ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തചത്വാരിംശസ്സര്ഗഃ ।
സപ്തധാതു കൃതേ ഗര്ഭേ ദിതിഃ പരമദുഃഖിതാ ।
സഹസ്രാക്ഷം ദുരാധര്ഷം വാക്യം സാനുനയാഽബ്രവീത് ॥ 1 ॥
മമാപരാധാദ്ഗര്ഭോഽയം സപ്തധാ വിഫലീകൃതഃ ।
നാപരാധോഽസ്തി ദേവേശ തവാത്ര ബലസൂദന ॥ 2 ॥
പ്രിയം തു കര്തുമിച്ഛാമി മമ ഗര്ഭവിപര്യയേ ।
മരുതാം സപ്തസപ്താനാം സ്ഥാനപാലാ ഭവംത്വിമേ ॥ 3 ॥
വാതസ്കംധാഃ ഇമേ സപ്ത ചരംതു ദിവി പുത്രക ।
മാരുതാ ഇതി വിഖ്യാതാ ദിവ്യരൂപാ മമാത്മജാഃ ॥ 4 ॥
ബ്രഹ്മലോകം ചരത്വേക ഇംദ്രലോകം തഥാഽപരഃ ।
ദിവി വായുരിതി ഖ്യാതസ്തൃതീയോഽപി മഹായശാഃ ॥ 5 ॥
ചത്വാരസ്തു സുരശ്രേഷ്ഠ ദിശോ വൈ തവ ശാസനാത് ।
സംചരിഷ്യംതു ഭദ്രം തേ ദേവഭൂതാ മമാത്മജാഃ ॥ 6 ॥
തസ്യാസ്തദ്വചനം ശ്രുത്വാ സഹസ്രാക്ഷഃ പുരംദരഃ ।
ഉവാച പ്രാംജലിർവാക്യം ദിതിം ബലനിഷൂദനഃ ॥ 7 ॥
സർവമേതദ്യഥോക്തം തേ ഭവിഷ്യതി ന സംശയഃ ।
വിചരിഷ്യംതി ഭദ്രം തേ ദേവഭൂതാസ്തവാത്മജാഃ ॥ 8 ॥
ഏവം തൌ നിശ്ചയം കൃത്വാ മാതാപുത്രൌ തപോവനേ ।
ജഗ്മതുസ്ത്രിദിവം രാമ കൃതാര്ഥാവിതി നശ്ശ്രുതമ് ॥ 9 ॥
ഏഷ ദേശസ്സ കാകുത്സ്ഥ മഹേംദ്രാധ്യുഷിതഃ പുരാ ।
ദിതിം യത്ര തപസ്സിദ്ധാമേവം പരിചചാര സഃ ॥ 10 ॥
ഇക്ഷ്വാകോഽസ്തു നരവ്യാഘ്ര പുത്രഃ പരമധാര്മികഃ ॥ 11 ॥
അലംബുഷായാമുത്പന്നോ വിശാല ഇതി വിശ്രുതഃ ।
തേന ചാസീദിഹ സ്ഥാനേ വിശാലേതി പുരീ കൃതാ ॥ 12 ॥
ഇക്ഷ്വാകോഽസ്തു നരവ്യാഘ്ര പുത്രഃ പരമധാര്മികഃ ॥ 13 ॥
അലംബുഷായാമുത്പന്നോ വിശാല ഇതി വിശ്രുതഃ ।
തേന ചാസീദിഹ സ്ഥാനേ വിശാലേതി പുരീ കൃതാ ॥ 14 ॥
വിശാലസ്യ സുതോ രാമ ഹേമചംദ്രോ മഹാബലഃ ।
സുചംദ്ര ഇതി വിഖ്യാതഃ ഹേമചംദ്രാദനംതരഃ ॥ 15 ॥
സുചംദ്രതനയോ രാമ ധൂമ്രാശ്വ ഇതി വിശ്രുതഃ ।
ധൂമ്രാശ്വതനയശ്ചാപി സംജയസ്സമപദ്യത ॥ 16 ॥
സംജയസ്യ സുതശ്ശ്രീമാന് സഹദേവഃ പ്രതാപവാന് ।
കുശാശ്വസ്സഹദേവസ്യ പുത്രഃ പരമധാര്മികഃ ॥ 17 ॥
കുശാശ്വസ്യ മഹാതേജാ സോമദത്തഃ പ്രതാപവാന് ।
സോമദത്തസ്യ പുത്രസ്തു കാകുത്സ്ഥ ഇതി വിശ്രുതഃ ॥ 18 ॥
തസ്യ പുത്രോ മഹാതേജാഃ സംപ്രത്യേഷ പുരീമിമാമ് ।
ആവസത്യമരപ്രഖ്യസ്സുമതിര്നാമ ദുര്ജയഃ ॥ 19 ॥
ഇക്ഷ്വാകോസ്തു പ്രസാദേന സർവേ വൈശാലികാ നൃപാഃ ।
ദീര്ഘായുഷോ മഹാത്മാനോ വീര്യവംതസ്സുധാര്മികാഃ ॥ 20 ॥
ഇഹാദ്യ രജനീം രാമ സുഖം വത്സ്യാമഹേ വയമ് ।
ശ്വഃ പ്രഭാതേ നരശ്രേഷ്ഠ ജനകം ദ്രഷ്ടുമര്ഹസി ॥ 21 ॥
സുമതിസ്തു മഹാതേജാ വിശ്വാമിത്രമുപാഗതമ് ।
ശ്രുത്വാ നരവരശ്രേഷ്ഠഃ പ്രത്യുദ്ഗച്ഛന്മഹായശാഃ ॥ 22 ॥
പൂജാം ച പരമാം കൃത്വാ സോപാധ്യായസ്സബാംധവഃ ।
പ്രാംജലിഃ കുശലം പൃഷ്ട്വാ വിശ്വാമിത്രമഥാബ്രവീത് ॥ 23 ॥
ധന്യോഽസ്മ്യനുഗൃഹീതോഽസ്മി യസ്യ മേ വിഷയം മുനിഃ ।
സംപ്രാപ്തോ ദര്ശനം ചൈവ നാസ്തി ധന്യതരോ മമ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തചത്വാരിംശസ്സര്ഗഃ ॥
