શ્રીમદ્વાલ્મીકીય રામાયણે બાલકાંડમ્ ।
અથ સપ્તચત્વારિંશસ્સર્ગઃ ।
સપ્તધાતુ કૃતે ગર્ભે દિતિઃ પરમદુઃખિતા ।
સહસ્રાક્ષં દુરાધર્ષં વાક્યં સાનુનયાઽબ્રવીત્ ॥ 1 ॥
મમાપરાધાદ્ગર્ભોઽયં સપ્તધા વિફલીકૃતઃ ।
નાપરાધોઽસ્તિ દેવેશ તવાત્ર બલસૂદન ॥ 2 ॥
પ્રિયં તુ કર્તુમિચ્છામિ મમ ગર્ભવિપર્યયે ।
મરુતાં સપ્તસપ્તાનાં સ્થાનપાલા ભવંત્વિમે ॥ 3 ॥
વાતસ્કંધાઃ ઇમે સપ્ત ચરંતુ દિવિ પુત્રક ।
મારુતા ઇતિ વિખ્યાતા દિવ્યરૂપા મમાત્મજાઃ ॥ 4 ॥
બ્રહ્મલોકં ચરત્વેક ઇંદ્રલોકં તથાઽપરઃ ।
દિવિ વાયુરિતિ ખ્યાતસ્તૃતીયોઽપિ મહાયશાઃ ॥ 5 ॥
ચત્વારસ્તુ સુરશ્રેષ્ઠ દિશો વૈ તવ શાસનાત્ ।
સંચરિષ્યંતુ ભદ્રં તે દેવભૂતા મમાત્મજાઃ ॥ 6 ॥
તસ્યાસ્તદ્વચનં શ્રુત્વા સહસ્રાક્ષઃ પુરંદરઃ ।
ઉવાચ પ્રાંજલિર્વાક્યં દિતિં બલનિષૂદનઃ ॥ 7 ॥
સર્વમેતદ્યથોક્તં તે ભવિષ્યતિ ન સંશયઃ ।
વિચરિષ્યંતિ ભદ્રં તે દેવભૂતાસ્તવાત્મજાઃ ॥ 8 ॥
એવં તૌ નિશ્ચયં કૃત્વા માતાપુત્રૌ તપોવને ।
જગ્મતુસ્ત્રિદિવં રામ કૃતાર્થાવિતિ નશ્શ્રુતમ્ ॥ 9 ॥
એષ દેશસ્સ કાકુત્સ્થ મહેંદ્રાધ્યુષિતઃ પુરા ।
દિતિં યત્ર તપસ્સિદ્ધામેવં પરિચચાર સઃ ॥ 10 ॥
ઇક્ષ્વાકોઽસ્તુ નરવ્યાઘ્ર પુત્રઃ પરમધાર્મિકઃ ॥ 11 ॥
અલંબુષાયામુત્પન્નો વિશાલ ઇતિ વિશ્રુતઃ ।
તેન ચાસીદિહ સ્થાને વિશાલેતિ પુરી કૃતા ॥ 12 ॥
ઇક્ષ્વાકોઽસ્તુ નરવ્યાઘ્ર પુત્રઃ પરમધાર્મિકઃ ॥ 13 ॥
અલંબુષાયામુત્પન્નો વિશાલ ઇતિ વિશ્રુતઃ ।
તેન ચાસીદિહ સ્થાને વિશાલેતિ પુરી કૃતા ॥ 14 ॥
વિશાલસ્ય સુતો રામ હેમચંદ્રો મહાબલઃ ।
સુચંદ્ર ઇતિ વિખ્યાતઃ હેમચંદ્રાદનંતરઃ ॥ 15 ॥
સુચંદ્રતનયો રામ ધૂમ્રાશ્વ ઇતિ વિશ્રુતઃ ।
ધૂમ્રાશ્વતનયશ્ચાપિ સંજયસ્સમપદ્યત ॥ 16 ॥
સંજયસ્ય સુતશ્શ્રીમાન્ સહદેવઃ પ્રતાપવાન્ ।
કુશાશ્વસ્સહદેવસ્ય પુત્રઃ પરમધાર્મિકઃ ॥ 17 ॥
કુશાશ્વસ્ય મહાતેજા સોમદત્તઃ પ્રતાપવાન્ ।
સોમદત્તસ્ય પુત્રસ્તુ કાકુત્સ્થ ઇતિ વિશ્રુતઃ ॥ 18 ॥
તસ્ય પુત્રો મહાતેજાઃ સંપ્રત્યેષ પુરીમિમામ્ ।
આવસત્યમરપ્રખ્યસ્સુમતિર્નામ દુર્જયઃ ॥ 19 ॥
ઇક્ષ્વાકોસ્તુ પ્રસાદેન સર્વે વૈશાલિકા નૃપાઃ ।
દીર્ઘાયુષો મહાત્માનો વીર્યવંતસ્સુધાર્મિકાઃ ॥ 20 ॥
ઇહાદ્ય રજનીં રામ સુખં વત્સ્યામહે વયમ્ ।
શ્વઃ પ્રભાતે નરશ્રેષ્ઠ જનકં દ્રષ્ટુમર્હસિ ॥ 21 ॥
સુમતિસ્તુ મહાતેજા વિશ્વામિત્રમુપાગતમ્ ।
શ્રુત્વા નરવરશ્રેષ્ઠઃ પ્રત્યુદ્ગચ્છન્મહાયશાઃ ॥ 22 ॥
પૂજાં ચ પરમાં કૃત્વા સોપાધ્યાયસ્સબાંધવઃ ।
પ્રાંજલિઃ કુશલં પૃષ્ટ્વા વિશ્વામિત્રમથાબ્રવીત્ ॥ 23 ॥
ધન્યોઽસ્મ્યનુગૃહીતોઽસ્મિ યસ્ય મે વિષયં મુનિઃ ।
સંપ્રાપ્તો દર્શનં ચૈવ નાસ્તિ ધન્યતરો મમ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે સપ્તચત્વારિંશસ્સર્ગઃ ॥
