śrīmadvālmīkīya rāmāyaṇē bālakāṇḍam ।
atha ṣaṭṣaṣṭitamassargaḥ ।
tataḥ prabhātē vimalē kṛtakarmā narādhipaḥ ।
viśvāmitraṃ mahātmānaṃ ājuhāva sarāghavam ॥ 1 ॥
tamarchayitvā dharmātmā śāstradṛṣṭēna karmaṇā ।
rāghavau cha mahātmānau tadā vākyamuvācha ha ॥ 2 ॥
bhagavan svāgataṃ tē'stu kiṃ karōmi tavānagha ।
bhavānājñāpayatu māmājñāpyō bhavatā hyaham ॥ 3 ॥
ēvamuktassa dharmātmā janakēna mahātmanā ।
pratyuvācha munirvīraṃ vākyaṃ vākyaviśāradaḥ ॥ 4 ॥
putrau daśarathasyēmau kṣatriyau lōkaviśrutau ।
druṣṭukāmau dhanu śśrēṣṭhaṃ yadētatvayi tiṣṭhati ॥ 5 ॥
ētaddarśaya bhadraṃ tē kṛtakāmau nṛpātmajau ।
darśanādasya dhanuṣō yathēṣṭaṃ pratiyāsyataḥ ॥ 6 ॥
ēvamuktastu janakaḥ pratyuvācha mahāmunim ।
śrūyatāmasya dhanuṣō yadarthamiha tiṣṭhati ॥ 7 ॥
dēvarāta iti khyātō nimēṣṣaṣṭhō mahīpatiḥ ।
nyāsō'yaṃ tasya bhagavan hastē dattō mahātmanā ॥ 8 ॥
dakṣayajñavadhē pūrvaṃ dhanurāyamya vīryavān ।
rudrastu tridaśān rōṣātsalīlamidamabravīt ॥ 9 ॥
yasmādbhāgārthinō bhāgānnākalpayata mē surāḥ ।
varāṅgāṇi mahārhāṇi dhanuṣā śātayāmi vaḥ ॥ 10 ॥
tatō vimanasassarvē dēvā vai munipuṅgava ।
prasādayanti dēvēśaṃ tēṣāṃ prītō'bhavadbhavaḥ ॥ 11 ॥
prītiyuktassa sarvēṣāṃ dadau tēṣāṃ mahātmanām ।
tadētaddēvadēvasya dhanūratnaṃ mahātmanaḥ ।
nyāsabhūtaṃ tadā nyastamasmākaṃ pūrva kē vibhō ॥ 12 ॥
atha mē kṛṣataḥ kṣētraṃ lāṅgūlādutthitā mayā ।
kṣētraṃ śōdhayatā labdhā nāmnā sītēti viśrutā ॥ 13 ॥
bhūtalādutthitā sā tu vyavardhata mamātmajā ।
vīryaśulkēti mē kanyā sthāpitēyamayōnijā ॥ 14 ॥
bhūtalādutthitāṃ tāṃ tu vardhamānāṃ mamātmajām ।
varayāmāsurāgamya rājānō munipuṅgava ॥ 15 ॥
tēṣāṃ varayatāṃ kanyāṃ sarvēṣāṃ pṛthivīkṣitām ।
vīryaśulkēti bhagavan na dadāmi sutāmaham ॥ 16 ॥
tatassarvē nṛpataya ssamētya munipuṅgava ।
mithilāmabhyupāgamya vīryajijñāsavastadā ॥ 17 ॥
tēṣāṃ jijñāsamānānāṃ vīryaṃ dhanurupāhṛtam ।
na śēkurgrahaṇē tasya dhanuṣastōlanē'pi vā ॥ 18 ॥
tēṣāṃ vīryavatāṃ vīryamalpaṃ jñātvā mahāmunē ।
pratyākhyātā nṛpatayastannibōdha tapōdhana ॥ 19 ॥
tataḥ paramakōpēna rājānō nṛpapuṅgava ।
nyarundhanmithilāṃ sarvē vīryasandēhamāgatāḥ ॥ 20 ॥
ātmānamavadhūtaṃ tē vijñāya nṛpapuṅgavāḥ ।
rōṣēṇa mahatā''viṣṭāḥ pīḍayanmithilāṃ purīm ॥ 21 ॥
tatassaṃvatsarē pūrṇē kṣayaṃ yātāni sarvaśaḥ ।
sādhanāni muniśrēṣṭha tatō'haṃ bhṛśaduḥkhitaḥ ॥ 22 ॥
tatō dēvagaṇān sarvān tapasā'haṃ prasādayam ।
daduścha paramaprītā śchaturaṅgabalaṃ surāḥ ॥ 23 ॥
tatō bhagnā nṛpatayō hanyamānā diśō yayuḥ ।
avīryā vīryasandigdhā ssāmātyāḥ pāpakarmaṇaḥ ॥ 24 ॥
tadētanmuniśārdūla dhanuḥ paramabhāsvaram ।
rāmalakṣmaṇayōśchāpi darśayiṣyāmi suvrata ॥ 25 ॥
yadyasya dhanuṣō rāmaḥ kuryādārōpaṇaṃ munē ।
sutāmayōnijāṃ sītāṃ dadyāṃ dāśarathēraham ॥ 26 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṭṣaṣṭitamassargaḥ ॥
