవం బ్రువాణం సుహృదం భరతః ప్రత్యువాచ హ ।
శ్రుణు త్వం యన్నిమిత్తం మే దైన్యమేతదుపాగతమ్ ॥ 7 ॥
స్వప్నే పితరమద్రాక్షం మలినం ముక్త మూర్ధజమ్ ।
పతన్తమద్రిశిఖరాత్కలుషే గోమయహ్రదే ॥ 8 ॥
ప్లవమానశ్చ మే దృష్టస్స తస్మిన్గోమయహ్రదే ।
పిబన్నఞ్జలినా తైలం హసన్నపి ముహుర్ముహుః ॥ 9 ॥
తతస్తిలౌదనం భుక్త్వా పునః పునరధశ్శిరాః ।
తైలేనాభ్యక్తసర్వాఙ్గః తైలమేవాన్వగాహత ॥ 10 ॥
స్వప్నేఽపి సాగరం శుష్కం చన్ద్రం చ పతితం భవి ।
ఉపరుద్ధాం చ జగతీం తమసేవ సమావృతామ్ ॥ 11 ॥
ఔపవాహ్యస్య నాగస్య విషాణం శకలీకృతమ్ ।
సహసాచాపి సంశాన్తం జ్వలితం జాతవేదసమ్ ॥ 12 ॥
అవతీర్ణాం చ పృథివీం శుష్కాం శ్చ వివిధాన్ ద్రుమాన్ ।
అహం పశ్యామి విధ్వస్తాన్ సధూమాంశ్చాపి పర్వతాన్ ॥ 13 ॥
పీఠే కార్ష్ణాయసే చైనం నిషణ్ణం కృష్ణవాససమ్ ।
ప్రహసన్తి స్మ రాజానం ప్రమదాః కృష్ణపిఙ్గలాః ॥ 14 ॥
త్వరమాణశ్చ ధర్మాత్మా రక్తమాల్యానులేపనః ।
రథేన ఖరయుక్తేన ప్రయాతో దక్షిణాముఖః ॥ 15 ॥
ప్రహసన్తీవ రాజానం ప్రమదా రక్తవాసినీ ।
ప్రకర్షన్తీ మయా దృష్టా రాక్షసీ వికృతాననా ॥ 16 ॥
ఏవమేతన్మయా దృష్టమిమాం రాత్రిం భయావహమ్ ।
అహం రామోఽథవా రాజా లక్ష్మణో వా మరిష్యతి ॥ 17 ॥
నరో యానేన య స్స్వప్నే స్వరయుక్తేన యాతి హి ।
అచిరాత్తస్య ధూమాగ్రం చితాయాం సమ్ప్రదృశ్యతే ॥ 18 ॥
ఏతన్నిమిత్తం దీనోఽహం తన్నవః ప్రతిపూజయే ।
శుష్యతీవ చ మే కణ్ఠః న స్వస్థమివ మే మనః ॥ 19 ॥
న పశ్యామి భయస్థానం భయం చైవోపధారయే భ్రష్టశ్చ స్వరయోగో మే ఛాయా చోపహతా మమ ।
జుగుప్సన్నివ చాఽత్మానం న పశ్యమి చ కారణమ్ ॥ 20 ॥
ఇమాం చ దుస్స్వప్నగతిం నిశామ్యతామనేకరూపామవితర్కితాం పురా ।
భయం మహత్తద్ధృదయాన్నయాతి మే విచిన్త్య రాజానమచిన్తదర్శనమ్ ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాణ్డే ఏకోనసప్తతితమస్సర్గః ॥
