śrīmadvālmīkīya rāmāyaṇē bālakāṇḍam ।
atha ṣaṣṭitamassargaḥ ।
tapōbalahatān kṛtvā vāsiṣṭhān samahōdayān ।
ṛṣimadhyē mahātējā viśvāmitrō'bhyabhāṣata ॥ 1 ॥
ayamikṣvākudāyādastriśaṅkuriti viśrutaḥ ।
dharmiṣṭhaścha vadānyaścha māṃ chaiva śaraṇaṃ gataḥ ॥ 2 ॥
tēnānēna śarīrēṇa dēvalōkajigīṣayā ।
yathā'yaṃ svaśarīrēṇa svargalōkaṃ gamiṣyati ॥ 3 ॥
tathā pravartyatāṃ yajñē bhavadbhiścha mayā saha ।
viśvāmitravacha śśrutvā sarva ēva maharṣayaḥ ॥ 4 ॥
ūchussamētya sahitā dharmajñā dharmasaṃhitam ।
ayaṃ kuśikadāyādō muniḥ paramakōpanaḥ ॥ 5 ॥
yadāha vachanaṃ samyagētatkāryaṃ na saṃśayaḥ ।
agnikalpō hi bhagavān śāpaṃ dāsyati rōṣitaḥ ॥ 6 ॥
tasmātpravartyatāṃ yajña ssaśarīrō yathā divam ।
gachChēdikṣvākudāyādō viśvāmitrasya tējasā ॥ 7 ॥
tathā pravartyatāṃ yajña ssarvē samadhitiṣṭhata ।
ēvamuktvā maharṣayaḥ chakrustāstāḥkriyāstadā ॥ 8 ॥
yājakaścha mahātējā viśvāmitrō'bhavatkratau ।
ṛtvijaśchānupūrvyēṇa mantravanmantrakōvidāḥ ॥ 9 ॥
chakruḥ karmāṇi sarvāṇi yathākalpaṃ yathāvidhi ।
tataḥ kālēna mahatā viśvāmitrō mahātapāḥ ॥ 10 ॥
chakārāvāhanaṃ tatra bhāgārthaṃ sarvadēvatāḥ ।
nābhyāgamaṃstadāhūtā bhāgārthaṃ sarvadēvatāḥ ॥ 11 ॥
tataḥ krōdhasamāviṣṭō viśvāmitrō mahāmuniḥ ।
sruvamudyamya sakrōdhastriśaṅkumidamabravīt ॥ 12 ॥
paśya mē tapasō vīryaṃ svārjitasya narēśvara ।
ēṣa tvāṃ saśarīrēṇa nayāmi svargamōjasā ॥ 13 ॥
duṣprāpaṃ saśarīrēṇa divaṃ gachCha narādhipa ।
svārjitaṃ kiñchidapyasti mayā hi tapasaḥphalam ॥ 14 ॥
rājan svatējasā tasya saśarīrō divaṃ vraja ।
uktavākyē munau tasmin saśarīrō narēśvaraḥ ॥ 15 ॥
divaṃ jagāma kākutstha munīnāṃ paśyatāṃ tadā ।
dēvalōkagataṃ dṛṣṭvā triśaṅkuṃ pākaśāsanaḥ ॥ 16 ॥
saha sarvaissuragaṇairidaṃ vachanamabravīt ।
triśaṅkō gachCha bhūyastvaṃ nāsi svargakṛtālayaḥ ॥ 17 ॥
guruśāpahatō mūḍha pata bhūmimavākChirāḥ ।
ēvamuktō mahēndrēṇa triśaṅkurapatatpunaḥ ॥ 18 ॥
vikrōśamānastrāhīti viśvāmitraṃ tapōdhanam ।
tachChrutvā vachanaṃ tasya krōśamānasya kauśikaḥ ॥ 19 ॥
rōṣamāhārayattīvraṃ tiṣṭha tiṣṭhēti chābravīt ।
ṛṣimadhyē sa tējassvī prajāpatirivāparaḥ ॥ 20 ॥
sṛjan dakṣiṇamārgasthān saptarṣīnaparān punaḥ ।
nakṣatramālāmaparāmasṛjatkrōdhamūrchChitaḥ ॥ 21 ॥
dakṣiṇāṃ diśamāsthāya munimadhyē mahāyaśāḥ ।
sṛṣṭvā nakṣatravaṃśaṃ cha krōdhēna kaluṣīkṛtaḥ ॥ 22 ॥
anyamindraṃ kariṣyāmi lōkō vā syādanindrakaḥ ।
daivatānyapi sa krōdhā tsraṣṭuṃ samupachakramē ॥ 23 ॥
tataḥ paramasambhrāntāssarṣisaṅghāssurāsurāḥ ।
viśvāmitraṃ mahātmānamūchuḥ sānunayaṃ vachaḥ ॥ 24 ॥
ayaṃ rājā mahābhāga guruśāpaparikṣataḥ ।
saśarīrō divaṃ yātuṃ nārhatyēva tapōdhana ॥ 25 ॥
tēṣāṃ tadvachanaṃ śrutvā dēvānāṃ munipuṅgavaḥ ।
abravītsumahadvākyaṃ kauśikaḥ sarvadēvatāḥ ॥ 26 ॥
saśarīrasya bhadraṃ vastriśaṅkōrasya bhūpatēḥ ।
ārōhaṇaṃ pratijñāya nānṛtaṃ kartumutsahē ॥ 27 ॥
svargō'stu saśarīrasya triśaṅkōrasya śāśvataḥ ।
nakṣatrāṇi cha sarvāṇi māmakāni dhruvāṇyatha ॥ 28 ॥
yāvallōkā dhariṣyanti tiṣṭhantvētāni sarvaśaḥ ।
matkṛtāni surā ssarvē tadanujñātumarhatha ॥ 29 ॥
ēvamuktāḥ surāssarvē pratyūchurmunipuṅgavam ।
ēvaṃ bhavatu bhadraṃ tē tiṣṭhantvētāni sarvaśaḥ ॥ 30 ॥
gaganē tānyanēkāni vaiśvānarapathādbahiḥ ।
nakṣatrāṇi muniśrēṣṭha tēṣu jyōtiṣṣu jājvalan ॥ 31 ॥
avākChirāstriśaṅkuścha tiṣṭhatvamarasannibhaḥ ।
anuyāsyanti chaitāni jyōtīṃṣi nṛpasattamam ॥ 32 ॥
kṛtārthaṃ kīrtimantaṃ cha svargalōkagataṃ yathā ।
viśvāmitrastu dharmātmā sarvadēvairabhiṣṭutaḥ ॥ 33 ॥
ṛṣibhiścha mahātējā bāḍhamityāha dēvatāḥ ।
tatō dēvā mahātmānō munayaścha tapōdhanāḥ ।
jagmuryathā''gataṃ sarvē yajñasyāntē narōttama ॥ 34 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṣṭitamassargaḥ ॥
