𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌸𑌂𑌤𑌪𑍍𑌤𑌹𑍃𑌦𑌯𑌃 𑌸𑍍𑌮𑌰𑌨𑍍𑌨𑌿𑌗𑍍𑌰𑌹𑌮𑌾𑌤𑍍𑌮𑌨𑌃 ।
𑌵𑌿𑌨𑌿𑌶𑍍𑌶𑍍𑌵𑌸𑍍𑌯 𑌵𑌿𑌨𑌿𑌶𑍍𑌶𑍍𑌵𑌸𑍍𑌯 𑌕𑍃𑌤𑌵𑍈𑌰𑍋 𑌮𑌹𑌤𑍍𑌮𑌨𑌾 ॥ 1 ॥
𑌸 𑌦𑌕𑍍𑌷𑌿𑌣𑌾𑌂 𑌦𑌿𑌶𑌂 𑌗𑌤𑍍𑌵𑌾 𑌮𑌹𑌿𑌷𑍍𑌯𑌾 𑌸𑌹 𑌰𑌾𑌘𑌵 ।
𑌤𑌤𑌾𑌪 𑌪𑌰𑌮𑌂 𑌘𑍋𑌰𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌤𑍍𑌤𑌪𑌃 ॥ 2 ॥
𑌫𑌲𑌮𑍂𑌲𑌾𑌶𑌨𑍋 𑌦𑌾𑌂𑌤𑌶𑍍𑌚𑌕𑌾𑌰 𑌸𑍁𑌮𑌹𑌤𑍍𑌤𑌪𑌃 ।
𑌅𑌥𑌾𑌸𑍍𑌯 𑌜𑌜𑍍𑌞𑌿𑌰𑍇 𑌪𑍁𑌤𑍍𑌰𑌾𑌸𑍍𑌸𑌤𑍍𑌯𑌧𑌰𑍍𑌮𑌪𑌰𑌾𑌯𑌣𑌾𑌃 ।
𑌹𑌵𑌿𑌷𑍍𑌯𑌂𑌦𑍋 𑌮𑌧𑍁𑌷𑍍𑌯𑌂𑌦𑍋 𑌦𑍃𑌢𑌨𑍇𑌤𑍍𑌰𑍋 𑌮𑌹𑌾𑌰𑌥𑌃 ॥ 3 ॥
𑌪𑍂𑌰𑍍𑌣𑍇 𑌵𑌰𑍍𑌷𑌸𑌹𑌸𑍍𑌰𑍇 𑌤𑍁 𑌬𑍍𑌰𑌹𑍍𑌮𑌾 𑌲𑍋𑌕𑌪𑌿𑌤𑌾𑌮𑌹𑌃 ।
𑌅𑌬𑍍𑌰𑌵𑍀𑌨𑍍𑌮𑌧𑍁𑌰𑌂 𑌵𑌾𑌕𑍍𑌯𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌤𑌪𑍋𑌧𑌨𑌮𑍍 ॥ 4 ॥
𑌚𑌿𑌤𑌾 𑌰𑌾𑌜𑌰𑍍𑌷𑌿𑌲𑍋𑌕𑌾𑌸𑍍𑌤𑍇 𑌤𑌪𑌸𑌾 𑌕𑍁𑌶𑌿𑌕𑌾𑌤𑍍𑌮𑌜 ।
𑌅𑌨𑍇𑌨 𑌤𑌪𑌸𑌾 𑌤𑍍𑌵𑌾𑌂 𑌤𑍁 𑌰𑌾𑌜𑌰𑍍𑌷𑌿𑌰𑌿𑌤𑌿 𑌵𑌿𑌦𑍍𑌮𑌹𑍇 ॥ 5 ॥
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾 𑌜𑌗𑌾𑌮 𑌸𑌹 𑌦𑍈𑌵𑌤𑍈𑌃 ।
