শ্রীমদ্বাল্মীকীয় রামাযণে বালকাংডম্ ।
অথ ষষ্টিতমস্সর্গঃ ।
তপোবলহতান্ কৃত্বা বাসিষ্ঠান্ সমহোদয়ান্ ।
ঋষিমধ্য়ে মহাতেজা বিশ্বামিত্রোঽভ্যভাষত ॥ 1 ॥
অযমিক্ষ্বাকুদায়াদস্ত্রিশংকুরিতি বিশ্রুতঃ ।
ধর্মিষ্ঠশ্চ বদান্যশ্চ মাং চৈব শরণং গতঃ ॥ 2 ॥
তেনানেন শরীরেণ দেবলোকজিগীষয়া ।
যথাঽয়ং স্বশরীরেণ স্বর্গলোকং গমিষ্যতি ॥ 3 ॥
তথা প্রবর্ত্যতাং যজ্ঞে ভবদ্ভিশ্চ ময়া সহ ।
বিশ্বামিত্রবচ শ্শ্রুত্বা সর্ব এব মহর্ষয়ঃ ॥ 4 ॥
ঊচুস্সমেত্য় সহিতা ধর্মজ্ঞা ধর্মসংহিতম্ ।
অয়ং কুশিকদায়াদো মুনিঃ পরমকোপনঃ ॥ 5 ॥
যদাহ বচনং সম্যগেতত্কার্য়ং ন সংশয়ঃ ।
অগ্নিকল্পো হি ভগবান্ শাপং দাস্যতি রোষিতঃ ॥ 6 ॥
তস্মাত্প্রবর্ত্যতাং যজ্ঞ স্সশরীরো যথা দিবম্ ।
গচ্ছেদিক্ষ্বাকুদায়াদো বিশ্বামিত্রস্য় তেজসা ॥ 7 ॥
তথা প্রবর্ত্যতাং যজ্ঞ স্সর্বে সমধিতিষ্ঠত ।
এবমুক্ত্বা মহর্ষয়ঃ চক্রুস্তাস্তাঃক্রিয়াস্তদা ॥ 8 ॥
যাজকশ্চ মহাতেজা বিশ্বামিত্রোঽভবত্ক্রতৌ ।
ঋত্বিজশ্চানুপূর্ব্য়েণ মংত্রবন্মংত্রকোবিদাঃ ॥ 9 ॥
চক্রুঃ কর্মাণি সর্বাণি যথাকল্পং যথাবিধি ।
ততঃ কালেন মহতা বিশ্বামিত্রো মহাতপাঃ ॥ 10 ॥
চকারাবাহনং তত্র ভাগার্থং সর্বদেবতাঃ ।
নাভ্য়াগমংস্তদাহূতা ভাগার্থং সর্বদেবতাঃ ॥ 11 ॥
ততঃ ক্রোধসমাবিষ্টো বিশ্বামিত্রো মহামুনিঃ ।
স্রুবমুদ্যম্য় সক্রোধস্ত্রিশংকুমিদমব্রবীত্ ॥ 12 ॥
পশ্য় মে তপসো বীর্য়ং স্বার্জিতস্য় নরেশ্বর ।
এষ ত্বাং সশরীরেণ নয়ামি স্বর্গমোজসা ॥ 13 ॥
দুষ্প্রাপং সশরীরেণ দিবং গচ্ছ নরাধিপ ।
স্বার্জিতং কিংচিদপ্যস্তি ময়া হি তপসঃফলম্ ॥ 14 ॥
রাজন্ স্বতেজসা তস্য় সশরীরো দিবং ব্রজ ।
উক্তবাক্য়ে মুনৌ তস্মিন্ সশরীরো নরেশ্বরঃ ॥ 15 ॥
দিবং জগাম কাকুত্স্থ মুনীনাং পশ্যতাং তদা ।
দেবলোকগতং দৃষ্ট্বা ত্রিশংকুং পাকশাসনঃ ॥ 16 ॥
সহ সর্বৈস্সুরগণৈরিদং বচনমব্রবীত্ ।
ত্রিশংকো গচ্ছ ভূযস্ত্বং নাসি স্বর্গকৃতালয়ঃ ॥ 17 ॥
গুরুশাপহতো মূঢ পত ভূমিমবাক্ছিরাঃ ।
