śrīmadvālmīkīya rāmāyaṇē bālakāṇḍam ।
atha saptachatvāriṃśassargaḥ ।
saptadhātu kṛtē garbhē ditiḥ paramaduḥkhitā ।
sahasrākṣaṃ durādharṣaṃ vākyaṃ sānunayā'bravīt ॥ 1 ॥
mamāparādhādgarbhō'yaṃ saptadhā viphalīkṛtaḥ ।
nāparādhō'sti dēvēśa tavātra balasūdana ॥ 2 ॥
priyaṃ tu kartumichChāmi mama garbhaviparyayē ।
marutāṃ saptasaptānāṃ sthānapālā bhavantvimē ॥ 3 ॥
vātaskandhāḥ imē sapta charantu divi putraka ।
mārutā iti vikhyātā divyarūpā mamātmajāḥ ॥ 4 ॥
brahmalōkaṃ charatvēka indralōkaṃ tathā'paraḥ ।
divi vāyuriti khyātastṛtīyō'pi mahāyaśāḥ ॥ 5 ॥
chatvārastu suraśrēṣṭha diśō vai tava śāsanāt ।
sañchariṣyantu bhadraṃ tē dēvabhūtā mamātmajāḥ ॥ 6 ॥
tasyāstadvachanaṃ śrutvā sahasrākṣaḥ purandaraḥ ।
uvācha prāñjalirvākyaṃ ditiṃ balaniṣūdanaḥ ॥ 7 ॥
sarvamētadyathōktaṃ tē bhaviṣyati na saṃśayaḥ ।
vichariṣyanti bhadraṃ tē dēvabhūtāstavātmajāḥ ॥ 8 ॥
ēvaṃ tau niśchayaṃ kṛtvā mātāputrau tapōvanē ।
jagmatustridivaṃ rāma kṛtārthāviti naśśrutam ॥ 9 ॥
ēṣa dēśassa kākutstha mahēndrādhyuṣitaḥ purā ।
ditiṃ yatra tapassiddhāmēvaṃ parichachāra saḥ ॥ 10 ॥
ikṣvākō'stu naravyāghra putraḥ paramadhārmikaḥ ॥ 11 ॥
alambuṣāyāmutpannō viśāla iti viśrutaḥ ।
tēna chāsīdiha sthānē viśālēti purī kṛtā ॥ 12 ॥
ikṣvākō'stu naravyāghra putraḥ paramadhārmikaḥ ॥ 13 ॥
alambuṣāyāmutpannō viśāla iti viśrutaḥ ।
tēna chāsīdiha sthānē viśālēti purī kṛtā ॥ 14 ॥
viśālasya sutō rāma hēmachandrō mahābalaḥ ।
suchandra iti vikhyātaḥ hēmachandrādanantaraḥ ॥ 15 ॥
suchandratanayō rāma dhūmrāśva iti viśrutaḥ ।
dhūmrāśvatanayaśchāpi sañjayassamapadyata ॥ 16 ॥
sañjayasya sutaśśrīmān sahadēvaḥ pratāpavān ।
kuśāśvassahadēvasya putraḥ paramadhārmikaḥ ॥ 17 ॥
kuśāśvasya mahātējā sōmadattaḥ pratāpavān ।
sōmadattasya putrastu kākutstha iti viśrutaḥ ॥ 18 ॥
tasya putrō mahātējāḥ sampratyēṣa purīmimām ।
āvasatyamaraprakhyassumatirnāma durjayaḥ ॥ 19 ॥
ikṣvākōstu prasādēna sarvē vaiśālikā nṛpāḥ ।
dīrghāyuṣō mahātmānō vīryavantassudhārmikāḥ ॥ 20 ॥
ihādya rajanīṃ rāma sukhaṃ vatsyāmahē vayam ।
śvaḥ prabhātē naraśrēṣṭha janakaṃ draṣṭumarhasi ॥ 21 ॥
sumatistu mahātējā viśvāmitramupāgatam ।
śrutvā naravaraśrēṣṭhaḥ pratyudgachChanmahāyaśāḥ ॥ 22 ॥
pūjāṃ cha paramāṃ kṛtvā sōpādhyāyassabāndhavaḥ ।
prāñjaliḥ kuśalaṃ pṛṣṭvā viśvāmitramathābravīt ॥ 23 ॥
dhanyō'smyanugṛhītō'smi yasya mē viṣayaṃ muniḥ ।
samprāptō darśanaṃ chaiva nāsti dhanyatarō mama ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptachatvāriṃśassargaḥ ॥
