śrīmadvālmīkīya rāmāyaṇē bālakāṇḍam ।
atha chatustriṃśassargaḥ ।
kṛtōdvāhē gatē tasmin brahmadattē cha rāghava ।
aputraḥ putralābhāya pautrīmiṣṭimakalpayat ॥ 1 ॥
iṣṭyāṃ tu vartamānāyāṃ kuśanābhaṃ mahīpatim ।
uvācha paramōdāraḥ kuśō brahmasutastadā ॥ 2 ॥
putrastē sadṛśaḥ putra bhaviṣyati sudhārmikaḥ ।
gādhiṃ prāpsyasi tēna tvaṃ kīrtiṃ lōkē cha śāśvatīm ॥ 3 ॥
ēvamuktvā kuśō rāma kuśanābhaṃ mahīpatim ।
jagāmākāśamāviśya brahmalōkaṃ sanātanām ॥ 4 ॥
kasya chittvatha kālasya kuśanābhasya dhīmataḥ ।
jajñē paramadharmiṣṭhō gādhirityēva nāmataḥ ॥ 5 ॥
sa pitā mama kākutstha gādhiḥ paramadhārmikaḥ ।
kuśavaṃśaprasūtō'smi kauśikō raghunandana ॥ 6 ॥
pūrvajā bhaginī chāpi mama rāghava suvratā ।
nāmnā satyavatī nāma ṛchīkē pratipāditā ॥ 7 ॥
saśarīrā gatā svargaṃ bhartāramanuvartinī ।
kauśikī paramōdārā pravṛttā cha mahānadī ॥ 8 ॥
divyā puṇyōdakā ramyā himavantamupāśritā ।
lōkasya hitakāmārthaṃ pravṛttā bhaginī mama ॥ 9 ॥
tatō'haṃ himavatpārśvē vasāmi niratassukham ।
bhaginyāṃ snēhasaṃyuktaḥ kauśikyāṃ raghunandana ॥ 10 ॥
sā tu satyavatī puṇyā satyē dharmē pratiṣṭhitā ।
pativratā mahābhāgā kauśikī saritāṃ varā ॥ 11 ॥
ahaṃ hi niyamādrāma hitvā tāṃ samupāgataḥ ।
siddhāśramamanuprāpya siddhō'smi tava tējasā ॥ 12 ॥
ēṣā rāma mamōtpattissvasya vaṃśasya kīrtitā ।
dēśasya cha mahābāhō yanmāṃ tvaṃ paripṛchChasi ॥ 13 ॥
gatō'rdharātraḥ kākutstha kathāḥ kathayatō mama ।
nidrāmabhyēhi bhadraṃ tē mā bhūdvighnō'dhvanīha naḥ ॥ 14 ॥
niṣpandāstaravassarvē nilīnamṛgapakṣiṇaḥ ।
naiśēna tamasā vyāptā diśaścha raghunandana ॥ 15 ॥
śanairviyujyatē sandhyā nabhō nētrairivāvṛtam ।
nakṣatratārāgahanaṃ jyōtirbhiriva bhāsatē ॥ 16 ॥
uttiṣṭhati cha śītāṃśuśśaśī lōkatamōnudaḥ ।
hlādayan prāṇināṃ lōkē manāṃsi prabhayā vibhō ॥ 17 ॥
naiśāni sarvabhūtāni pracharanti tatastataḥ ।
yakṣarākṣasasaṅghāścha raudrāścha piśitāśanāḥ ॥ 18 ॥
ēvamuktvā mahātējā virarāma mahāmuniḥ ।
sādhu sādhviti taṃ sarvē ṛṣayō hyabhyapūjayan ॥ 19 ॥
kuśikānāmayaṃ vaṃśō mahān dharmaparassadā ।
brahmōpamā mahātmānaḥ kuśavaṃśyā narōttamāḥ ॥ 20 ॥
viśēṣēṇa bhavānēva viśvāmitrō mahāyaśāḥ ।
kauśikī saritāṃ śrēṣṭhā kulōdyōtakarī tava ॥ 21 ॥
iti tairmuniśārdūlaiḥ praśastaḥ kuśikātmajaḥ ।
nidrāmupāgamachChrīmān astaṅgata ivāṃśumān ॥ 22 ॥
rāmō'pi sahasaumitriḥ kiñchidāgatavismayaḥ ।
praśasya muniśārdūlaṃ nidrāṃ samupasēvatē ॥ 23 ॥
ityārṣē śrīmadrāmāyaṇē vālmīkīya ādikāvyē bālakāṇḍē chatustriṃśassargaḥ ॥
