ശ്രീമദ്വാല്മീകീയ രാമായണേ ബാലകാംഡമ് ।
അഥ ഷട്ഷഷ്ടിതമസ്സര്ഗഃ ।
തതഃ പ്രഭാതേ വിമലേ കൃതകര്മാ നരാധിപഃ ।
വിശ്വാമിത്രം മഹാത്മാനം ആജുഹാവ സരാഘവമ് ॥ 1 ॥
തമര്ചയിത്വാ ധര്മാത്മാ ശാസ്ത്രദൃഷ്ടേന കര്മണാ ।
രാഘവൌ ച മഹാത്മാനൌ തദാ വാക്യമുവാച ഹ ॥ 2 ॥
ഭഗവന് സ്വാഗതം തേഽസ്തു കിം കരോമി തവാനഘ ।
ഭവാനാജ്ഞാപയതു മാമാജ്ഞാപ്യോ ഭവതാ ഹ്യഹമ് ॥ 3 ॥
ഏവമുക്തസ്സ ധര്മാത്മാ ജനകേന മഹാത്മനാ ।
പ്രത്യുവാച മുനിർവീരം വാക്യം വാക്യവിശാരദഃ ॥ 4 ॥
പുത്രൌ ദശരഥസ്യേമൌ ക്ഷത്രിയൌ ലോകവിശ്രുതൌ ।
ദ്രുഷ്ടുകാമൌ ധനു ശ്ശ്രേഷ്ഠം യദേതത്വയി തിഷ്ഠതി ॥ 5 ॥
ഏതദ്ദര്ശയ ഭദ്രം തേ കൃതകാമൌ നൃപാത്മജൌ ।
ദര്ശനാദസ്യ ധനുഷോ യഥേഷ്ടം പ്രതിയാസ്യതഃ ॥ 6 ॥
ഏവമുക്തസ്തു ജനകഃ പ്രത്യുവാച മഹാമുനിമ് ।
ശ്രൂയതാമസ്യ ധനുഷോ യദര്ഥമിഹ തിഷ്ഠതി ॥ 7 ॥
ദേവരാത ഇതി ഖ്യാതോ നിമേഷ്ഷഷ്ഠോ മഹീപതിഃ ।
ന്യാസോഽയം തസ്യ ഭഗവന് ഹസ്തേ ദത്തോ മഹാത്മനാ ॥ 8 ॥
ദക്ഷയജ്ഞവധേ പൂർവം ധനുരായമ്യ വീര്യവാന് ।
രുദ്രസ്തു ത്രിദശാന് രോഷാത്സലീലമിദമബ്രവീത് ॥ 9 ॥
യസ്മാദ്ഭാഗാര്ഥിനോ ഭാഗാന്നാകല്പയത മേ സുരാഃ ।
വരാംഗാണി മഹാര്ഹാണി ധനുഷാ ശാതയാമി വഃ ॥ 10 ॥
തതോ വിമനസസ്സർവേ ദേവാ വൈ മുനിപുംഗവ ।
പ്രസാദയംതി ദേവേശം തേഷാം പ്രീതോഽഭവദ്ഭവഃ ॥ 11 ॥
പ്രീതിയുക്തസ്സ സർവേഷാം ദദൌ തേഷാം മഹാത്മനാമ് ।
തദേതദ്ദേവദേവസ്യ ധനൂരത്നം മഹാത്മനഃ ।
ന്യാസഭൂതം തദാ ന്യസ്തമസ്മാകം പൂർവ കേ വിഭോ ॥ 12 ॥
അഥ മേ കൃഷതഃ ക്ഷേത്രം ലാംഗൂലാദുത്ഥിതാ മയാ ।
ക്ഷേത്രം ശോധയതാ ലബ്ധാ നാമ്നാ സീതേതി വിശ്രുതാ ॥ 13 ॥
ഭൂതലാദുത്ഥിതാ സാ തു വ്യവര്ധത മമാത്മജാ ।
വീര്യശുല്കേതി മേ കന്യാ സ്ഥാപിതേയമയോനിജാ ॥ 14 ॥
ഭൂതലാദുത്ഥിതാം താം തു വര്ധമാനാം മമാത്മജാമ് ।
വരയാമാസുരാഗമ്യ രാജാനോ മുനിപുംഗവ ॥ 15 ॥
തേഷാം വരയതാം കന്യാം സർവേഷാം പൃഥിവീക്ഷിതാമ് ।
വീര്യശുല്കേതി ഭഗവന് ന ദദാമി സുതാമഹമ് ॥ 16 ॥
തതസ്സർവേ നൃപതയ സ്സമേത്യ മുനിപുംഗവ ।
മിഥിലാമഭ്യുപാഗമ്യ വീര്യജിജ്ഞാസവസ്തദാ ॥ 17 ॥
തേഷാം ജിജ്ഞാസമാനാനാം വീര്യം ധനുരുപാഹൃതമ് ।
ന ശേകുര്ഗ്രഹണേ തസ്യ ധനുഷസ്തോലനേഽപി വാ ॥ 18 ॥
തേഷാം വീര്യവതാം വീര്യമല്പം ജ്ഞാത്വാ മഹാമുനേ ।
പ്രത്യാഖ്യാതാ നൃപതയസ്തന്നിബോധ തപോധന ॥ 19 ॥
തതഃ പരമകോപേന രാജാനോ നൃപപുംഗവ ।
ന്യരുംധന്മിഥിലാം സർവേ വീര്യസംദേഹമാഗതാഃ ॥ 20 ॥
ആത്മാനമവധൂതം തേ വിജ്ഞായ നൃപപുംഗവാഃ ।
രോഷേണ മഹതാഽഽവിഷ്ടാഃ പീഡയന്മിഥിലാം പുരീമ് ॥ 21 ॥
തതസ്സംവത്സരേ പൂര്ണേ ക്ഷയം യാതാനി സർവശഃ ।
സാധനാനി മുനിശ്രേഷ്ഠ തതോഽഹം ഭൃശദുഃഖിതഃ ॥ 22 ॥
തതോ ദേവഗണാന് സർവാന് തപസാഽഹം പ്രസാദയമ് ।
ദദുശ്ച പരമപ്രീതാ ശ്ചതുരംഗബലം സുരാഃ ॥ 23 ॥
തതോ ഭഗ്നാ നൃപതയോ ഹന്യമാനാ ദിശോ യയുഃ ।
അവീര്യാ വീര്യസംദിഗ്ധാ സ്സാമാത്യാഃ പാപകര്മണഃ ॥ 24 ॥
തദേതന്മുനിശാര്ദൂല ധനുഃ പരമഭാസ്വരമ് ।
രാമലക്ഷ്മണയോശ്ചാപി ദര്ശയിഷ്യാമി സുവ്രത ॥ 25 ॥
യദ്യസ്യ ധനുഷോ രാമഃ കുര്യാദാരോപണം മുനേ ।
സുതാമയോനിജാം സീതാം ദദ്യാം ദാശരഥേരഹമ് ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷട്ഷഷ്ടിതമസ്സര്ഗഃ ॥
