ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଷ୍ଟିତମସ୍ସର୍ଗଃ ।
ତପୋବଲହତାନ୍ କୃତ୍ଵା ଵାସିଷ୍ଠାନ୍ ସମହୋଦୟାନ୍ ।
ଋଷିମଧ୍ୟେ ମହାତେଜା ଵିଶ୍ଵାମିତ୍ରୋଽଭ୍ୟଭାଷତ ॥ 1 ॥
ଅୟମିକ୍ଷ୍ଵାକୁଦାୟାଦସ୍ତ୍ରିଶଂକୁରିତି ଵିଶ୍ରୁତଃ ।
ଧର୍ମିଷ୍ଠଶ୍ଚ ଵଦାନ୍ୟଶ୍ଚ ମାଂ ଚୈଵ ଶରଣଂ ଗତଃ ॥ 2 ॥
ତେନାନେନ ଶରୀରେଣ ଦେଵଲୋକଜିଗୀଷୟା ।
ୟଥାଽୟଂ ସ୍ଵଶରୀରେଣ ସ୍ଵର୍ଗଲୋକଂ ଗମିଷ୍ୟତି ॥ 3 ॥
ତଥା ପ୍ରଵର୍ତ୍ୟତାଂ ୟଜ୍ଞେ ଭଵଦ୍ଭିଶ୍ଚ ମୟା ସହ ।
ଵିଶ୍ଵାମିତ୍ରଵଚ ଶ୍ଶ୍ରୁତ୍ଵା ସର୍ଵ ଏଵ ମହର୍ଷୟଃ ॥ 4 ॥
ଊଚୁସ୍ସମେତ୍ୟ ସହିତା ଧର୍ମଜ୍ଞା ଧର୍ମସଂହିତମ୍ ।
ଅୟଂ କୁଶିକଦାୟାଦୋ ମୁନିଃ ପରମକୋପନଃ ॥ 5 ॥
ୟଦାହ ଵଚନଂ ସମ୍ୟଗେତତ୍କାର୍ୟଂ ନ ସଂଶୟଃ ।
ଅଗ୍ନିକଲ୍ପୋ ହି ଭଗଵାନ୍ ଶାପଂ ଦାସ୍ୟତି ରୋଷିତଃ ॥ 6 ॥
ତସ୍ମାତ୍ପ୍ରଵର୍ତ୍ୟତାଂ ୟଜ୍ଞ ସ୍ସଶରୀରୋ ୟଥା ଦିଵମ୍ ।
ଗଚ୍ଛେଦିକ୍ଷ୍ଵାକୁଦାୟାଦୋ ଵିଶ୍ଵାମିତ୍ରସ୍ୟ ତେଜସା ॥ 7 ॥
ତଥା ପ୍ରଵର୍ତ୍ୟତାଂ ୟଜ୍ଞ ସ୍ସର୍ଵେ ସମଧିତିଷ୍ଠତ ।
ଏଵମୁକ୍ତ୍ଵା ମହର୍ଷୟଃ ଚକ୍ରୁସ୍ତାସ୍ତାଃକ୍ରିୟାସ୍ତଦା ॥ 8 ॥
ୟାଜକଶ୍ଚ ମହାତେଜା ଵିଶ୍ଵାମିତ୍ରୋଽଭଵତ୍କ୍ରତୌ ।
ଋତ୍ଵିଜଶ୍ଚାନୁପୂର୍ଵ୍ୟେଣ ମଂତ୍ରଵନ୍ମଂତ୍ରକୋଵିଦାଃ ॥ 9 ॥
ଚକ୍ରୁଃ କର୍ମାଣି ସର୍ଵାଣି ୟଥାକଲ୍ପଂ ୟଥାଵିଧି ।
ତତଃ କାଲେନ ମହତା ଵିଶ୍ଵାମିତ୍ରୋ ମହାତପାଃ ॥ 10 ॥
ଚକାରାଵାହନଂ ତତ୍ର ଭାଗାର୍ଥଂ ସର୍ଵଦେଵତାଃ ।
ନାଭ୍ୟାଗମଂସ୍ତଦାହୂତା ଭାଗାର୍ଥଂ ସର୍ଵଦେଵତାଃ ॥ 11 ॥
ତତଃ କ୍ରୋଧସମାଵିଷ୍ଟୋ ଵିଶ୍ଵାମିତ୍ରୋ ମହାମୁନିଃ ।
ସ୍ରୁଵମୁଦ୍ୟମ୍ୟ ସକ୍ରୋଧସ୍ତ୍ରିଶଂକୁମିଦମବ୍ରଵୀତ୍ ॥ 12 ॥
ପଶ୍ୟ ମେ ତପସୋ ଵୀର୍ୟଂ ସ୍ଵାର୍ଜିତସ୍ୟ ନରେଶ୍ଵର ।
ଏଷ ତ୍ଵାଂ ସଶରୀରେଣ ନୟାମି ସ୍ଵର୍ଗମୋଜସା ॥ 13 ॥
ଦୁଷ୍ପ୍ରାପଂ ସଶରୀରେଣ ଦିଵଂ ଗଚ୍ଛ ନରାଧିପ ।
ସ୍ଵାର୍ଜିତଂ କିଂଚିଦପ୍ୟସ୍ତି ମୟା ହି ତପସଃଫଲମ୍ ॥ 14 ॥
ରାଜନ୍ ସ୍ଵତେଜସା ତସ୍ୟ ସଶରୀରୋ ଦିଵଂ ଵ୍ରଜ ।
ଉକ୍ତଵାକ୍ୟେ ମୁନୌ ତସ୍ମିନ୍ ସଶରୀରୋ ନରେଶ୍ଵରଃ ॥ 15 ॥
ଦିଵଂ ଜଗାମ କାକୁତ୍ସ୍ଥ ମୁନୀନାଂ ପଶ୍ୟତାଂ ତଦା ।
ଦେଵଲୋକଗତଂ ଦୃଷ୍ଟ୍ଵା ତ୍ରିଶଂକୁଂ ପାକଶାସନଃ ॥ 16 ॥
ସହ ସର୍ଵୈସ୍ସୁରଗଣୈରିଦଂ ଵଚନମବ୍ରଵୀତ୍ ।
ତ୍ରିଶଂକୋ ଗଚ୍ଛ ଭୂୟସ୍ତ୍ଵଂ ନାସି ସ୍ଵର୍ଗକୃତାଲୟଃ ॥ 17 ॥
ଗୁରୁଶାପହତୋ ମୂଢ ପତ ଭୂମିମଵାକ୍ଛିରାଃ ।
ଏଵମୁକ୍ତୋ ମହେଂଦ୍ରେଣ ତ୍ରିଶଂକୁରପତତ୍ପୁନଃ ॥ 18 ॥
ଵିକ୍ରୋଶମାନସ୍ତ୍ରାହୀତି ଵିଶ୍ଵାମିତ୍ରଂ ତପୋଧନମ୍ ।
ତଚ୍ଛ୍ରୁତ୍ଵା ଵଚନଂ ତସ୍ୟ କ୍ରୋଶମାନସ୍ୟ କୌଶିକଃ ॥ 19 ॥
ରୋଷମାହାରୟତ୍ତୀଵ୍ରଂ ତିଷ୍ଠ ତିଷ୍ଠେତି ଚାବ୍ରଵୀତ୍ ।
ଋଷିମଧ୍ୟେ ସ ତେଜସ୍ସ୍ଵୀ ପ୍ରଜାପତିରିଵାପରଃ ॥ 20 ॥
ସୃଜନ୍ ଦକ୍ଷିଣମାର୍ଗସ୍ଥାନ୍ ସପ୍ତର୍ଷୀନପରାନ୍ ପୁନଃ ।
ନକ୍ଷତ୍ରମାଲାମପରାମସୃଜତ୍କ୍ରୋଧମୂର୍ଚ୍ଛିତଃ ॥ 21 ॥
ଦକ୍ଷିଣାଂ ଦିଶମାସ୍ଥାୟ ମୁନିମଧ୍ୟେ ମହାୟଶାଃ ।
ସୃଷ୍ଟ୍ଵା ନକ୍ଷତ୍ରଵଂଶଂ ଚ କ୍ରୋଧେନ କଲୁଷୀକୃତଃ ॥ 22 ॥
ଅନ୍ୟମିଂଦ୍ରଂ କରିଷ୍ୟାମି ଲୋକୋ ଵା ସ୍ୟାଦନିଂଦ୍ରକଃ ।
ଦୈଵତାନ୍ୟପି ସ କ୍ରୋଧା ତ୍ସ୍ରଷ୍ଟୁଂ ସମୁପଚକ୍ରମେ ॥ 23 ॥
ତତଃ ପରମସଂଭ୍ରାଂତାସ୍ସର୍ଷିସଂଘାସ୍ସୁରାସୁରାଃ ।
ଵିଶ୍ଵାମିତ୍ରଂ ମହାତ୍ମାନମୂଚୁଃ ସାନୁନୟଂ ଵଚଃ ॥ 24 ॥
ଅୟଂ ରାଜା ମହାଭାଗ ଗୁରୁଶାପପରିକ୍ଷତଃ ।
ସଶରୀରୋ ଦିଵଂ ୟାତୁଂ ନାର୍ହତ୍ୟେଵ ତପୋଧନ ॥ 25 ॥
ତେଷାଂ ତଦ୍ଵଚନଂ ଶ୍ରୁତ୍ଵା ଦେଵାନାଂ ମୁନିପୁଂଗଵଃ ।
ଅବ୍ରଵୀତ୍ସୁମହଦ୍ଵାକ୍ୟଂ କୌଶିକଃ ସର୍ଵଦେଵତାଃ ॥ 26 ॥
ସଶରୀରସ୍ୟ ଭଦ୍ରଂ ଵସ୍ତ୍ରିଶଂକୋରସ୍ୟ ଭୂପତେଃ ।
ଆରୋହଣଂ ପ୍ରତିଜ୍ଞାୟ ନାନୃତଂ କର୍ତୁମୁତ୍ସହେ ॥ 27 ॥
ସ୍ଵର୍ଗୋଽସ୍ତୁ ସଶରୀରସ୍ୟ ତ୍ରିଶଂକୋରସ୍ୟ ଶାଶ୍ଵତଃ ।
ନକ୍ଷତ୍ରାଣି ଚ ସର୍ଵାଣି ମାମକାନି ଧ୍ରୁଵାଣ୍ୟଥ ॥ 28 ॥
ୟାଵଲ୍ଲୋକା ଧରିଷ୍ୟଂତି ତିଷ୍ଠଂତ୍ଵେତାନି ସର୍ଵଶଃ ।
ମତ୍କୃତାନି ସୁରା ସ୍ସର୍ଵେ ତଦନୁଜ୍ଞାତୁମର୍ହଥ ॥ 29 ॥
ଏଵମୁକ୍ତାଃ ସୁରାସ୍ସର୍ଵେ ପ୍ରତ୍ୟୂଚୁର୍ମୁନିପୁଂଗଵମ୍ ।
ଏଵଂ ଭଵତୁ ଭଦ୍ରଂ ତେ ତିଷ୍ଠଂତ୍ଵେତାନି ସର୍ଵଶଃ ॥ 30 ॥
ଗଗନେ ତାନ୍ୟନେକାନି ଵୈଶ୍ଵାନରପଥାଦ୍ବହିଃ ।
ନକ୍ଷତ୍ରାଣି ମୁନିଶ୍ରେଷ୍ଠ ତେଷୁ ଜ୍ୟୋତିଷ୍ଷୁ ଜାଜ୍ଵଲନ୍ ॥ 31 ॥
ଅଵାକ୍ଛିରାସ୍ତ୍ରିଶଂକୁଶ୍ଚ ତିଷ୍ଠତ୍ଵମରସନ୍ନିଭଃ ।
ଅନୁୟାସ୍ୟଂତି ଚୈତାନି ଜ୍ୟୋତୀଂଷି ନୃପସତ୍ତମମ୍ ॥ 32 ॥
କୃତାର୍ଥଂ କୀର୍ତିମଂତଂ ଚ ସ୍ଵର୍ଗଲୋକଗତଂ ୟଥା ।
ଵିଶ୍ଵାମିତ୍ରସ୍ତୁ ଧର୍ମାତ୍ମା ସର୍ଵଦେଵୈରଭିଷ୍ଟୁତଃ ॥ 33 ॥
ଋଷିଭିଶ୍ଚ ମହାତେଜା ବାଢମିତ୍ୟାହ ଦେଵତାଃ ।
ତତୋ ଦେଵା ମହାତ୍ମାନୋ ମୁନୟଶ୍ଚ ତପୋଧନାଃ ।
ଜଗ୍ମୁର୍ୟଥାଽଽଗତଂ ସର୍ଵେ ୟଜ୍ଞସ୍ୟାଂତେ ନରୋତ୍ତମ ॥ 34 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଷ୍ଟିତମସ୍ସର୍ଗଃ ॥
