ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଟ୍ଷଷ୍ଟିତମସ୍ସର୍ଗଃ ।
ତତଃ ପ୍ରଭାତେ ଵିମଲେ କୃତକର୍ମା ନରାଧିପଃ ।
ଵିଶ୍ଵାମିତ୍ରଂ ମହାତ୍ମାନଂ ଆଜୁହାଵ ସରାଘଵମ୍ ॥ 1 ॥
ତମର୍ଚୟିତ୍ଵା ଧର୍ମାତ୍ମା ଶାସ୍ତ୍ରଦୃଷ୍ଟେନ କର୍ମଣା ।
ରାଘଵୌ ଚ ମହାତ୍ମାନୌ ତଦା ଵାକ୍ୟମୁଵାଚ ହ ॥ 2 ॥
ଭଗଵନ୍ ସ୍ଵାଗତଂ ତେଽସ୍ତୁ କିଂ କରୋମି ତଵାନଘ ।
ଭଵାନାଜ୍ଞାପୟତୁ ମାମାଜ୍ଞାପ୍ୟୋ ଭଵତା ହ୍ୟହମ୍ ॥ 3 ॥
ଏଵମୁକ୍ତସ୍ସ ଧର୍ମାତ୍ମା ଜନକେନ ମହାତ୍ମନା ।
ପ୍ରତ୍ୟୁଵାଚ ମୁନିର୍ଵୀରଂ ଵାକ୍ୟଂ ଵାକ୍ୟଵିଶାରଦଃ ॥ 4 ॥
ପୁତ୍ରୌ ଦଶରଥସ୍ୟେମୌ କ୍ଷତ୍ରିୟୌ ଲୋକଵିଶ୍ରୁତୌ ।
ଦ୍ରୁଷ୍ଟୁକାମୌ ଧନୁ ଶ୍ଶ୍ରେଷ୍ଠଂ ୟଦେତତ୍ଵୟି ତିଷ୍ଠତି ॥ 5 ॥
ଏତଦ୍ଦର୍ଶୟ ଭଦ୍ରଂ ତେ କୃତକାମୌ ନୃପାତ୍ମଜୌ ।
ଦର୍ଶନାଦସ୍ୟ ଧନୁଷୋ ୟଥେଷ୍ଟଂ ପ୍ରତିୟାସ୍ୟତଃ ॥ 6 ॥
ଏଵମୁକ୍ତସ୍ତୁ ଜନକଃ ପ୍ରତ୍ୟୁଵାଚ ମହାମୁନିମ୍ ।
ଶ୍ରୂୟତାମସ୍ୟ ଧନୁଷୋ ୟଦର୍ଥମିହ ତିଷ୍ଠତି ॥ 7 ॥
ଦେଵରାତ ଇତି ଖ୍ୟାତୋ ନିମେଷ୍ଷଷ୍ଠୋ ମହୀପତିଃ ।
ନ୍ୟାସୋଽୟଂ ତସ୍ୟ ଭଗଵନ୍ ହସ୍ତେ ଦତ୍ତୋ ମହାତ୍ମନା ॥ 8 ॥
ଦକ୍ଷୟଜ୍ଞଵଧେ ପୂର୍ଵଂ ଧନୁରାୟମ୍ୟ ଵୀର୍ୟଵାନ୍ ।
ରୁଦ୍ରସ୍ତୁ ତ୍ରିଦଶାନ୍ ରୋଷାତ୍ସଲୀଲମିଦମବ୍ରଵୀତ୍ ॥ 9 ॥
ୟସ୍ମାଦ୍ଭାଗାର୍ଥିନୋ ଭାଗାନ୍ନାକଲ୍ପୟତ ମେ ସୁରାଃ ।
ଵରାଂଗାଣି ମହାର୍ହାଣି ଧନୁଷା ଶାତୟାମି ଵଃ ॥ 10 ॥
ତତୋ ଵିମନସସ୍ସର୍ଵେ ଦେଵା ଵୈ ମୁନିପୁଂଗଵ ।
ପ୍ରସାଦୟଂତି ଦେଵେଶଂ ତେଷାଂ ପ୍ରୀତୋଽଭଵଦ୍ଭଵଃ ॥ 11 ॥
ପ୍ରୀତିୟୁକ୍ତସ୍ସ ସର୍ଵେଷାଂ ଦଦୌ ତେଷାଂ ମହାତ୍ମନାମ୍ ।
ତଦେତଦ୍ଦେଵଦେଵସ୍ୟ ଧନୂରତ୍ନଂ ମହାତ୍ମନଃ ।
ନ୍ୟାସଭୂତଂ ତଦା ନ୍ୟସ୍ତମସ୍ମାକଂ ପୂର୍ଵ କେ ଵିଭୋ ॥ 12 ॥
ଅଥ ମେ କୃଷତଃ କ୍ଷେତ୍ରଂ ଲାଂଗୂଲାଦୁତ୍ଥିତା ମୟା ।
