శ్రీమద్వాల్మీకీయ రామాయణే బాలకాణ్డమ్ ।
అథ చతుఃషష్టితమస్సర్గః ।
సురకార్యమిదం రమ్భే కర్తవ్యం సుమహత్త్వయా ।
లోభనం కౌశికస్యేహ కామమోహసమన్వితమ్ ॥ 1 ॥
తథోక్తా సాఽప్సరా రామ సహస్రాక్షేణ ధీమతా ।
వ్రీడితా ప్రాఞ్జలిర్వాక్యం ప్రత్యువాచ సురేశ్వరమ్ ॥ 2 ॥
అయం సురపతే ఘోరో విశ్వామిత్రో మహామునిః ।
ఘోరముత్సృజతే క్రోధం మయి దేవ న సంశయః ॥ 3 ॥
తతో హి మే భయం దేవ ప్రాసాదం కర్తుమర్హసి ।
ఏవముక్తస్తయా రామ రమ్భయా భీతయా తదా ॥ 4 ॥
తామువాచ సహస్రాక్షో వేపమానాం కృతాఞ్జలిమ్ ।
మాభైషీ రమ్భే భద్రం తే కురుష్వ మమ శాసనమ్ ॥ 5 ॥
కోకిలో హృదయగ్రాహీ మాధవే రుచిరద్రుమే ।
అహం కన్దర్పసహిత స్స్థాస్యామి తవ పార్శ్వతః ॥ 6 ॥
త్వం హి రూపం బహుగుణం కృత్వా పరమభాస్వరమ్ ।
తమృషిం కౌశికం రమ్భే భేదయస్వ తపస్వినమ్ ॥ 7 ॥
సా శ్రుత్వా వచనం తస్య కృత్వా రూపమనుత్తమమ్ ।
లోభయామాస లలితా విశ్వామిత్రం శుచిస్మితా ॥ 8 ॥
కోకిలస్య చ శుశ్రావ వల్గు వ్యాహరతః స్వనమ్ ।
సమ్ప్రహృష్టేన మనసా తత ఏనాముదైక్షత ॥ 9 ॥
అథ తస్య చ శబ్దేన గీతేనాప్రతిమేన చ ।
దర్శనేన చ రమ్భాయా మునిస్సన్దేహమాగతః ॥ 10 ॥
సహస్రాక్షస్య తత్కర్మ విజ్ఞాయ మునిపుఙ్గవః ।
రమ్భాం క్రోధసమావిష్ట శ్శశాప కుశికాత్మజః ॥ 11 ॥
యన్మాం లోభయసే రమ్భే కామక్రోధజయైషిణమ్ ।
దశవర్షసహస్రాణి శైలీ స్థాస్యసి దుర్భగే ॥ 12 ॥
బ్రాహ్మణ స్సుమహాతేజా స్తపోబలసమన్వితః ।
ఉద్ధరిష్యతి రమ్భే త్వాం మత్క్రోధకలుషీకృతామ్ ॥ 13 ॥
ఏవముక్త్వా మహాతేజా విశ్వామిత్రో మహామునిః ।
అశక్నువన్ ధారయితుం క్రోధం సన్తాపమాగతః ॥ 14 ॥
తస్య శాపేన మహతా రమ్భా శైలీ తదాఽభవత్ ।
వచశ్శృత్వా చ కన్దర్పో మహర్షేస్స చ నిర్గతః ॥ 15 ॥
కోపేన స మహాతేజాస్తపోఽపహరణే కృతే ।
ఇన్ద్రియైరజితై రామ న లేభే శాన్తిమాత్మనః ॥ 16 ॥
బభూవాస్య మనశ్చిన్తా తపోఽపహరణే కృతే ।
నైవ క్రోధం గమిష్యామి న చ వక్ష్యే కథఞ్చన ॥ 17 ॥
అథవా నోచ్ఛవసిష్యామి సంవత్సరశతాన్యపి ।
అహం విశోషయిష్యామి హ్యాత్మానం విజితేన్ద్రియః ॥ 18 ॥
తావద్యావద్ధి మే ప్రాప్తం బ్రాహ్మణ్యం తపసాఽఽర్జితమ్ ।
అనుచ్ఛవసన్నభుఞ్జాన స్తిష్ఠేయం శాశ్వతీస్సమాః ॥ 19 ॥
న హి మే తప్యమానస్య క్షయం యాస్యన్తి మూర్తయః ।
ఏవం వర్షసహస్రస్య దీక్షాం స మునిపుఙ్గవః ॥ 20 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే చతుఃషష్టితమస్సర్గః ॥
