শ্রীমদ্বাল্মীকীয় রামাযণে বালকাংডম্ ।
অথ ষট্ষষ্টিতমস্সর্গঃ ।
ততঃ প্রভাতে বিমলে কৃতকর্মা নরাধিপঃ ।
বিশ্বামিত্রং মহাত্মানং আজুহাব সরাঘবম্ ॥ 1 ॥
তমর্চয়িত্বা ধর্মাত্মা শাস্ত্রদৃষ্টেন কর্মণা ।
রাঘবৌ চ মহাত্মানৌ তদা বাক্যমুবাচ হ ॥ 2 ॥
ভগবন্ স্বাগতং তেঽস্তু কিং করোমি তবানঘ ।
ভবানাজ্ঞাপযতু মামাজ্ঞাপ্য়ো ভবতা হ্যহম্ ॥ 3 ॥
এবমুক্তস্স ধর্মাত্মা জনকেন মহাত্মনা ।
প্রত্য়ুবাচ মুনির্বীরং বাক্য়ং বাক্যবিশারদঃ ॥ 4 ॥
পুত্রৌ দশরথস্য়েমৌ ক্ষত্রিয়ৌ লোকবিশ্রুতৌ ।
দ্রুষ্টুকামৌ ধনু শ্শ্রেষ্ঠং যদেতত্বয়ি তিষ্ঠতি ॥ 5 ॥
এতদ্দর্শয় ভদ্রং তে কৃতকামৌ নৃপাত্মজৌ ।
দর্শনাদস্য় ধনুষো যথেষ্টং প্রতিয়াস্যতঃ ॥ 6 ॥
এবমুক্তস্তু জনকঃ প্রত্য়ুবাচ মহামুনিম্ ।
শ্রূযতামস্য় ধনুষো যদর্থমিহ তিষ্ঠতি ॥ 7 ॥
দেবরাত ইতি খ্য়াতো নিমেষ্ষষ্ঠো মহীপতিঃ ।
ন্য়াসোঽয়ং তস্য় ভগবন্ হস্তে দত্তো মহাত্মনা ॥ 8 ॥
দক্ষযজ্ঞবধে পূর্বং ধনুরাযম্য় বীর্যবান্ ।
রুদ্রস্তু ত্রিদশান্ রোষাত্সলীলমিদমব্রবীত্ ॥ 9 ॥
যস্মাদ্ভাগার্থিনো ভাগান্নাকল্পযত মে সুরাঃ ।
বরাংগাণি মহার্হাণি ধনুষা শাতয়ামি বঃ ॥ 10 ॥
ততো বিমনসস্সর্বে দেবা বৈ মুনিপুংগব ।
প্রসাদয়ংতি দেবেশং তেষাং প্রীতোঽভবদ্ভবঃ ॥ 11 ॥
প্রীতিয়ুক্তস্স সর্বেষাং দদৌ তেষাং মহাত্মনাম্ ।
তদেতদ্দেবদেবস্য় ধনূরত্নং মহাত্মনঃ ।
ন্য়াসভূতং তদা ন্যস্তমস্মাকং পূর্ব কে বিভো ॥ 12 ॥
অথ মে কৃষতঃ ক্ষেত্রং লাংগূলাদুত্থিতা ময়া ।
ক্ষেত্রং শোধযতা লব্ধা নাম্না সীতেতি বিশ্রুতা ॥ 13 ॥
ভূতলাদুত্থিতা সা তু ব্যবর্ধত মমাত্মজা ।
বীর্যশুল্কেতি মে কন্য়া স্থাপিতেযময়োনিজা ॥ 14 ॥
ভূতলাদুত্থিতাং তাং তু বর্ধমানাং মমাত্মজাম্ ।
বরয়ামাসুরাগম্য় রাজানো মুনিপুংগব ॥ 15 ॥
তেষাং বরযতাং কন্য়াং সর্বেষাং পৃথিবীক্ষিতাম্ ।
বীর্যশুল্কেতি ভগবন্ ন দদামি সুতামহম্ ॥ 16 ॥
ততস্সর্বে নৃপতয় স্সমেত্য় মুনিপুংগব ।
মিথিলামভ্য়ুপাগম্য় বীর্যজিজ্ঞাসবস্তদা ॥ 17 ॥
তেষাং জিজ্ঞাসমানানাং বীর্য়ং ধনুরুপাহৃতম্ ।
ন শেকুর্গ্রহণে তস্য় ধনুষস্তোলনেঽপি বা ॥ 18 ॥
তেষাং বীর্যবতাং বীর্যমল্পং জ্ঞাত্বা মহামুনে ।
প্রত্য়াখ্য়াতা নৃপতযস্তন্নিবোধ তপোধন ॥ 19 ॥
ততঃ পরমকোপেন রাজানো নৃপপুংগব ।
ন্যরুংধন্মিথিলাং সর্বে বীর্যসংদেহমাগতাঃ ॥ 20 ॥
আত্মানমবধূতং তে বিজ্ঞায় নৃপপুংগবাঃ ।
রোষেণ মহতাঽঽবিষ্টাঃ পীডযন্মিথিলাং পুরীম্ ॥ 21 ॥
ততস্সংবত্সরে পূর্ণে ক্ষয়ং যাতানি সর্বশঃ ।
সাধনানি মুনিশ্রেষ্ঠ ততোঽহং ভৃশদুঃখিতঃ ॥ 22 ॥
ততো দেবগণান্ সর্বান্ তপসাঽহং প্রসাদযম্ ।
দদুশ্চ পরমপ্রীতা শ্চতুরংগবলং সুরাঃ ॥ 23 ॥
ততো ভগ্না নৃপতয়ো হন্যমানা দিশো যয়ুঃ ।
অবীর্য়া বীর্যসংদিগ্ধা স্সামাত্য়াঃ পাপকর্মণঃ ॥ 24 ॥
তদেতন্মুনিশার্দূল ধনুঃ পরমভাস্বরম্ ।
রামলক্ষ্মণয়োশ্চাপি দর্শয়িষ্য়ামি সুব্রত ॥ 25 ॥
যদ্যস্য় ধনুষো রামঃ কুর্য়াদারোপণং মুনে ।
সুতাময়োনিজাং সীতাং দদ্য়াং দাশরথেরহম্ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে ষট্ষষ্টিতমস্সর্গঃ ॥