କ୍ଷେତ୍ରଂ ଶୋଧୟତା ଲବ୍ଧା ନାମ୍ନା ସୀତେତି ଵିଶ୍ରୁତା ॥ 13 ॥
ଭୂତଲାଦୁତ୍ଥିତା ସା ତୁ ଵ୍ୟଵର୍ଧତ ମମାତ୍ମଜା ।
ଵୀର୍ୟଶୁଲ୍କେତି ମେ କନ୍ୟା ସ୍ଥାପିତେୟମୟୋନିଜା ॥ 14 ॥
ଭୂତଲାଦୁତ୍ଥିତାଂ ତାଂ ତୁ ଵର୍ଧମାନାଂ ମମାତ୍ମଜାମ୍ ।
ଵରୟାମାସୁରାଗମ୍ୟ ରାଜାନୋ ମୁନିପୁଂଗଵ ॥ 15 ॥
ତେଷାଂ ଵରୟତାଂ କନ୍ୟାଂ ସର୍ଵେଷାଂ ପୃଥିଵୀକ୍ଷିତାମ୍ ।
ଵୀର୍ୟଶୁଲ୍କେତି ଭଗଵନ୍ ନ ଦଦାମି ସୁତାମହମ୍ ॥ 16 ॥
ତତସ୍ସର୍ଵେ ନୃପତୟ ସ୍ସମେତ୍ୟ ମୁନିପୁଂଗଵ ।
ମିଥିଲାମଭ୍ୟୁପାଗମ୍ୟ ଵୀର୍ୟଜିଜ୍ଞାସଵସ୍ତଦା ॥ 17 ॥
ତେଷାଂ ଜିଜ୍ଞାସମାନାନାଂ ଵୀର୍ୟଂ ଧନୁରୁପାହୃତମ୍ ।
ନ ଶେକୁର୍ଗ୍ରହଣେ ତସ୍ୟ ଧନୁଷସ୍ତୋଲନେଽପି ଵା ॥ 18 ॥
ତେଷାଂ ଵୀର୍ୟଵତାଂ ଵୀର୍ୟମଲ୍ପଂ ଜ୍ଞାତ୍ଵା ମହାମୁନେ ।
ପ୍ରତ୍ୟାଖ୍ୟାତା ନୃପତୟସ୍ତନ୍ନିବୋଧ ତପୋଧନ ॥ 19 ॥
ତତଃ ପରମକୋପେନ ରାଜାନୋ ନୃପପୁଂଗଵ ।
ନ୍ୟରୁଂଧନ୍ମିଥିଲାଂ ସର୍ଵେ ଵୀର୍ୟସଂଦେହମାଗତାଃ ॥ 20 ॥
ଆତ୍ମାନମଵଧୂତଂ ତେ ଵିଜ୍ଞାୟ ନୃପପୁଂଗଵାଃ ।
ରୋଷେଣ ମହତାଽଽଵିଷ୍ଟାଃ ପୀଡୟନ୍ମିଥିଲାଂ ପୁରୀମ୍ ॥ 21 ॥
ତତସ୍ସଂଵତ୍ସରେ ପୂର୍ଣେ କ୍ଷୟଂ ୟାତାନି ସର୍ଵଶଃ ।
ସାଧନାନି ମୁନିଶ୍ରେଷ୍ଠ ତତୋଽହଂ ଭୃଶଦୁଃଖିତଃ ॥ 22 ॥
ତତୋ ଦେଵଗଣାନ୍ ସର୍ଵାନ୍ ତପସାଽହଂ ପ୍ରସାଦୟମ୍ ।
ଦଦୁଶ୍ଚ ପରମପ୍ରୀତା ଶ୍ଚତୁରଂଗବଲଂ ସୁରାଃ ॥ 23 ॥
ତତୋ ଭଗ୍ନା ନୃପତୟୋ ହନ୍ୟମାନା ଦିଶୋ ୟୟୁଃ ।
ଅଵୀର୍ୟା ଵୀର୍ୟସଂଦିଗ୍ଧା ସ୍ସାମାତ୍ୟାଃ ପାପକର୍ମଣଃ ॥ 24 ॥
ତଦେତନ୍ମୁନିଶାର୍ଦୂଲ ଧନୁଃ ପରମଭାସ୍ଵରମ୍ ।
ରାମଲକ୍ଷ୍ମଣୟୋଶ୍ଚାପି ଦର୍ଶୟିଷ୍ୟାମି ସୁଵ୍ରତ ॥ 25 ॥
ୟଦ୍ୟସ୍ୟ ଧନୁଷୋ ରାମଃ କୁର୍ୟାଦାରୋପଣଂ ମୁନେ ।
ସୁତାମୟୋନିଜାଂ ସୀତାଂ ଦଦ୍ୟାଂ ଦାଶରଥେରହମ୍ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଟ୍ଷଷ୍ଟିତମସ୍ସର୍ଗଃ ॥
