ශ්රීමද්වාල්මීකීය රාමායණේ බාලකාංඩම් ।
අථ සප්තපංචාශස්සර්ගඃ ।
තතස්සංතප්තහෘදයඃ ස්මරන්නිග්රහමාත්මනඃ ।
විනිශ්ශ්වස්ය විනිශ්ශ්වස්ය කෘතවෛරෝ මහත්මනා ॥ 1 ॥
ස දක්ෂිණාං දිශං ගත්වා මහිෂ්යා සහ රාඝව ।
තතාප පරමං ඝෝරං විශ්වාමිත්රෝ මහත්තපඃ ॥ 2 ॥
ඵලමූලාශනෝ දාංතශ්චකාර සුමහත්තපඃ ।
අථාස්ය ජජ්ඤිරේ පුත්රාස්සත්යධර්මපරායණාඃ ।
හවිෂ්යංදෝ මධුෂ්යංදෝ දෘඪනේත්රෝ මහාරථඃ ॥ 3 ॥
පූර්ණේ වර්ෂසහස්රේ තු බ්රහ්මා ලෝකපිතාමහඃ ।
අබ්රවීන්මධුරං වාක්යං විශ්වාමිත්රං තපෝධනම් ॥ 4 ॥
චිතා රාජර්ෂිලෝකාස්තේ තපසා කුශිකාත්මජ ।
අනේන තපසා ත්වාං තු රාජර්ෂිරිති විද්මහේ ॥ 5 ॥
ඒවමුක්ත්වා මහාතේජා ජගාම සහ දෛවතෛඃ ।
ත්රිවිෂ්ටපං බ්රහ්මලෝකං ලෝකානාං පරමේශ්වරඃ ॥ 6 ॥
විශ්වාමිත්රෝऽපි තච්ඡ්රුත්වා හ්රියා කිංචිදවාඞ්මුඛඃ ।
දුඃඛේන මහතාऽऽවිෂ්ටස්සමන්යුරිදමබ්රවීත් ॥ 7 ॥
තපශ්ච සුමහත්තප්තං රාජර්ෂිරිති මාං විදුඃ ।
දේවාස්සර්ෂිගණාස්සර්වේ නාස්ති මන්යේ තපඃඵලම් ॥ 8 ॥
ඉති නිශ්චිත්ය මනසා භූය ඒව මහාතපාඃ ।
තපශ්චකාර කාකුත්ස්ථ පරමං පරමාත්මවාන් ॥ 9 ॥
ඒතස්මින්නේව කාලේ තු සත්යවාදී ජිතේංද්රියඃ ।
ත්රිශංකුරිති විඛ්යාත ඉක්ෂ්වාකුකුලවර්ධනඃ ॥ 10 ॥
තස්ය බුද්ධිස්සමුත්පන්නා යජේයමිති රාඝව ।
ගච්ඡේයං ස්වශරීරේණ දේවානාං පරමාං ගතිම් ॥ 11 ॥
ස වසිෂ්ඨං සමාහූය කථයාමාස චිංතිතම් ।
අශක්යමිති චාප්යුක්තෝ වසිෂ්ඨේන මහාත්මනා ॥ 12 ॥
ප්රත්යාඛ්යාතෝ වසිෂ්ඨේන ස යයෞදක්ෂිණාං දිශම් ।
තතස්තත්කර්මසිද්ධ්යර්ථං පුත්රාං ස්තස්ය ගතෝ නෘපඃ ॥ 13 ॥
වාසිෂ්ඨා දීර්ඝතපසස්තපෝ යත්ර හි තේපිරේ ।
ත්රිශංංකුස්සුමහාතේජා ශ්ශතං පරමභාස්වරම් ॥ 14 ॥
වසිෂ්ඨපුත්රාන් දදෘශේ තප්යමානාන් යශස්විනඃ ।
සෝऽභිගම්ය මහාත්මනස්සර්වානේව ගුරෝස්සුතාන් ॥ 15 ॥
අභිවාද්යානුපූර්ව්යේණ හ්රියා කිංචිදවාඞ්මුඛඃ ।
අබ්රවීත්සුමහාභගාන්සර්වානේව කෘතාංජලිඃ ॥ 16 ॥
ශරණං වඃ ප්රපද්යේऽහං ශරණ්යාන් ශරණාගතඃ ।
ප්රත්යාඛ්යාතෝऽස්මි භද්රං වෝ වසිෂ්ඨේන මහාත්මනා ॥ 17 ॥
යෂ්ටුකාමෝ මහායජ්ඤං තදනුජ්ඤාතුමර්හථ ।
ගුරුපුත්රානහං සර්වාන්නමස්කෘත්ය ප්රසාදයේ ॥ 18 ॥
ශිරසා ප්රණතෝ යාචේ බ්රාහ්මණාන් තපසි ස්ථිතාන් ।
තේ මාං භවංතස්සිද්ධ්යර්ථං යාජයංතු සමාහිතාඃ ॥ 19 ॥
සශරීරෝ යථාऽහං හි දේවලෝකමවාප්නුයාම් ।
ප්රත්යාඛ්යාතෝ වසිෂ්ඨේන ගතිමන්යාං තපෝධනාඃ ॥ 20 ॥
ගුරුපුත්රානෘතේ සර්වාන්නාහං පශ්යාමි කාංචන ।
ඉක්ෂ්වාකූණාං හි සර්වේෂාං පුරෝධාඃ පරමා ගතිඃ ॥ 21 ॥
පුරෝධසස්තු විද්වාංසස්තාරයංති සදා නෘපාන් ।
තස්මාදනංතරං සර්වේ භවංතෝ දෛවතං මම ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තපංචාශස්සර්ගඃ ॥
