ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତଚତ୍ଵାରିଂଶସ୍ସର୍ଗଃ ।
ସପ୍ତଧାତୁ କୃତେ ଗର୍ଭେ ଦିତିଃ ପରମଦୁଃଖିତା ।
ସହସ୍ରାକ୍ଷଂ ଦୁରାଧର୍ଷଂ ଵାକ୍ୟଂ ସାନୁନୟାଽବ୍ରଵୀତ୍ ॥ 1 ॥
ମମାପରାଧାଦ୍ଗର୍ଭୋଽୟଂ ସପ୍ତଧା ଵିଫଲୀକୃତଃ ।
ନାପରାଧୋଽସ୍ତି ଦେଵେଶ ତଵାତ୍ର ବଲସୂଦନ ॥ 2 ॥
ପ୍ରିୟଂ ତୁ କର୍ତୁମିଚ୍ଛାମି ମମ ଗର୍ଭଵିପର୍ୟୟେ ।
ମରୁତାଂ ସପ୍ତସପ୍ତାନାଂ ସ୍ଥାନପାଲା ଭଵଂତ୍ଵିମେ ॥ 3 ॥
ଵାତସ୍କଂଧାଃ ଇମେ ସପ୍ତ ଚରଂତୁ ଦିଵି ପୁତ୍ରକ ।
ମାରୁତା ଇତି ଵିଖ୍ୟାତା ଦିଵ୍ୟରୂପା ମମାତ୍ମଜାଃ ॥ 4 ॥
ବ୍ରହ୍ମଲୋକଂ ଚରତ୍ଵେକ ଇଂଦ୍ରଲୋକଂ ତଥାଽପରଃ ।
ଦିଵି ଵାୟୁରିତି ଖ୍ୟାତସ୍ତୃତୀୟୋଽପି ମହାୟଶାଃ ॥ 5 ॥
ଚତ୍ଵାରସ୍ତୁ ସୁରଶ୍ରେଷ୍ଠ ଦିଶୋ ଵୈ ତଵ ଶାସନାତ୍ ।
ସଂଚରିଷ୍ୟଂତୁ ଭଦ୍ରଂ ତେ ଦେଵଭୂତା ମମାତ୍ମଜାଃ ॥ 6 ॥
ତସ୍ୟାସ୍ତଦ୍ଵଚନଂ ଶ୍ରୁତ୍ଵା ସହସ୍ରାକ୍ଷଃ ପୁରଂଦରଃ ।
ଉଵାଚ ପ୍ରାଂଜଲିର୍ଵାକ୍ୟଂ ଦିତିଂ ବଲନିଷୂଦନଃ ॥ 7 ॥
ସର୍ଵମେତଦ୍ୟଥୋକ୍ତଂ ତେ ଭଵିଷ୍ୟତି ନ ସଂଶୟଃ ।
ଵିଚରିଷ୍ୟଂତି ଭଦ୍ରଂ ତେ ଦେଵଭୂତାସ୍ତଵାତ୍ମଜାଃ ॥ 8 ॥
ଏଵଂ ତୌ ନିଶ୍ଚୟଂ କୃତ୍ଵା ମାତାପୁତ୍ରୌ ତପୋଵନେ ।
ଜଗ୍ମତୁସ୍ତ୍ରିଦିଵଂ ରାମ କୃତାର୍ଥାଵିତି ନଶ୍ଶ୍ରୁତମ୍ ॥ 9 ॥
ଏଷ ଦେଶସ୍ସ କାକୁତ୍ସ୍ଥ ମହେଂଦ୍ରାଧ୍ୟୁଷିତଃ ପୁରା ।
ଦିତିଂ ୟତ୍ର ତପସ୍ସିଦ୍ଧାମେଵଂ ପରିଚଚାର ସଃ ॥ 10 ॥
ଇକ୍ଷ୍ଵାକୋଽସ୍ତୁ ନରଵ୍ୟାଘ୍ର ପୁତ୍ରଃ ପରମଧାର୍ମିକଃ ॥ 11 ॥
ଅଲଂବୁଷାୟାମୁତ୍ପନ୍ନୋ ଵିଶାଲ ଇତି ଵିଶ୍ରୁତଃ ।
ତେନ ଚାସୀଦିହ ସ୍ଥାନେ ଵିଶାଲେତି ପୁରୀ କୃତା ॥ 12 ॥