𑌤𑍍𑌰𑌿𑌵𑌿𑌷𑍍𑌟𑌪𑌂 𑌬𑍍𑌰𑌹𑍍𑌮𑌲𑍋𑌕𑌂 𑌲𑍋𑌕𑌾𑌨𑌾𑌂 𑌪𑌰𑌮𑍇𑌶𑍍𑌵𑌰𑌃 ॥ 6 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌪𑌿 𑌤𑌚𑍍𑌛𑍍𑌰𑍁𑌤𑍍𑌵𑌾 𑌹𑍍𑌰𑌿𑌯𑌾 𑌕𑌿𑌂𑌚𑌿𑌦𑌵𑌾𑌙𑍍𑌮𑍁𑌖𑌃 ।
𑌦𑍁𑌃𑌖𑍇𑌨 𑌮𑌹𑌤𑌾𑌽𑌽𑌵𑌿𑌷𑍍𑌟𑌸𑍍𑌸𑌮𑌨𑍍𑌯𑍁𑌰𑌿𑌦𑌮𑌬𑍍𑌰𑌵𑍀𑌤𑍍 ॥ ॥
𑌤𑌪𑌶𑍍𑌚 𑌸𑍁𑌮𑌹𑌤𑍍𑌤𑌪𑍍𑌤𑌂 𑌰𑌾𑌜𑌰𑍍𑌷𑌿𑌰𑌿𑌤𑌿 𑌮𑌾𑌂 𑌵𑌿𑌦𑍁𑌃 ।
𑌦𑍇𑌵𑌾𑌸𑍍𑌸𑌰𑍍𑌷𑌿𑌗𑌣𑌾𑌸𑍍𑌸𑌰𑍍𑌵𑍇 𑌨𑌾𑌸𑍍𑌤𑌿 𑌮𑌨𑍍𑌯𑍇 𑌤𑌪𑌃𑌫𑌲𑌮𑍍 ॥ ॥
𑌇𑌤𑌿 𑌨𑌿𑌶𑍍𑌚𑌿𑌤𑍍𑌯 𑌮𑌨𑌸𑌾 𑌭𑍂𑌯 𑌏𑌵 𑌮𑌹𑌾𑌤𑌪𑌾𑌃 ।
𑌤𑌪𑌶𑍍𑌚𑌕𑌾𑌰 𑌕𑌾𑌕𑍁𑌤𑍍𑌸𑍍𑌥 𑌪𑌰𑌮𑌂 𑌪𑌰𑌮𑌾𑌤𑍍𑌮𑌵𑌾𑌨𑍍 ॥ ॥
𑌏𑌤𑌸𑍍𑌮𑌿𑌨𑍍𑌨𑍇𑌵 𑌕𑌾𑌲𑍇 𑌤𑍁 𑌸𑌤𑍍𑌯𑌵𑌾𑌦𑍀 𑌜𑌿𑌤𑍇𑌂𑌦𑍍𑌰𑌿𑌯𑌃 ।
𑌤𑍍𑌰𑌿𑌶𑌂𑌕𑍁𑌰𑌿𑌤𑌿 𑌵𑌿𑌖𑍍𑌯𑌾𑌤 𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌵𑌰𑍍𑌧𑌨𑌃 ॥ 10 ॥
𑌤𑌸𑍍𑌯 𑌬𑍁𑌦𑍍𑌧𑌿𑌸𑍍𑌸𑌮𑍁𑌤𑍍𑌪𑌨𑍍𑌨𑌾 𑌯𑌜𑍇𑌯𑌮𑌿𑌤𑌿 𑌰𑌾𑌘𑌵 ।
𑌗𑌚𑍍𑌛𑍇𑌯𑌂 𑌸𑍍𑌵𑌶𑌰𑍀𑌰𑍇𑌣 𑌦𑍇𑌵𑌾𑌨𑌾𑌂 𑌪𑌰𑌮𑌾𑌂 𑌗𑌤𑌿𑌮𑍍 ॥ 11 ॥
𑌸 𑌵𑌸𑌿𑌷𑍍𑌠𑌂 𑌸𑌮𑌾𑌹𑍂𑌯 𑌕𑌥𑌯𑌾𑌮𑌾𑌸 𑌚𑌿𑌂𑌤𑌿𑌤𑌮𑍍 ।
𑌅𑌶𑌕𑍍𑌯𑌮𑌿𑌤𑌿 𑌚𑌾𑌪𑍍𑌯𑍁𑌕𑍍𑌤𑍋 𑌵𑌸𑌿𑌷𑍍𑌠𑍇𑌨 𑌮𑌹𑌾𑌤𑍍𑌮𑌨𑌾 ॥ 12 ॥
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍋 𑌵𑌸𑌿𑌷𑍍𑌠𑍇𑌨 𑌸 𑌯𑌯𑍌𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ।
𑌤𑌤𑌸𑍍𑌤𑌤𑍍𑌕𑌰𑍍𑌮𑌸𑌿𑌦𑍍𑌧𑍍𑌯𑌰𑍍𑌥𑌂 𑌪𑍁𑌤𑍍𑌰𑌾𑌂 𑌸𑍍𑌤𑌸𑍍𑌯 𑌗𑌤𑍋 𑌨𑍃𑌪𑌃 ॥ 13 ॥
𑌵𑌾𑌸𑌿𑌷𑍍𑌠𑌾 𑌦𑍀𑌰𑍍𑌘𑌤𑌪𑌸𑌸𑍍𑌤𑌪𑍋 𑌯𑌤𑍍𑌰 𑌹𑌿 𑌤𑍇𑌪𑌿𑌰𑍇 ।
𑌤𑍍𑌰𑌿𑌶𑌂𑌂𑌕𑍁𑌸𑍍𑌸𑍁𑌮𑌹𑌾𑌤𑍇𑌜𑌾 𑌶𑍍𑌶𑌤𑌂 𑌪𑌰𑌮𑌭𑌾𑌸𑍍𑌵𑌰𑌮𑍍 ॥ 14 ॥
𑌵𑌸𑌿𑌷𑍍𑌠𑌪𑍁𑌤𑍍𑌰𑌾𑌨𑍍 𑌦𑌦𑍃𑌶𑍇 𑌤𑌪𑍍𑌯𑌮𑌾𑌨𑌾𑌨𑍍 𑌯𑌶𑌸𑍍𑌵𑌿𑌨𑌃 ।
𑌸𑍋𑌽𑌭𑌿𑌗𑌮𑍍𑌯 𑌮𑌹𑌾𑌤𑍍𑌮𑌨𑌸𑍍𑌸𑌰𑍍𑌵𑌾𑌨𑍇𑌵 𑌗𑍁𑌰𑍋𑌸𑍍𑌸𑍁𑌤𑌾𑌨𑍍 ॥ 15 ॥
𑌅𑌭𑌿𑌵𑌾𑌦𑍍𑌯𑌾𑌨𑍁𑌪𑍂𑌰𑍍𑌵𑍍𑌯𑍇𑌣 𑌹𑍍𑌰𑌿𑌯𑌾 𑌕𑌿𑌂𑌚𑌿𑌦𑌵𑌾𑌙𑍍𑌮𑍁𑌖𑌃 ।
𑌅𑌬𑍍𑌰𑌵𑍀𑌤𑍍𑌸𑍁𑌮𑌹𑌾𑌭𑌗𑌾𑌨𑍍𑌸𑌰𑍍𑌵𑌾𑌨𑍇𑌵 𑌕𑍃𑌤𑌾𑌂𑌜𑌲𑌿𑌃 ॥ 16 ॥
𑌶𑌰𑌣𑌂 𑌵𑌃 𑌪𑍍𑌰𑌪𑌦𑍍𑌯𑍇𑌽𑌹𑌂 𑌶𑌰𑌣𑍍𑌯𑌾𑌨𑍍 𑌶𑌰𑌣𑌾𑌗𑌤𑌃 ।
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍋𑌽𑌸𑍍𑌮𑌿 𑌭𑌦𑍍𑌰𑌂 𑌵𑍋 𑌵𑌸𑌿𑌷𑍍𑌠𑍇𑌨 𑌮𑌹𑌾𑌤𑍍𑌮𑌨𑌾 ॥ 1 ॥
