শ্রীমদ্বাল্মীকীয় রামাযণে বালকাংডম্ ।
অথ চতুস্ত্রিংশস্সর্গঃ ।
কৃতোদ্বাহে গতে তস্মিন্ ব্রহ্মদত্তে চ রাঘব ।
অপুত্রঃ পুত্রলাভায় পৌত্রীমিষ্টিমকল্পযত্ ॥ 1 ॥
ইষ্ট্য়াং তু বর্তমানায়াং কুশনাভং মহীপতিম্ ।
উবাচ পরমোদারঃ কুশো ব্রহ্মসুতস্তদা ॥ 2 ॥
পুত্রস্তে সদৃশঃ পুত্র ভবিষ্যতি সুধার্মিকঃ ।
গাধিং প্রাপ্স্যসি তেন ত্বং কীর্তিং লোকে চ শাশ্বতীম্ ॥ 3 ॥
এবমুক্ত্বা কুশো রাম কুশনাভং মহীপতিম্ ।
জগামাকাশমাবিশ্য় ব্রহ্মলোকং সনাতনাম্ ॥ 4 ॥
কস্য় চিত্ত্বথ কালস্য় কুশনাভস্য় ধীমতঃ ।
জজ্ঞে পরমধর্মিষ্ঠো গাধিরিত্য়েব নামতঃ ॥ 5 ॥
স পিতা মম কাকুত্স্থ গাধিঃ পরমধার্মিকঃ ।
কুশবংশপ্রসূতোঽস্মি কৌশিকো রঘুনংদন ॥ 6 ॥
পূর্বজা ভগিনী চাপি মম রাঘব সুব্রতা ।
নাম্না সত্যবতী নাম ঋচীকে প্রতিপাদিতা ॥ 7 ॥
সশরীরা গতা স্বর্গং ভর্তারমনুবর্তিনী ।
কৌশিকী পরমোদারা প্রবৃত্তা চ মহানদী ॥ 8 ॥
দিব্য়া পুণ্য়োদকা রম্য়া হিমবংতমুপাশ্রিতা ।
লোকস্য় হিতকামার্থং প্রবৃত্তা ভগিনী মম ॥ 9 ॥
ততোঽহং হিমবত্পার্শ্বে বসামি নিরতস্সুখম্ ।
ভগিন্য়াং স্নেহসংয়ুক্তঃ কৌশিক্য়াং রঘুনংদন ॥ 10 ॥
সা তু সত্যবতী পুণ্য়া সত্য়ে ধর্মে প্রতিষ্ঠিতা ।
পতিব্রতা মহাভাগা কৌশিকী সরিতাং বরা ॥ 11 ॥
অহং হি নিযমাদ্রাম হিত্বা তাং সমুপাগতঃ ।
সিদ্ধাশ্রমমনুপ্রাপ্য় সিদ্ধোঽস্মি তব তেজসা ॥ 12 ॥
এষা রাম মমোত্পত্তিস্স্বস্য় বংশস্য় কীর্তিতা ।
দেশস্য় চ মহাবাহো যন্মাং ত্বং পরিপৃচ্ছসি ॥ 13 ॥
গতোঽর্ধরাত্রঃ কাকুত্স্থ কথাঃ কথযতো মম ।
নিদ্রামভ্য়েহি ভদ্রং তে মা ভূদ্বিঘ্নোঽধ্বনীহ নঃ ॥ 14 ॥
নিষ্পংদাস্তরবস্সর্বে নিলীনমৃগপক্ষিণঃ ।
নৈশেন তমসা ব্য়াপ্তা দিশশ্চ রঘুনংদন ॥ 15 ॥
শনৈর্বিয়ুজ্যতে সংধ্য়া নভো নেত্রৈরিবাবৃতম্ ।
নক্ষত্রতারাগহনং জ্য়োতির্ভিরিব ভাসতে ॥ 16 ॥
উত্তিষ্ঠতি চ শীতাংশুশ্শশী লোকতমোনুদঃ ।
হ্লাদযন্ প্রাণিনাং লোকে মনাংসি প্রভয়া বিভো ॥ 17 ॥
নৈশানি সর্বভূতানি প্রচরংতি ততস্ততঃ ।
যক্ষরাক্ষসসংঘাশ্চ রৌদ্রাশ্চ পিশিতাশনাঃ ॥ 18 ॥
এবমুক্ত্বা মহাতেজা বিররাম মহামুনিঃ ।
সাধু সাধ্বিতি তং সর্বে ঋষয়ো হ্যভ্যপূজযন্ ॥ 19 ॥
কুশিকানাময়ং বংশো মহান্ ধর্মপরস্সদা ।
ব্রহ্মোপমা মহাত্মানঃ কুশবংশ্য়া নরোত্তমাঃ ॥ 20 ॥
বিশেষেণ ভবানেব বিশ্বামিত্রো মহাযশাঃ ।
কৌশিকী সরিতাং শ্রেষ্ঠা কুলোদ্য়োতকরী তব ॥ 21 ॥
ইতি তৈর্মুনিশার্দূলৈঃ প্রশস্তঃ কুশিকাত্মজঃ ।
নিদ্রামুপাগমচ্ছ্রীমান্ অস্তংগত ইবাংশুমান্ ॥ 22 ॥
রামোঽপি সহসৌমিত্রিঃ কিংচিদাগতবিস্ময়ঃ ।
প্রশস্য় মুনিশার্দূলং নিদ্রাং সমুপসেবতে ॥ 23 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে চতুস্ত্রিংশস্সর্গঃ ॥