ଇକ୍ଷ୍ଵାକୋଽସ୍ତୁ ନରଵ୍ୟାଘ୍ର ପୁତ୍ରଃ ପରମଧାର୍ମିକଃ ॥ 13 ॥
ଅଲଂବୁଷାୟାମୁତ୍ପନ୍ନୋ ଵିଶାଲ ଇତି ଵିଶ୍ରୁତଃ ।
ତେନ ଚାସୀଦିହ ସ୍ଥାନେ ଵିଶାଲେତି ପୁରୀ କୃତା ॥ 14 ॥
ଵିଶାଲସ୍ୟ ସୁତୋ ରାମ ହେମଚଂଦ୍ରୋ ମହାବଲଃ ।
ସୁଚଂଦ୍ର ଇତି ଵିଖ୍ୟାତଃ ହେମଚଂଦ୍ରାଦନଂତରଃ ॥ 15 ॥
ସୁଚଂଦ୍ରତନୟୋ ରାମ ଧୂମ୍ରାଶ୍ଵ ଇତି ଵିଶ୍ରୁତଃ ।
ଧୂମ୍ରାଶ୍ଵତନୟଶ୍ଚାପି ସଂଜୟସ୍ସମପଦ୍ୟତ ॥ 16 ॥
ସଂଜୟସ୍ୟ ସୁତଶ୍ଶ୍ରୀମାନ୍ ସହଦେଵଃ ପ୍ରତାପଵାନ୍ ।
କୁଶାଶ୍ଵସ୍ସହଦେଵସ୍ୟ ପୁତ୍ରଃ ପରମଧାର୍ମିକଃ ॥ 17 ॥
କୁଶାଶ୍ଵସ୍ୟ ମହାତେଜା ସୋମଦତ୍ତଃ ପ୍ରତାପଵାନ୍ ।
ସୋମଦତ୍ତସ୍ୟ ପୁତ୍ରସ୍ତୁ କାକୁତ୍ସ୍ଥ ଇତି ଵିଶ୍ରୁତଃ ॥ 18 ॥
ତସ୍ୟ ପୁତ୍ରୋ ମହାତେଜାଃ ସଂପ୍ରତ୍ୟେଷ ପୁରୀମିମାମ୍ ।
ଆଵସତ୍ୟମରପ୍ରଖ୍ୟସ୍ସୁମତିର୍ନାମ ଦୁର୍ଜୟଃ ॥ 19 ॥
ଇକ୍ଷ୍ଵାକୋସ୍ତୁ ପ୍ରସାଦେନ ସର୍ଵେ ଵୈଶାଲିକା ନୃପାଃ ।
ଦୀର୍ଘାୟୁଷୋ ମହାତ୍ମାନୋ ଵୀର୍ୟଵଂତସ୍ସୁଧାର୍ମିକାଃ ॥ 20 ॥
ଇହାଦ୍ୟ ରଜନୀଂ ରାମ ସୁଖଂ ଵତ୍ସ୍ୟାମହେ ଵୟମ୍ ।
ଶ୍ଵଃ ପ୍ରଭାତେ ନରଶ୍ରେଷ୍ଠ ଜନକଂ ଦ୍ରଷ୍ଟୁମର୍ହସି ॥ 21 ॥
ସୁମତିସ୍ତୁ ମହାତେଜା ଵିଶ୍ଵାମିତ୍ରମୁପାଗତମ୍ ।
ଶ୍ରୁତ୍ଵା ନରଵରଶ୍ରେଷ୍ଠଃ ପ୍ରତ୍ୟୁଦ୍ଗଚ୍ଛନ୍ମହାୟଶାଃ ॥ 22 ॥
ପୂଜାଂ ଚ ପରମାଂ କୃତ୍ଵା ସୋପାଧ୍ୟାୟସ୍ସବାଂଧଵଃ ।
ପ୍ରାଂଜଲିଃ କୁଶଲଂ ପୃଷ୍ଟ୍ଵା ଵିଶ୍ଵାମିତ୍ରମଥାବ୍ରଵୀତ୍ ॥ 23 ॥
ଧନ୍ୟୋଽସ୍ମ୍ୟନୁଗୃହୀତୋଽସ୍ମି ୟସ୍ୟ ମେ ଵିଷୟଂ ମୁନିଃ ।
ସଂପ୍ରାପ୍ତୋ ଦର୍ଶନଂ ଚୈଵ ନାସ୍ତି ଧନ୍ୟତରୋ ମମ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତଚତ୍ଵାରିଂଶସ୍ସର୍ଗଃ ॥