𑌯𑌷𑍍𑌟𑍁𑌕𑌾𑌮𑍋 𑌮𑌹𑌾𑌯𑌜𑍍𑌞𑌂 𑌤𑌦𑌨𑍁𑌜𑍍𑌞𑌾𑌤𑍁𑌮𑌰𑍍𑌹𑌥 ।
𑌗𑍁𑌰𑍁𑌪𑍁𑌤𑍍𑌰𑌾𑌨𑌹𑌂 𑌸𑌰𑍍𑌵𑌾𑌨𑍍𑌨𑌮𑌸𑍍𑌕𑍃𑌤𑍍𑌯 𑌪𑍍𑌰𑌸𑌾𑌦𑌯𑍇 ॥ 1 ॥
𑌶𑌿𑌰𑌸𑌾 𑌪𑍍𑌰𑌣𑌤𑍋 𑌯𑌾𑌚𑍇 𑌬𑍍𑌰𑌾𑌹𑍍𑌮𑌣𑌾𑌨𑍍 𑌤𑌪𑌸𑌿 𑌸𑍍𑌥𑌿𑌤𑌾𑌨𑍍 ।
𑌤𑍇 𑌮𑌾𑌂 𑌭𑌵𑌂𑌤𑌸𑍍𑌸𑌿𑌦𑍍𑌧𑍍𑌯𑌰𑍍𑌥𑌂 𑌯𑌾𑌜𑌯𑌂𑌤𑍁 𑌸𑌮𑌾𑌹𑌿𑌤𑌾𑌃 ॥ 1 ॥
𑌸𑌶𑌰𑍀𑌰𑍋 𑌯𑌥𑌾𑌽𑌹𑌂 𑌹𑌿 𑌦𑍇𑌵𑌲𑍋𑌕𑌮𑌵𑌾𑌪𑍍𑌨𑍁𑌯𑌾𑌮𑍍 ।
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍋 𑌵𑌸𑌿𑌷𑍍𑌠𑍇𑌨 𑌗𑌤𑌿𑌮𑌨𑍍𑌯𑌾𑌂 𑌤𑌪𑍋𑌧𑌨𑌾𑌃 ॥ 20 ॥
𑌗𑍁𑌰𑍁𑌪𑍁𑌤𑍍𑌰𑌾𑌨𑍃𑌤𑍇 𑌸𑌰𑍍𑌵𑌾𑌨𑍍𑌨𑌾𑌹𑌂 𑌪𑌶𑍍𑌯𑌾𑌮𑌿 𑌕𑌾𑌂𑌚𑌨 ।
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌹𑌿 𑌸𑌰𑍍𑌵𑍇𑌷𑌾𑌂 𑌪𑍁𑌰𑍋𑌧𑌾𑌃 𑌪𑌰𑌮𑌾 𑌗𑌤𑌿𑌃 ॥ 21 ॥
𑌪𑍁𑌰𑍋𑌧𑌸𑌸𑍍𑌤𑍁 𑌵𑌿𑌦𑍍𑌵𑌾𑌂𑌸𑌸𑍍𑌤𑌾𑌰𑌯𑌂𑌤𑌿 𑌸𑌦𑌾 𑌨𑍃𑌪𑌾𑌨𑍍 ।
𑌤𑌸𑍍𑌮𑌾𑌦𑌨𑌂𑌤𑌰𑌂 𑌸𑌰𑍍𑌵𑍇 𑌭𑌵𑌂𑌤𑍋 𑌦𑍈𑌵𑌤𑌂 𑌮𑌮 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌸𑌪𑍍𑌤𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
