ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ତ୍ରୟୋଵିଂଶସ୍ସର୍ଗଃ ।
ପ୍ରଭାତାୟାଂ ତୁ ଶର୍ଵର୍ୟାଂ ଵିଶ୍ଵାମିତ୍ରୋ ମହାମୁନିଃ ।
ଅଭ୍ୟଭାଷତ କାକୁତ୍ସ୍ଥୌ ଶୟାନୌ ପର୍ଣସଂସ୍ତରେ ॥ 1 ॥
କୌସଲ୍ୟା ସୁପ୍ରଜା ରାମ ପୂର୍ଵା ସଂଧ୍ୟା ପ୍ରଵର୍ତତେ ।
ଉତ୍ତିଷ୍ଠ ନରଶାର୍ଦୂଲ କର୍ତଵ୍ୟଂ ଦୈଵମାହ୍ନିକମ୍ ॥ 2 ॥
ତସ୍ୟର୍ଷେଃ ପରମୋଦାରଂ ଵଚଶ୍ଶ୍ରୁତ୍ଵା ନୃପାତ୍ମଜୌ ।
ସ୍ନାତ୍ଵା କୃତୋଦକୌ ଵୀରୌ ଜେପତୁଃ ପରମଂ ଜପମ୍ ॥ 3 ॥
କୃତାହ୍ନିକୌ ମହାଵୀର୍ୟୌ ଵିଶ୍ଵାମିତ୍ରଂ ତପୋଧନମ୍ ।
ଅଭିଵାଦ୍ୟାଭିସଂହୃଷ୍ଟୌ ଗମନାୟାଭିତସ୍ଥତୁଃ ॥ 4 ॥
ତୌ ପ୍ରୟାତୌ ମହାଵୀର୍ୟୌ ଦିଵ୍ୟାଂ ତ୍ରିପଥଗାଂ ନଦୀମ୍ ।
ଦଦୃଶାତେ ତତସ୍ତତ୍ର ସରୟ୍ଵାସ୍ସଂଗମେ ଶୁଭେ ॥ 5 ॥
ତତ୍ରାଶ୍ରମପଦଂ ପୁଣ୍ୟମୃଷୀଣାମଗ୍ୟ୍ରତେଜସାମ୍ ।
ବହୁଵର୍ଷସହସ୍ରାଣି ତପ୍ୟତାଂ ପରମଂ ତପଃ ॥ 6 ॥
ତଂ ଦୃଷ୍ଟ୍ଵା ପରମପ୍ରୀତୌ ରାଘଵୌ ପୁଣ୍ୟମାଶ୍ରମମ୍ ।
ଊଚତୁସ୍ତଂ ମହାତ୍ମାନଂ ଵିଶ୍ଵାମିତ୍ରମିଦଂ ଵଚଃ ॥ 7 ॥
କସ୍ୟାୟମାଶ୍ରମଃ ପୁଣ୍ୟଃ କୋନ୍ଵସ୍ମିନ୍ଵସତେ ପୁମାନ୍ ।
ଭଗଵନ୍ ଶ୍ରୋତୁମିଚ୍ଛାଵଃ ପରଂ କୌତୂହଲଂ ହି ନୌ ॥ 8 ॥
ତୟୋସ୍ତଦ୍ଵଚନଂ ଶ୍ରୁତ୍ଵା ପ୍ରହସ୍ୟ ମୁନିପୁଂଗଵଃ ।
ଅବ୍ରଵୀଚ୍ଛ୍ରୂୟତାଂ ରାମ ୟସ୍ୟାୟଂ ପୂର୍ଵ ଆଶ୍ରମଃ ॥ 9 ॥
କଂଦର୍ପୋ ମୂର୍ତିମାନାସୀତ୍କାମ ଇତ୍ୟୁଚ୍ୟତେ ବୁଧୈଃ ।
ତପସ୍ୟଂତମିହ ସ୍ଥାଣୁଂ ନିୟମେନ ସମାହିତମ୍ ॥ 10 ॥
କୃତୋଦ୍ଵାହଂ ତୁ ଦେଵେଶଂ ଗଚ୍ଛଂତଂ ସମରୁଦ୍ଗଗଣମ୍ ।
ଧର୍ଷୟାମାସ ଦୁର୍ମେଧା ହୁଂକୃତଶ୍ଚ ମହାତ୍ମନା ॥ 11 ॥
