ശ്രീമദ്വാല്മീകീയ രാമായണേ ബാലകാംഡമ് ।
അഥ ചതുസ്ത്രിംശസ്സര്ഗഃ ।
കൃതോദ്വാഹേ ഗതേ തസ്മിന് ബ്രഹ്മദത്തേ ച രാഘവ ।
അപുത്രഃ പുത്രലാഭായ പൌത്രീമിഷ്ടിമകല്പയത് ॥ 1 ॥
ഇഷ്ട്യാം തു വര്തമാനായാം കുശനാഭം മഹീപതിമ് ।
ഉവാച പരമോദാരഃ കുശോ ബ്രഹ്മസുതസ്തദാ ॥ 2 ॥
പുത്രസ്തേ സദൃശഃ പുത്ര ഭവിഷ്യതി സുധാര്മികഃ ।
ഗാധിം പ്രാപ്സ്യസി തേന ത്വം കീര്തിം ലോകേ ച ശാശ്വതീമ് ॥ 3 ॥
ഏവമുക്ത്വാ കുശോ രാമ കുശനാഭം മഹീപതിമ് ।
ജഗാമാകാശമാവിശ്യ ബ്രഹ്മലോകം സനാതനാമ് ॥ 4 ॥
കസ്യ ചിത്ത്വഥ കാലസ്യ കുശനാഭസ്യ ധീമതഃ ।
ജജ്ഞേ പരമധര്മിഷ്ഠോ ഗാധിരിത്യേവ നാമതഃ ॥ 5 ॥
സ പിതാ മമ കാകുത്സ്ഥ ഗാധിഃ പരമധാര്മികഃ ।
കുശവംശപ്രസൂതോഽസ്മി കൌശികോ രഘുനംദന ॥ 6 ॥
പൂർവജാ ഭഗിനീ ചാപി മമ രാഘവ സുവ്രതാ ।
നാമ്നാ സത്യവതീ നാമ ഋചീകേ പ്രതിപാദിതാ ॥ 7 ॥
സശരീരാ ഗതാ സ്വര്ഗം ഭര്താരമനുവര്തിനീ ।
കൌശികീ പരമോദാരാ പ്രവൃത്താ ച മഹാനദീ ॥ 8 ॥
ദിവ്യാ പുണ്യോദകാ രമ്യാ ഹിമവംതമുപാശ്രിതാ ।
ലോകസ്യ ഹിതകാമാര്ഥം പ്രവൃത്താ ഭഗിനീ മമ ॥ 9 ॥
തതോഽഹം ഹിമവത്പാര്ശ്വേ വസാമി നിരതസ്സുഖമ് ।
ഭഗിന്യാം സ്നേഹസംയുക്തഃ കൌശിക്യാം രഘുനംദന ॥ 10 ॥
സാ തു സത്യവതീ പുണ്യാ സത്യേ ധര്മേ പ്രതിഷ്ഠിതാ ।
പതിവ്രതാ മഹാഭാഗാ കൌശികീ സരിതാം വരാ ॥ 11 ॥
അഹം ഹി നിയമാദ്രാമ ഹിത്വാ താം സമുപാഗതഃ ।
സിദ്ധാശ്രമമനുപ്രാപ്യ സിദ്ധോഽസ്മി തവ തേജസാ ॥ 12 ॥
ഏഷാ രാമ മമോത്പത്തിസ്സ്വസ്യ വംശസ്യ കീര്തിതാ ।
ദേശസ്യ ച മഹാബാഹോ യന്മാം ത്വം പരിപൃച്ഛസി ॥ 13 ॥
ഗതോഽര്ധരാത്രഃ കാകുത്സ്ഥ കഥാഃ കഥയതോ മമ ।
നിദ്രാമഭ്യേഹി ഭദ്രം തേ മാ ഭൂദ്വിഘ്നോഽധ്വനീഹ നഃ ॥ 14 ॥
നിഷ്പംദാസ്തരവസ്സർവേ നിലീനമൃഗപക്ഷിണഃ ।
നൈശേന തമസാ വ്യാപ്താ ദിശശ്ച രഘുനംദന ॥ 15 ॥
ശനൈർവിയുജ്യതേ സംധ്യാ നഭോ നേത്രൈരിവാവൃതമ് ।
നക്ഷത്രതാരാഗഹനം ജ്യോതിര്ഭിരിവ ഭാസതേ ॥ 16 ॥
ഉത്തിഷ്ഠതി ച ശീതാംശുശ്ശശീ ലോകതമോനുദഃ ।
ഹ്ലാദയന് പ്രാണിനാം ലോകേ മനാംസി പ്രഭയാ വിഭോ ॥ 17 ॥
നൈശാനി സർവഭൂതാനി പ്രചരംതി തതസ്തതഃ ।
യക്ഷരാക്ഷസസംഘാശ്ച രൌദ്രാശ്ച പിശിതാശനാഃ ॥ 18 ॥
ഏവമുക്ത്വാ മഹാതേജാ വിരരാമ മഹാമുനിഃ ।
സാധു സാധ്വിതി തം സർവേ ഋഷയോ ഹ്യഭ്യപൂജയന് ॥ 19 ॥
കുശികാനാമയം വംശോ മഹാന് ധര്മപരസ്സദാ ।
ബ്രഹ്മോപമാ മഹാത്മാനഃ കുശവംശ്യാ നരോത്തമാഃ ॥ 20 ॥
വിശേഷേണ ഭവാനേവ വിശ്വാമിത്രോ മഹായശാഃ ।
കൌശികീ സരിതാം ശ്രേഷ്ഠാ കുലോദ്യോതകരീ തവ ॥ 21 ॥
ഇതി തൈര്മുനിശാര്ദൂലൈഃ പ്രശസ്തഃ കുശികാത്മജഃ ।
നിദ്രാമുപാഗമച്ഛ്രീമാന് അസ്തംഗത ഇവാംശുമാന് ॥ 22 ॥
രാമോഽപി സഹസൌമിത്രിഃ കിംചിദാഗതവിസ്മയഃ ।
പ്രശസ്യ മുനിശാര്ദൂലം നിദ്രാം സമുപസേവതേ ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ചതുസ്ത്രിംശസ്സര്ഗഃ ॥