এবমুক্তো মহেংদ্রেণ ত্রিশংকুরপতত্পুনঃ ॥ 18 ॥
বিক্রোশমানস্ত্রাহীতি বিশ্বামিত্রং তপোধনম্ ।
তচ্ছ্রুত্বা বচনং তস্য় ক্রোশমানস্য় কৌশিকঃ ॥ 19 ॥
রোষমাহারযত্তীব্রং তিষ্ঠ তিষ্ঠেতি চাব্রবীত্ ।
ঋষিমধ্য়ে স তেজস্স্বী প্রজাপতিরিবাপরঃ ॥ 20 ॥
সৃজন্ দক্ষিণমার্গস্থান্ সপ্তর্ষীনপরান্ পুনঃ ।
নক্ষত্রমালামপরামসৃজত্ক্রোধমূর্চ্ছিতঃ ॥ 21 ॥
দক্ষিণাং দিশমাস্থায় মুনিমধ্য়ে মহাযশাঃ ।
সৃষ্ট্বা নক্ষত্রবংশং চ ক্রোধেন কলুষীকৃতঃ ॥ 22 ॥
অন্যমিংদ্রং করিষ্য়ামি লোকো বা স্য়াদনিংদ্রকঃ ।
দৈবতান্যপি স ক্রোধা ত্স্রষ্টুং সমুপচক্রমে ॥ 23 ॥
ততঃ পরমসংভ্রাংতাস্সর্ষিসংঘাস্সুরাসুরাঃ ।
বিশ্বামিত্রং মহাত্মানমূচুঃ সানুনয়ং বচঃ ॥ 24 ॥
অয়ং রাজা মহাভাগ গুরুশাপপরিক্ষতঃ ।
সশরীরো দিবং যাতুং নার্হত্য়েব তপোধন ॥ 25 ॥
তেষাং তদ্বচনং শ্রুত্বা দেবানাং মুনিপুংগবঃ ।
অব্রবীত্সুমহদ্বাক্য়ং কৌশিকঃ সর্বদেবতাঃ ॥ 26 ॥
সশরীরস্য় ভদ্রং বস্ত্রিশংকোরস্য় ভূপতেঃ ।
আরোহণং প্রতিজ্ঞায় নানৃতং কর্তুমুত্সহে ॥ 27 ॥
স্বর্গোঽস্তু সশরীরস্য় ত্রিশংকোরস্য় শাশ্বতঃ ।
নক্ষত্রাণি চ সর্বাণি মামকানি ধ্রুবাণ্যথ ॥ 28 ॥
যাবল্লোকা ধরিষ্য়ংতি তিষ্ঠংত্বেতানি সর্বশঃ ।
মত্কৃতানি সুরা স্সর্বে তদনুজ্ঞাতুমর্হথ ॥ 29 ॥
এবমুক্তাঃ সুরাস্সর্বে প্রত্য়ূচুর্মুনিপুংগবম্ ।
এবং ভবতু ভদ্রং তে তিষ্ঠংত্বেতানি সর্বশঃ ॥ 30 ॥
গগনে তান্যনেকানি বৈশ্বানরপথাদ্বহিঃ ।
নক্ষত্রাণি মুনিশ্রেষ্ঠ তেষু জ্য়োতিষ্ষু জাজ্বলন্ ॥ 31 ॥
অবাক্ছিরাস্ত্রিশংকুশ্চ তিষ্ঠত্বমরসন্নিভঃ ।
অনুয়াস্য়ংতি চৈতানি জ্য়োতীংষি নৃপসত্তমম্ ॥ 32 ॥
কৃতার্থং কীর্তিমংতং চ স্বর্গলোকগতং যথা ।
বিশ্বামিত্রস্তু ধর্মাত্মা সর্বদেবৈরভিষ্টুতঃ ॥ 33 ॥
ঋষিভিশ্চ মহাতেজা বাঢমিত্য়াহ দেবতাঃ ।
ততো দেবা মহাত্মানো মুনযশ্চ তপোধনাঃ ।
জগ্মুর্যথাঽঽগতং সর্বে যজ্ঞস্য়াংতে নরোত্তম ॥ 34 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে ষষ্টিতমস্সর্গঃ ॥