ଅଵଦଗ୍ଧସ୍ୟ ରୌଦ୍ରେଣ ଚକ୍ଷୁଷା ରଘୁନଂଦନ ।
ଵ୍ୟଶୀର୍ୟଂତ ଶରୀରାତ୍ସ୍ଵାତ୍ସର୍ଵଗାତ୍ରାଣି ଦୁର୍ମତେଃ ॥ 12 ॥
ତସ୍ୟ ଗାତ୍ରଂ ହତଂ ତତ୍ର ନିର୍ଦଗ୍ଥସ୍ୟ ମହାତ୍ମନା ।
ଅଶରୀରଃ କୃତଃ କାମଃ କ୍ରୋଧାଦ୍ଦେଵେଶ୍ଵରେଣ ହି ॥ 13 ॥
ଅନଂଗ ଇତି ଵିଖ୍ୟାତସ୍ତଦାପ୍ରଭୃତି ରାଘଵ ।
ସ ଚାଂଗଵିଷୟଶ୍ଶ୍ରୀମାନ୍ୟତ୍ରାଂଗଂ ପ୍ରମୁମୋଚ ହ ॥ 14 ॥
ତସ୍ୟାୟମାଶ୍ରମଃ ପୁଣ୍ୟସ୍ତସ୍ୟେମେ ମୁନୟଃ ପୁରା ।
ଶିଷ୍ୟା ଧର୍ମପରା ନିତ୍ୟଂ ତେଷାଂ ପାପଂ ନ ଵିଦ୍ୟତେ ॥ 15 ॥
ଇହାଦ୍ୟ ରଜନୀଂ ରାମ ଵସେମ ଶୁଭଦର୍ଶନ ।
ପୁଣ୍ୟୟୋସ୍ସରିତୋର୍ମଧ୍ୟେ ଶ୍ଵସ୍ତରିଷ୍ୟାମହେ ଵୟମ୍ ॥ 16 ॥
ଅଭିଗଚ୍ଛାମହେ ସର୍ଵେ ଶୁଚୟଃ ପୁଣ୍ୟମାଶ୍ରମମ୍ ।
ସ୍ନାତାଶ୍ଚ କୃତଜପ୍ୟାଶ୍ଚ ହୁତହଵ୍ୟା ନରୋତ୍ତମ ॥ 17 ॥
ତେଷାଂ ସଂଵଦତାଂ ତତ୍ର ତପୋଦୀର୍ଘେଣ ଚକ୍ଷୁଷା ।
ଵିଜ୍ଞାୟ ପରମପ୍ରୀତା ମୁନୟୋ ହର୍ଷମାଗମନ୍ ॥ 18 ॥
ଅର୍ଘ୍ୟଂ ପାଦ୍ୟଂ ତଥାଽତିଥ୍ୟଂ ନିଵେଦ୍ୟ କୁଶିକାତ୍ମଜେ ।
ରାମଲକ୍ଷ୍ମଣୟୋଃ ପଶ୍ଚାଦକୁର୍ଵନ୍ନତିଥିକ୍ରିୟାମ୍ ॥ 19 ॥
ସତ୍କାରଂ ସମନୁପ୍ରାପ୍ୟ କଥାଭିରଭିରଂଜୟନ୍ ।
ୟଥାର୍ହମଜପନ୍ ସଂଧ୍ୟାମୃଷୟସ୍ତେ ସମାହିତାଃ ॥ 20 ॥
ତତ୍ର ଵାସିଭିରାନୀତା ମୁନିଭିସ୍ସୁଵ୍ରତୈଃ ସହ ।
ନ୍ୟଵସନ୍ ସୁସୁଖଂ ତତ୍ର କାମାଶ୍ରମପଦେ ତଦା ॥ 21 ॥
କଥାଭିରଭିରାମାଭିରଭିରାମୌ ନୃପାତ୍ମଜୌ ।
ରମୟାମାସ ଧର୍ମାତ୍ମା କୌଶିକୋ ମୁନିପୁଂଗଵଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ତ୍ରୟୋଵିଂଶସ୍ସର୍ଗଃ ॥
