ශ්රීමද්වාල්මීකීය රාමායණේ බාලකාංඩම් ।
අථ ෂට්ෂෂ්ටිතමස්සර්ගඃ ।
තතඃ ප්රභාතේ විමලේ කෘතකර්මා නරාධිපඃ ।
විශ්වාමිත්රං මහාත්මානං ආජුහාව සරාඝවම් ॥ 1 ॥
තමර්චයිත්වා ධර්මාත්මා ශාස්ත්රදෘෂ්ටේන කර්මණා ।
රාඝවෞ ච මහාත්මානෞ තදා වාක්යමුවාච හ ॥ 2 ॥
භගවන් ස්වාගතං තේऽස්තු කිං කරෝමි තවානඝ ।
භවානාජ්ඤාපයතු මාමාජ්ඤාප්යෝ භවතා හ්යහම් ॥ 3 ॥
ඒවමුක්තස්ස ධර්මාත්මා ජනකේන මහාත්මනා ।
ප්රත්යුවාච මුනිර්වීරං වාක්යං වාක්යවිශාරදඃ ॥ 4 ॥
පුත්රෞ දශරථස්යේමෞ ක්ෂත්රියෞ ලෝකවිශ්රුතෞ ।
ද්රුෂ්ටුකාමෞ ධනු ශ්ශ්රේෂ්ඨං යදේතත්වයි තිෂ්ඨති ॥ 5 ॥
ඒතද්දර්ශය භද්රං තේ කෘතකාමෞ නෘපාත්මජෞ ।
දර්ශනාදස්ය ධනුෂෝ යථේෂ්ටං ප්රතියාස්යතඃ ॥ 6 ॥
ඒවමුක්තස්තු ජනකඃ ප්රත්යුවාච මහාමුනිම් ।
ශ්රූයතාමස්ය ධනුෂෝ යදර්ථමිහ තිෂ්ඨති ॥ 7 ॥
දේවරාත ඉති ඛ්යාතෝ නිමේෂ්ෂෂ්ඨෝ මහීපතිඃ ।
න්යාසෝऽයං තස්ය භගවන් හස්තේ දත්තෝ මහාත්මනා ॥ 8 ॥
දක්ෂයජ්ඤවධේ පූර්වං ධනුරායම්ය වීර්යවාන් ।
රුද්රස්තු ත්රිදශාන් රෝෂාත්සලීලමිදමබ්රවීත් ॥ 9 ॥
යස්මාද්භාගාර්ථිනෝ භාගාන්නාකල්පයත මේ සුරාඃ ।
වරාංගාණි මහාර්හාණි ධනුෂා ශාතයාමි වඃ ॥ 10 ॥
තතෝ විමනසස්සර්වේ දේවා වෛ මුනිපුංගව ।
ප්රසාදයංති දේවේශං තේෂාං ප්රීතෝऽභවද්භවඃ ॥ 11 ॥
ප්රීතියුක්තස්ස සර්වේෂාං දදෞ තේෂාං මහාත්මනාම් ।
තදේතද්දේවදේවස්ය ධනූරත්නං මහාත්මනඃ ।
න්යාසභූතං තදා න්යස්තමස්මාකං පූර්ව කේ විභෝ ॥ 12 ॥
අථ මේ කෘෂතඃ ක්ෂේත්රං ලාංගූලාදුත්ථිතා මයා ।
ක්ෂේත්රං ශෝධයතා ලබ්ධා නාම්නා සීතේති විශ්රුතා ॥ 13 ॥
භූතලාදුත්ථිතා සා තු ව්යවර්ධත මමාත්මජා ।
වීර්යශුල්කේති මේ කන්යා ස්ථාපිතේයමයෝනිජා ॥ 14 ॥
භූතලාදුත්ථිතාං තාං තු වර්ධමානාං මමාත්මජාම් ।
වරයාමාසුරාගම්ය රාජානෝ මුනිපුංගව ॥ 15 ॥
තේෂාං වරයතාං කන්යාං සර්වේෂාං පෘථිවීක්ෂිතාම් ।
වීර්යශුල්කේති භගවන් න දදාමි සුතාමහම් ॥ 16 ॥
තතස්සර්වේ නෘපතය ස්සමේත්ය මුනිපුංගව ।
මිථිලාමභ්යුපාගම්ය වීර්යජිජ්ඤාසවස්තදා ॥ 17 ॥
තේෂාං ජිජ්ඤාසමානානාං වීර්යං ධනුරුපාහෘතම් ।
න ශේකුර්ග්රහණේ තස්ය ධනුෂස්තෝලනේऽපි වා ॥ 18 ॥
තේෂාං වීර්යවතාං වීර්යමල්පං ජ්ඤාත්වා මහාමුනේ ।
ප්රත්යාඛ්යාතා නෘපතයස්තන්නිබෝධ තපෝධන ॥ 19 ॥
තතඃ පරමකෝපේන රාජානෝ නෘපපුංගව ।
න්යරුංධන්මිථිලාං සර්වේ වීර්යසංදේහමාගතාඃ ॥ 20 ॥
ආත්මානමවධූතං තේ විජ්ඤාය නෘපපුංගවාඃ ।
රෝෂේණ මහතාऽऽවිෂ්ටාඃ පීඩයන්මිථිලාං පුරීම් ॥ 21 ॥
තතස්සංවත්සරේ පූර්ණේ ක්ෂයං යාතානි සර්වශඃ ।
සාධනානි මුනිශ්රේෂ්ඨ තතෝऽහං භෘශදුඃඛිතඃ ॥ 22 ॥
තතෝ දේවගණාන් සර්වාන් තපසාऽහං ප්රසාදයම් ।
දදුශ්ච පරමප්රීතා ශ්චතුරංගබලං සුරාඃ ॥ 23 ॥
තතෝ භග්නා නෘපතයෝ හන්යමානා දිශෝ යයුඃ ।
අවීර්යා වීර්යසංදිග්ධා ස්සාමාත්යාඃ පාපකර්මණඃ ॥ 24 ॥
තදේතන්මුනිශාර්දූල ධනුඃ පරමභාස්වරම් ।
රාමලක්ෂ්මණයෝශ්චාපි දර්ශයිෂ්යාමි සුව්රත ॥ 25 ॥
යද්යස්ය ධනුෂෝ රාමඃ කුර්යාදාරෝපණං මුනේ ।
සුතාමයෝනිජාං සීතාං දද්යාං දාශරථේරහම් ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ෂට්ෂෂ්ටිතමස්සර්ගඃ ॥
