ശ്രീമദ്വാല്മീകീയ രാമായണേ ബാലകാംഡമ് ।
അഥ ഷഷ്ടിതമസ്സര്ഗഃ ।
തപോബലഹതാന് കൃത്വാ വാസിഷ്ഠാന് സമഹോദയാന് ।
ഋഷിമധ്യേ മഹാതേജാ വിശ്വാമിത്രോഽഭ്യഭാഷത ॥ 1 ॥
അയമിക്ഷ്വാകുദായാദസ്ത്രിശംകുരിതി വിശ്രുതഃ ।
ധര്മിഷ്ഠശ്ച വദാന്യശ്ച മാം ചൈവ ശരണം ഗതഃ ॥ 2 ॥
തേനാനേന ശരീരേണ ദേവലോകജിഗീഷയാ ।
യഥാഽയം സ്വശരീരേണ സ്വര്ഗലോകം ഗമിഷ്യതി ॥ 3 ॥
തഥാ പ്രവര്ത്യതാം യജ്ഞേ ഭവദ്ഭിശ്ച മയാ സഹ ।
വിശ്വാമിത്രവച ശ്ശ്രുത്വാ സർവ ഏവ മഹര്ഷയഃ ॥ 4 ॥
ഊചുസ്സമേത്യ സഹിതാ ധര്മജ്ഞാ ധര്മസംഹിതമ് ।
അയം കുശികദായാദോ മുനിഃ പരമകോപനഃ ॥ 5 ॥
യദാഹ വചനം സമ്യഗേതത്കാര്യം ന സംശയഃ ।
അഗ്നികല്പോ ഹി ഭഗവാന് ശാപം ദാസ്യതി രോഷിതഃ ॥ 6 ॥
തസ്മാത്പ്രവര്ത്യതാം യജ്ഞ സ്സശരീരോ യഥാ ദിവമ് ।
ഗച്ഛേദിക്ഷ്വാകുദായാദോ വിശ്വാമിത്രസ്യ തേജസാ ॥ 7 ॥
തഥാ പ്രവര്ത്യതാം യജ്ഞ സ്സർവേ സമധിതിഷ്ഠത ।
ഏവമുക്ത്വാ മഹര്ഷയഃ ചക്രുസ്താസ്താഃക്രിയാസ്തദാ ॥ 8 ॥
യാജകശ്ച മഹാതേജാ വിശ്വാമിത്രോഽഭവത്ക്രതൌ ।
ഋത്വിജശ്ചാനുപൂർവ്യേണ മംത്രവന്മംത്രകോവിദാഃ ॥ 9 ॥
ചക്രുഃ കര്മാണി സർവാണി യഥാകല്പം യഥാവിധി ।
തതഃ കാലേന മഹതാ വിശ്വാമിത്രോ മഹാതപാഃ ॥ 10 ॥
ചകാരാവാഹനം തത്ര ഭാഗാര്ഥം സർവദേവതാഃ ।
നാഭ്യാഗമംസ്തദാഹൂതാ ഭാഗാര്ഥം സർവദേവതാഃ ॥ 11 ॥
തതഃ ക്രോധസമാവിഷ്ടോ വിശ്വാമിത്രോ മഹാമുനിഃ ।
സ്രുവമുദ്യമ്യ സക്രോധസ്ത്രിശംകുമിദമബ്രവീത് ॥ 12 ॥
പശ്യ മേ തപസോ വീര്യം സ്വാര്ജിതസ്യ നരേശ്വര ।
ഏഷ ത്വാം സശരീരേണ നയാമി സ്വര്ഗമോജസാ ॥ 13 ॥
ദുഷ്പ്രാപം സശരീരേണ ദിവം ഗച്ഛ നരാധിപ ।
സ്വാര്ജിതം കിംചിദപ്യസ്തി മയാ ഹി തപസഃഫലമ് ॥ 14 ॥
രാജന് സ്വതേജസാ തസ്യ സശരീരോ ദിവം വ്രജ ।
ഉക്തവാക്യേ മുനൌ തസ്മിന് സശരീരോ നരേശ്വരഃ ॥ 15 ॥
ദിവം ജഗാമ കാകുത്സ്ഥ മുനീനാം പശ്യതാം തദാ ।
ദേവലോകഗതം ദൃഷ്ട്വാ ത്രിശംകും പാകശാസനഃ ॥ 16 ॥
സഹ സർവൈസ്സുരഗണൈരിദം വചനമബ്രവീത് ।
ത്രിശംകോ ഗച്ഛ ഭൂയസ്ത്വം നാസി സ്വര്ഗകൃതാലയഃ ॥ 17 ॥
ഗുരുശാപഹതോ മൂഢ പത ഭൂമിമവാക്ഛിരാഃ ।
