શ્રીમદ્વાલ્મીકીય રામાયણે બાલકાંડમ્ ।
અથ સપ્તપંચાશસ્સર્ગઃ ।
તતસ્સંતપ્તહૃદયઃ સ્મરન્નિગ્રહમાત્મનઃ ।
વિનિશ્શ્વસ્ય વિનિશ્શ્વસ્ય કૃતવૈરો મહત્મના ॥ 1 ॥
સ દક્ષિણાં દિશં ગત્વા મહિષ્યા સહ રાઘવ ।
તતાપ પરમં ઘોરં વિશ્વામિત્રો મહત્તપઃ ॥ 2 ॥
ફલમૂલાશનો દાંતશ્ચકાર સુમહત્તપઃ ।
અથાસ્ય જજ્ઞિરે પુત્રાસ્સત્યધર્મપરાયણાઃ ।
હવિષ્યંદો મધુષ્યંદો દૃઢનેત્રો મહારથઃ ॥ 3 ॥
પૂર્ણે વર્ષસહસ્રે તુ બ્રહ્મા લોકપિતામહઃ ।
અબ્રવીન્મધુરં વાક્યં વિશ્વામિત્રં તપોધનમ્ ॥ 4 ॥
ચિતા રાજર્ષિલોકાસ્તે તપસા કુશિકાત્મજ ।
અનેન તપસા ત્વાં તુ રાજર્ષિરિતિ વિદ્મહે ॥ 5 ॥
એવમુક્ત્વા મહાતેજા જગામ સહ દૈવતૈઃ ।
ત્રિવિષ્ટપં બ્રહ્મલોકં લોકાનાં પરમેશ્વરઃ ॥ 6 ॥
વિશ્વામિત્રોઽપિ તચ્છ્રુત્વા હ્રિયા કિંચિદવાઙ્મુખઃ ।
દુઃખેન મહતાઽઽવિષ્ટસ્સમન્યુરિદમબ્રવીત્ ॥ 7 ॥
તપશ્ચ સુમહત્તપ્તં રાજર્ષિરિતિ માં વિદુઃ ।
દેવાસ્સર્ષિગણાસ્સર્વે નાસ્તિ મન્યે તપઃફલમ્ ॥ 8 ॥
ઇતિ નિશ્ચિત્ય મનસા ભૂય એવ મહાતપાઃ ।
તપશ્ચકાર કાકુત્સ્થ પરમં પરમાત્મવાન્ ॥ 9 ॥
એતસ્મિન્નેવ કાલે તુ સત્યવાદી જિતેંદ્રિયઃ ।
ત્રિશંકુરિતિ વિખ્યાત ઇક્ષ્વાકુકુલવર્ધનઃ ॥ 10 ॥
તસ્ય બુદ્ધિસ્સમુત્પન્ના યજેયમિતિ રાઘવ ।
ગચ્છેયં સ્વશરીરેણ દેવાનાં પરમાં ગતિમ્ ॥ 11 ॥
સ વસિષ્ઠં સમાહૂય કથયામાસ ચિંતિતમ્ ।
અશક્યમિતિ ચાપ્યુક્તો વસિષ્ઠેન મહાત્મના ॥ 12 ॥
પ્રત્યાખ્યાતો વસિષ્ઠેન સ યયૌદક્ષિણાં દિશમ્ ।
તતસ્તત્કર્મસિદ્ધ્યર્થં પુત્રાં સ્તસ્ય ગતો નૃપઃ ॥ 13 ॥
વાસિષ્ઠા દીર્ઘતપસસ્તપો યત્ર હિ તેપિરે ।
ત્રિશંંકુસ્સુમહાતેજા શ્શતં પરમભાસ્વરમ્ ॥ 14 ॥
વસિષ્ઠપુત્રાન્ દદૃશે તપ્યમાનાન્ યશસ્વિનઃ ।
સોઽભિગમ્ય મહાત્મનસ્સર્વાનેવ ગુરોસ્સુતાન્ ॥ 15 ॥
અભિવાદ્યાનુપૂર્વ્યેણ હ્રિયા કિંચિદવાઙ્મુખઃ ।
અબ્રવીત્સુમહાભગાન્સર્વાનેવ કૃતાંજલિઃ ॥ 16 ॥
શરણં વઃ પ્રપદ્યેઽહં શરણ્યાન્ શરણાગતઃ ।
પ્રત્યાખ્યાતોઽસ્મિ ભદ્રં વો વસિષ્ઠેન મહાત્મના ॥ 17 ॥
યષ્ટુકામો મહાયજ્ઞં તદનુજ્ઞાતુમર્હથ ।
ગુરુપુત્રાનહં સર્વાન્નમસ્કૃત્ય પ્રસાદયે ॥ 18 ॥
શિરસા પ્રણતો યાચે બ્રાહ્મણાન્ તપસિ સ્થિતાન્ ।
તે માં ભવંતસ્સિદ્ધ્યર્થં યાજયંતુ સમાહિતાઃ ॥ 19 ॥
સશરીરો યથાઽહં હિ દેવલોકમવાપ્નુયામ્ ।
પ્રત્યાખ્યાતો વસિષ્ઠેન ગતિમન્યાં તપોધનાઃ ॥ 20 ॥
ગુરુપુત્રાનૃતે સર્વાન્નાહં પશ્યામિ કાંચન ।
ઇક્ષ્વાકૂણાં હિ સર્વેષાં પુરોધાઃ પરમા ગતિઃ ॥ 21 ॥
પુરોધસસ્તુ વિદ્વાંસસ્તારયંતિ સદા નૃપાન્ ।
તસ્માદનંતરં સર્વે ભવંતો દૈવતં મમ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે સપ્તપંચાશસ્સર્ગઃ ॥
