ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തപംചാശസ്സര്ഗഃ ।
തതസ്സംതപ്തഹൃദയഃ സ്മരന്നിഗ്രഹമാത്മനഃ ।
വിനിശ്ശ്വസ്യ വിനിശ്ശ്വസ്യ കൃതവൈരോ മഹത്മനാ ॥ 1 ॥
സ ദക്ഷിണാം ദിശം ഗത്വാ മഹിഷ്യാ സഹ രാഘവ ।
തതാപ പരമം ഘോരം വിശ്വാമിത്രോ മഹത്തപഃ ॥ 2 ॥
ഫലമൂലാശനോ ദാംതശ്ചകാര സുമഹത്തപഃ ।
അഥാസ്യ ജജ്ഞിരേ പുത്രാസ്സത്യധര്മപരായണാഃ ।
ഹവിഷ്യംദോ മധുഷ്യംദോ ദൃഢനേത്രോ മഹാരഥഃ ॥ 3 ॥
പൂര്ണേ വര്ഷസഹസ്രേ തു ബ്രഹ്മാ ലോകപിതാമഹഃ ।
അബ്രവീന്മധുരം വാക്യം വിശ്വാമിത്രം തപോധനമ് ॥ 4 ॥
ചിതാ രാജര്ഷിലോകാസ്തേ തപസാ കുശികാത്മജ ।
അനേന തപസാ ത്വാം തു രാജര്ഷിരിതി വിദ്മഹേ ॥ 5 ॥
ഏവമുക്ത്വാ മഹാതേജാ ജഗാമ സഹ ദൈവതൈഃ ।
ത്രിവിഷ്ടപം ബ്രഹ്മലോകം ലോകാനാം പരമേശ്വരഃ ॥ 6 ॥
വിശ്വാമിത്രോഽപി തച്ഛ്രുത്വാ ഹ്രിയാ കിംചിദവാങ്മുഖഃ ।
ദുഃഖേന മഹതാഽഽവിഷ്ടസ്സമന്യുരിദമബ്രവീത് ॥ 7 ॥
തപശ്ച സുമഹത്തപ്തം രാജര്ഷിരിതി മാം വിദുഃ ।
ദേവാസ്സര്ഷിഗണാസ്സർവേ നാസ്തി മന്യേ തപഃഫലമ് ॥ 8 ॥
ഇതി നിശ്ചിത്യ മനസാ ഭൂയ ഏവ മഹാതപാഃ ।
തപശ്ചകാര കാകുത്സ്ഥ പരമം പരമാത്മവാന് ॥ 9 ॥
ഏതസ്മിന്നേവ കാലേ തു സത്യവാദീ ജിതേംദ്രിയഃ ।
ത്രിശംകുരിതി വിഖ്യാത ഇക്ഷ്വാകുകുലവര്ധനഃ ॥ 10 ॥
തസ്യ ബുദ്ധിസ്സമുത്പന്നാ യജേയമിതി രാഘവ ।
ഗച്ഛേയം സ്വശരീരേണ ദേവാനാം പരമാം ഗതിമ് ॥ 11 ॥
സ വസിഷ്ഠം സമാഹൂയ കഥയാമാസ ചിംതിതമ് ।
അശക്യമിതി ചാപ്യുക്തോ വസിഷ്ഠേന മഹാത്മനാ ॥ 12 ॥
പ്രത്യാഖ്യാതോ വസിഷ്ഠേന സ യയൌദക്ഷിണാം ദിശമ് ।
തതസ്തത്കര്മസിദ്ധ്യര്ഥം പുത്രാം സ്തസ്യ ഗതോ നൃപഃ ॥ 13 ॥
വാസിഷ്ഠാ ദീര്ഘതപസസ്തപോ യത്ര ഹി തേപിരേ ।
ത്രിശംംകുസ്സുമഹാതേജാ ശ്ശതം പരമഭാസ്വരമ് ॥ 14 ॥
വസിഷ്ഠപുത്രാന് ദദൃശേ തപ്യമാനാന് യശസ്വിനഃ ।
സോഽഭിഗമ്യ മഹാത്മനസ്സർവാനേവ ഗുരോസ്സുതാന് ॥ 15 ॥
അഭിവാദ്യാനുപൂർവ്യേണ ഹ്രിയാ കിംചിദവാങ്മുഖഃ ।
അബ്രവീത്സുമഹാഭഗാന്സർവാനേവ കൃതാംജലിഃ ॥ 16 ॥
ശരണം വഃ പ്രപദ്യേഽഹം ശരണ്യാന് ശരണാഗതഃ ।
പ്രത്യാഖ്യാതോഽസ്മി ഭദ്രം വോ വസിഷ്ഠേന മഹാത്മനാ ॥ 17 ॥
യഷ്ടുകാമോ മഹായജ്ഞം തദനുജ്ഞാതുമര്ഹഥ ।
ഗുരുപുത്രാനഹം സർവാന്നമസ്കൃത്യ പ്രസാദയേ ॥ 18 ॥
ശിരസാ പ്രണതോ യാചേ ബ്രാഹ്മണാന് തപസി സ്ഥിതാന് ।
തേ മാം ഭവംതസ്സിദ്ധ്യര്ഥം യാജയംതു സമാഹിതാഃ ॥ 19 ॥
സശരീരോ യഥാഽഹം ഹി ദേവലോകമവാപ്നുയാമ് ।
പ്രത്യാഖ്യാതോ വസിഷ്ഠേന ഗതിമന്യാം തപോധനാഃ ॥ 20 ॥
ഗുരുപുത്രാനൃതേ സർവാന്നാഹം പശ്യാമി കാംചന ।
ഇക്ഷ്വാകൂണാം ഹി സർവേഷാം പുരോധാഃ പരമാ ഗതിഃ ॥ 21 ॥
പുരോധസസ്തു വിദ്വാംസസ്താരയംതി സദാ നൃപാന് ।
തസ്മാദനംതരം സർവേ ഭവംതോ ദൈവതം മമ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തപംചാശസ്സര്ഗഃ ॥
