śrīmadvālmīkīya rāmāyaṇē bālakāṇḍam ।
atha saptapañchāśassargaḥ ।
tatassantaptahṛdayaḥ smarannigrahamātmanaḥ ।
viniśśvasya viniśśvasya kṛtavairō mahatmanā ॥ 1 ॥
sa dakṣiṇāṃ diśaṃ gatvā mahiṣyā saha rāghava ।
tatāpa paramaṃ ghōraṃ viśvāmitrō mahattapaḥ ॥ 2 ॥
phalamūlāśanō dāntaśchakāra sumahattapaḥ ।
athāsya jajñirē putrāssatyadharmaparāyaṇāḥ ।
haviṣyandō madhuṣyandō dṛḍhanētrō mahārathaḥ ॥ 3 ॥
pūrṇē varṣasahasrē tu brahmā lōkapitāmahaḥ ।
abravīnmadhuraṃ vākyaṃ viśvāmitraṃ tapōdhanam ॥ 4 ॥
chitā rājarṣilōkāstē tapasā kuśikātmaja ।
anēna tapasā tvāṃ tu rājarṣiriti vidmahē ॥ 5 ॥
ēvamuktvā mahātējā jagāma saha daivataiḥ ।
triviṣṭapaṃ brahmalōkaṃ lōkānāṃ paramēśvaraḥ ॥ 6 ॥
viśvāmitrō'pi tachChrutvā hriyā kiñchidavāṅmukhaḥ ।
duḥkhēna mahatā''viṣṭassamanyuridamabravīt ॥ 7 ॥
tapaścha sumahattaptaṃ rājarṣiriti māṃ viduḥ ।
dēvāssarṣigaṇāssarvē nāsti manyē tapaḥphalam ॥ 8 ॥
iti niśchitya manasā bhūya ēva mahātapāḥ ।
tapaśchakāra kākutstha paramaṃ paramātmavān ॥ 9 ॥
ētasminnēva kālē tu satyavādī jitēndriyaḥ ।
triśaṅkuriti vikhyāta ikṣvākukulavardhanaḥ ॥ 10 ॥
tasya buddhissamutpannā yajēyamiti rāghava ।
gachChēyaṃ svaśarīrēṇa dēvānāṃ paramāṃ gatim ॥ 11 ॥
sa vasiṣṭhaṃ samāhūya kathayāmāsa chintitam ।
aśakyamiti chāpyuktō vasiṣṭhēna mahātmanā ॥ 12 ॥
pratyākhyātō vasiṣṭhēna sa yayaudakṣiṇāṃ diśam ।
tatastatkarmasiddhyarthaṃ putrāṃ stasya gatō nṛpaḥ ॥ 13 ॥
vāsiṣṭhā dīrghatapasastapō yatra hi tēpirē ।
triśaṃṅkussumahātējā śśataṃ paramabhāsvaram ॥ 14 ॥
vasiṣṭhaputrān dadṛśē tapyamānān yaśasvinaḥ ।
sō'bhigamya mahātmanassarvānēva gurōssutān ॥ 15 ॥
abhivādyānupūrvyēṇa hriyā kiñchidavāṅmukhaḥ ।
abravītsumahābhagānsarvānēva kṛtāñjaliḥ ॥ 16 ॥
śaraṇaṃ vaḥ prapadyē'haṃ śaraṇyān śaraṇāgataḥ ।
pratyākhyātō'smi bhadraṃ vō vasiṣṭhēna mahātmanā ॥ 17 ॥
yaṣṭukāmō mahāyajñaṃ tadanujñātumarhatha ।
guruputrānahaṃ sarvānnamaskṛtya prasādayē ॥ 18 ॥
śirasā praṇatō yāchē brāhmaṇān tapasi sthitān ।
tē māṃ bhavantassiddhyarthaṃ yājayantu samāhitāḥ ॥ 19 ॥
saśarīrō yathā'haṃ hi dēvalōkamavāpnuyām ।
pratyākhyātō vasiṣṭhēna gatimanyāṃ tapōdhanāḥ ॥ 20 ॥
guruputrānṛtē sarvānnāhaṃ paśyāmi kāñchana ।
ikṣvākūṇāṃ hi sarvēṣāṃ purōdhāḥ paramā gatiḥ ॥ 21 ॥
purōdhasastu vidvāṃsastārayanti sadā nṛpān ।
tasmādanantaraṃ sarvē bhavantō daivataṃ mama ॥ 22 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptapañchāśassargaḥ ॥
