ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତପଂଚାଶସ୍ସର୍ଗଃ ।
ତତସ୍ସଂତପ୍ତହୃଦୟଃ ସ୍ମରନ୍ନିଗ୍ରହମାତ୍ମନଃ ।
ଵିନିଶ୍ଶ୍ଵସ୍ୟ ଵିନିଶ୍ଶ୍ଵସ୍ୟ କୃତଵୈରୋ ମହତ୍ମନା ॥ 1 ॥
ସ ଦକ୍ଷିଣାଂ ଦିଶଂ ଗତ୍ଵା ମହିଷ୍ୟା ସହ ରାଘଵ ।
ତତାପ ପରମଂ ଘୋରଂ ଵିଶ୍ଵାମିତ୍ରୋ ମହତ୍ତପଃ ॥ 2 ॥
ଫଲମୂଲାଶନୋ ଦାଂତଶ୍ଚକାର ସୁମହତ୍ତପଃ ।
ଅଥାସ୍ୟ ଜଜ୍ଞିରେ ପୁତ୍ରାସ୍ସତ୍ୟଧର୍ମପରାୟଣାଃ ।
ହଵିଷ୍ୟଂଦୋ ମଧୁଷ୍ୟଂଦୋ ଦୃଢନେତ୍ରୋ ମହାରଥଃ ॥ 3 ॥
ପୂର୍ଣେ ଵର୍ଷସହସ୍ରେ ତୁ ବ୍ରହ୍ମା ଲୋକପିତାମହଃ ।
ଅବ୍ରଵୀନ୍ମଧୁରଂ ଵାକ୍ୟଂ ଵିଶ୍ଵାମିତ୍ରଂ ତପୋଧନମ୍ ॥ 4 ॥
ଚିତା ରାଜର୍ଷିଲୋକାସ୍ତେ ତପସା କୁଶିକାତ୍ମଜ ।
ଅନେନ ତପସା ତ୍ଵାଂ ତୁ ରାଜର୍ଷିରିତି ଵିଦ୍ମହେ ॥ 5 ॥
ଏଵମୁକ୍ତ୍ଵା ମହାତେଜା ଜଗାମ ସହ ଦୈଵତୈଃ ।
ତ୍ରିଵିଷ୍ଟପଂ ବ୍ରହ୍ମଲୋକଂ ଲୋକାନାଂ ପରମେଶ୍ଵରଃ ॥ 6 ॥
ଵିଶ୍ଵାମିତ୍ରୋଽପି ତଚ୍ଛ୍ରୁତ୍ଵା ହ୍ରିୟା କିଂଚିଦଵାଙ୍ମୁଖଃ ।
ଦୁଃଖେନ ମହତାଽଽଵିଷ୍ଟସ୍ସମନ୍ୟୁରିଦମବ୍ରଵୀତ୍ ॥ 7 ॥
ତପଶ୍ଚ ସୁମହତ୍ତପ୍ତଂ ରାଜର୍ଷିରିତି ମାଂ ଵିଦୁଃ ।
ଦେଵାସ୍ସର୍ଷିଗଣାସ୍ସର୍ଵେ ନାସ୍ତି ମନ୍ୟେ ତପଃଫଲମ୍ ॥ 8 ॥
ଇତି ନିଶ୍ଚିତ୍ୟ ମନସା ଭୂୟ ଏଵ ମହାତପାଃ ।
ତପଶ୍ଚକାର କାକୁତ୍ସ୍ଥ ପରମଂ ପରମାତ୍ମଵାନ୍ ॥ 9 ॥
ଏତସ୍ମିନ୍ନେଵ କାଲେ ତୁ ସତ୍ୟଵାଦୀ ଜିତେଂଦ୍ରିୟଃ ।
ତ୍ରିଶଂକୁରିତି ଵିଖ୍ୟାତ ଇକ୍ଷ୍ଵାକୁକୁଲଵର୍ଧନଃ ॥ 10 ॥
ତସ୍ୟ ବୁଦ୍ଧିସ୍ସମୁତ୍ପନ୍ନା ୟଜେୟମିତି ରାଘଵ ।
ଗଚ୍ଛେୟଂ ସ୍ଵଶରୀରେଣ ଦେଵାନାଂ ପରମାଂ ଗତିମ୍ ॥ 11 ॥
ସ ଵସିଷ୍ଠଂ ସମାହୂୟ କଥୟାମାସ ଚିଂତିତମ୍ ।
ଅଶକ୍ୟମିତି ଚାପ୍ୟୁକ୍ତୋ ଵସିଷ୍ଠେନ ମହାତ୍ମନା ॥ 12 ॥
ପ୍ରତ୍ୟାଖ୍ୟାତୋ ଵସିଷ୍ଠେନ ସ ୟୟୌଦକ୍ଷିଣାଂ ଦିଶମ୍ ।
ତତସ୍ତତ୍କର୍ମସିଦ୍ଧ୍ୟର୍ଥଂ ପୁତ୍ରାଂ ସ୍ତସ୍ୟ ଗତୋ ନୃପଃ ॥ 13 ॥
ଵାସିଷ୍ଠା ଦୀର୍ଘତପସସ୍ତପୋ ୟତ୍ର ହି ତେପିରେ ।
ତ୍ରିଶଂଂକୁସ୍ସୁମହାତେଜା ଶ୍ଶତଂ ପରମଭାସ୍ଵରମ୍ ॥ 14 ॥
ଵସିଷ୍ଠପୁତ୍ରାନ୍ ଦଦୃଶେ ତପ୍ୟମାନାନ୍ ୟଶସ୍ଵିନଃ ।
ସୋଽଭିଗମ୍ୟ ମହାତ୍ମନସ୍ସର୍ଵାନେଵ ଗୁରୋସ୍ସୁତାନ୍ ॥ 15 ॥
ଅଭିଵାଦ୍ୟାନୁପୂର୍ଵ୍ୟେଣ ହ୍ରିୟା କିଂଚିଦଵାଙ୍ମୁଖଃ ।
ଅବ୍ରଵୀତ୍ସୁମହାଭଗାନ୍ସର୍ଵାନେଵ କୃତାଂଜଲିଃ ॥ 16 ॥
ଶରଣଂ ଵଃ ପ୍ରପଦ୍ୟେଽହଂ ଶରଣ୍ୟାନ୍ ଶରଣାଗତଃ ।
ପ୍ରତ୍ୟାଖ୍ୟାତୋଽସ୍ମି ଭଦ୍ରଂ ଵୋ ଵସିଷ୍ଠେନ ମହାତ୍ମନା ॥ 17 ॥
ୟଷ୍ଟୁକାମୋ ମହାୟଜ୍ଞଂ ତଦନୁଜ୍ଞାତୁମର୍ହଥ ।
ଗୁରୁପୁତ୍ରାନହଂ ସର୍ଵାନ୍ନମସ୍କୃତ୍ୟ ପ୍ରସାଦୟେ ॥ 18 ॥
ଶିରସା ପ୍ରଣତୋ ୟାଚେ ବ୍ରାହ୍ମଣାନ୍ ତପସି ସ୍ଥିତାନ୍ ।
ତେ ମାଂ ଭଵଂତସ୍ସିଦ୍ଧ୍ୟର୍ଥଂ ୟାଜୟଂତୁ ସମାହିତାଃ ॥ 19 ॥
ସଶରୀରୋ ୟଥାଽହଂ ହି ଦେଵଲୋକମଵାପ୍ନୁୟାମ୍ ।
ପ୍ରତ୍ୟାଖ୍ୟାତୋ ଵସିଷ୍ଠେନ ଗତିମନ୍ୟାଂ ତପୋଧନାଃ ॥ 20 ॥
ଗୁରୁପୁତ୍ରାନୃତେ ସର୍ଵାନ୍ନାହଂ ପଶ୍ୟାମି କାଂଚନ ।
ଇକ୍ଷ୍ଵାକୂଣାଂ ହି ସର୍ଵେଷାଂ ପୁରୋଧାଃ ପରମା ଗତିଃ ॥ 21 ॥
ପୁରୋଧସସ୍ତୁ ଵିଦ୍ଵାଂସସ୍ତାରୟଂତି ସଦା ନୃପାନ୍ ।
ତସ୍ମାଦନଂତରଂ ସର୍ଵେ ଭଵଂତୋ ଦୈଵତଂ ମମ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତପଂଚାଶସ୍ସର୍ଗଃ ॥
