ஶ்ரீமத்³வால்மீகீய ராமாயணே பா³லகாண்ட³ம் ।
அத² ஷட்ஷஷ்டிதமஸ்ஸர்க:³ ।
தத: ப்ரபா⁴தே விமலே க்ருதகர்மா நராதி⁴ப: ।
விஶ்வாமித்ரம் மஹாத்மானம் ஆஜுஹாவ ஸராக⁴வம் ॥ 1 ॥
தமர்சயித்வா த⁴ர்மாத்மா ஶாஸ்த்ரத்³ருஷ்டேன கர்மணா ।
ராக⁴வௌ ச மஹாத்மானௌ ததா³ வாக்யமுவாச ஹ ॥ 2 ॥
ப⁴க³வன் ஸ்வாக³தம் தேஸ்து கிம் கரோமி தவானக⁴ ।
ப⁴வானாஜ்ஞாபயது மாமாஜ்ஞாப்யோ ப⁴வதா ஹ்யஹம் ॥ 3 ॥
ஏவமுக்தஸ்ஸ த⁴ர்மாத்மா ஜனகேன மஹாத்மனா ।
ப்ரத்யுவாச முனிர்வீரம் வாக்யம் வாக்யவிஶாரத:³ ॥ 4 ॥
புத்ரௌ த³ஶரத²ஸ்யேமௌ க்ஷத்ரியௌ லோகவிஶ்ருதௌ ।
த்³ருஷ்டுகாமௌ த⁴னு ஶ்ஶ்ரேஷ்ட²ம் யதே³தத்வயி திஷ்ட²தி ॥ 5 ॥
ஏதத்³த³ர்ஶய ப⁴த்³ரம் தே க்ருதகாமௌ ந்ருபாத்மஜௌ ।
த³ர்ஶனாத³ஸ்ய த⁴னுஷோ யதே²ஷ்டம் ப்ரதியாஸ்யத: ॥ 6 ॥
ஏவமுக்தஸ்து ஜனக: ப்ரத்யுவாச மஹாமுனிம் ।
ஶ்ரூயதாமஸ்ய த⁴னுஷோ யத³ர்த²மிஹ திஷ்ட²தி ॥ 7 ॥
தே³வராத இதி க்²யாதோ நிமேஷ்ஷஷ்டோ² மஹீபதி: ।
ந்யாஸோயம் தஸ்ய ப⁴க³வன் ஹஸ்தே த³த்தோ மஹாத்மனா ॥ 8 ॥
த³க்ஷயஜ்ஞவதே⁴ பூர்வம் த⁴னுராயம்ய வீர்யவான் ।
ருத்³ரஸ்து த்ரித³ஶான் ரோஷாத்ஸலீலமித³மப்³ரவீத் ॥ 9 ॥
யஸ்மாத்³பா⁴கா³ர்தி²னோ பா⁴கா³ன்னாகல்பயத மே ஸுரா: ।
வராங்கா³ணி மஹார்ஹாணி த⁴னுஷா ஶாதயாமி வ: ॥ 1௦ ॥
ததோ விமனஸஸ்ஸர்வே தே³வா வை முனிபுங்க³வ ।
ப்ரஸாத³யந்தி தே³வேஶம் தேஷாம் ப்ரீதோப⁴வத்³ப⁴வ: ॥ 11 ॥
ப்ரீதியுக்தஸ்ஸ ஸர்வேஷாம் த³தௌ³ தேஷாம் மஹாத்மனாம் ।
ததே³தத்³தே³வதே³வஸ்ய த⁴னூரத்னம் மஹாத்மன: ।
ந்யாஸபூ⁴தம் ததா³ ந்யஸ்தமஸ்மாகம் பூர்வ கே விபோ⁴ ॥ 12 ॥
அத² மே க்ருஷத: க்ஷேத்ரம் லாங்கூ³லாது³த்தி²தா மயா ।
க்ஷேத்ரம் ஶோத⁴யதா லப்³தா⁴ நாம்னா ஸீதேதி விஶ்ருதா ॥ 13 ॥
பூ⁴தலாது³த்தி²தா ஸா து வ்யவர்த⁴த மமாத்மஜா ।
வீர்யஶுல்கேதி மே கன்யா ஸ்தா²பிதேயமயோனிஜா ॥ 14 ॥
பூ⁴தலாது³த்தி²தாம் தாம் து வர்த⁴மானாம் மமாத்மஜாம் ।
வரயாமாஸுராக³ம்ய ராஜானோ முனிபுங்க³வ ॥ 15 ॥
தேஷாம் வரயதாம் கன்யாம் ஸர்வேஷாம் ப்ருதி²வீக்ஷிதாம் ।
வீர்யஶுல்கேதி ப⁴க³வன் ந த³தா³மி ஸுதாமஹம் ॥ 16 ॥
ததஸ்ஸர்வே ந்ருபதய ஸ்ஸமேத்ய முனிபுங்க³வ ।
மிதி²லாமப்⁴யுபாக³ம்ய வீர்யஜிஜ்ஞாஸவஸ்ததா³ ॥ 17 ॥
தேஷாம் ஜிஜ்ஞாஸமானானாம் வீர்யம் த⁴னுருபாஹ்ருதம் ।
ந ஶேகுர்க்³ரஹணே தஸ்ய த⁴னுஷஸ்தோலனேபி வா ॥ 18 ॥
தேஷாம் வீர்யவதாம் வீர்யமல்பம் ஜ்ஞாத்வா மஹாமுனே ।
ப்ரத்யாக்²யாதா ந்ருபதயஸ்தன்னிபோ³த⁴ தபோத⁴ன ॥ 19 ॥
தத: பரமகோபேன ராஜானோ ந்ருபபுங்க³வ ।
ந்யருந்த⁴ன்மிதி²லாம் ஸர்வே வீர்யஸந்தே³ஹமாக³தா: ॥ 2௦ ॥
ஆத்மானமவதூ⁴தம் தே விஜ்ஞாய ந்ருபபுங்க³வா: ।
ரோஷேண மஹதாவிஷ்டா: பீட³யன்மிதி²லாம் புரீம் ॥ 21 ॥
ததஸ்ஸம்வத்ஸரே பூர்ணே க்ஷயம் யாதானி ஸர்வஶ: ।
ஸாத⁴னானி முனிஶ்ரேஷ்ட² ததோஹம் ப்⁴ருஶது³:கி²த: ॥ 22 ॥
ததோ தே³வக³ணான் ஸர்வான் தபஸாஹம் ப்ரஸாத³யம் ।
த³து³ஶ்ச பரமப்ரீதா ஶ்சதுரங்க³ப³லம் ஸுரா: ॥ 23 ॥
ததோ ப⁴க்³னா ந்ருபதயோ ஹன்யமானா தி³ஶோ யயு: ।
அவீர்யா வீர்யஸந்தி³க்³தா⁴ ஸ்ஸாமாத்யா: பாபகர்மண: ॥ 24 ॥
ததே³தன்முனிஶார்தூ³ல த⁴னு: பரமபா⁴ஸ்வரம் ।
ராமலக்ஷ்மணயோஶ்சாபி த³ர்ஶயிஷ்யாமி ஸுவ்ரத ॥ 25 ॥
யத்³யஸ்ய த⁴னுஷோ ராம: குர்யாதா³ரோபணம் முனே ।
ஸுதாமயோனிஜாம் ஸீதாம் த³த்³யாம் தா³ஶரதே²ரஹம் ॥ 26 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே பா³லகாண்டே³ ஷட்ஷஷ்டிதமஸ்ஸர்க:³ ॥