ഏവമുക്തോ മഹേംദ്രേണ ത്രിശംകുരപതത്പുനഃ ॥ 18 ॥
വിക്രോശമാനസ്ത്രാഹീതി വിശ്വാമിത്രം തപോധനമ് ।
തച്ഛ്രുത്വാ വചനം തസ്യ ക്രോശമാനസ്യ കൌശികഃ ॥ 19 ॥
രോഷമാഹാരയത്തീവ്രം തിഷ്ഠ തിഷ്ഠേതി ചാബ്രവീത് ।
ഋഷിമധ്യേ സ തേജസ്സ്വീ പ്രജാപതിരിവാപരഃ ॥ 20 ॥
സൃജന് ദക്ഷിണമാര്ഗസ്ഥാന് സപ്തര്ഷീനപരാന് പുനഃ ।
നക്ഷത്രമാലാമപരാമസൃജത്ക്രോധമൂര്ച്ഛിതഃ ॥ 21 ॥
ദക്ഷിണാം ദിശമാസ്ഥായ മുനിമധ്യേ മഹായശാഃ ।
സൃഷ്ട്വാ നക്ഷത്രവംശം ച ക്രോധേന കലുഷീകൃതഃ ॥ 22 ॥
അന്യമിംദ്രം കരിഷ്യാമി ലോകോ വാ സ്യാദനിംദ്രകഃ ।
ദൈവതാന്യപി സ ക്രോധാ ത്സ്രഷ്ടും സമുപചക്രമേ ॥ 23 ॥
തതഃ പരമസംഭ്രാംതാസ്സര്ഷിസംഘാസ്സുരാസുരാഃ ।
വിശ്വാമിത്രം മഹാത്മാനമൂചുഃ സാനുനയം വചഃ ॥ 24 ॥
അയം രാജാ മഹാഭാഗ ഗുരുശാപപരിക്ഷതഃ ।
സശരീരോ ദിവം യാതും നാര്ഹത്യേവ തപോധന ॥ 25 ॥
തേഷാം തദ്വചനം ശ്രുത്വാ ദേവാനാം മുനിപുംഗവഃ ।
അബ്രവീത്സുമഹദ്വാക്യം കൌശികഃ സർവദേവതാഃ ॥ 26 ॥
സശരീരസ്യ ഭദ്രം വസ്ത്രിശംകോരസ്യ ഭൂപതേഃ ।
ആരോഹണം പ്രതിജ്ഞായ നാനൃതം കര്തുമുത്സഹേ ॥ 27 ॥
സ്വര്ഗോഽസ്തു സശരീരസ്യ ത്രിശംകോരസ്യ ശാശ്വതഃ ।
നക്ഷത്രാണി ച സർവാണി മാമകാനി ധ്രുവാണ്യഥ ॥ 28 ॥
യാവല്ലോകാ ധരിഷ്യംതി തിഷ്ഠംത്വേതാനി സർവശഃ ।
മത്കൃതാനി സുരാ സ്സർവേ തദനുജ്ഞാതുമര്ഹഥ ॥ 29 ॥
ഏവമുക്താഃ സുരാസ്സർവേ പ്രത്യൂചുര്മുനിപുംഗവമ് ।
ഏവം ഭവതു ഭദ്രം തേ തിഷ്ഠംത്വേതാനി സർവശഃ ॥ 30 ॥
ഗഗനേ താന്യനേകാനി വൈശ്വാനരപഥാദ്ബഹിഃ ।
നക്ഷത്രാണി മുനിശ്രേഷ്ഠ തേഷു ജ്യോതിഷ്ഷു ജാജ്വലന് ॥ 31 ॥
അവാക്ഛിരാസ്ത്രിശംകുശ്ച തിഷ്ഠത്വമരസന്നിഭഃ ।
അനുയാസ്യംതി ചൈതാനി ജ്യോതീംഷി നൃപസത്തമമ് ॥ 32 ॥
കൃതാര്ഥം കീര്തിമംതം ച സ്വര്ഗലോകഗതം യഥാ ।
വിശ്വാമിത്രസ്തു ധര്മാത്മാ സർവദേവൈരഭിഷ്ടുതഃ ॥ 33 ॥
ഋഷിഭിശ്ച മഹാതേജാ ബാഢമിത്യാഹ ദേവതാഃ ।
തതോ ദേവാ മഹാത്മാനോ മുനയശ്ച തപോധനാഃ ।
ജഗ്മുര്യഥാഽഽഗതം സർവേ യജ്ഞസ്യാംതേ നരോത്തമ ॥ 34 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷഷ്ടിതമസ്സര്ഗഃ ॥
