શ્રીમદ્વાલ્મીકીય રામાયણે અયોધ્યાકાંડમ્ ।
અથ એકોનસપ્તતિતમસ્સર્ગઃ ।
યામેવ રાત્રિં તે દૂતાઃ પ્રવિશંતિ સ્મ તાં પુરીમ્ ।
ભરતેનાપિ તાં રાત્રિં સ્વપ્નો દૃષ્ટોઽયમપ્રિયઃ ॥ 1 ॥
વ્યુષ્ટામેવ તુ તાં રાત્રિં દૃષ્ટ્વા તં સ્વપ્નમપ્રિયમ્ ।
પુત્રો રાજાધિરાજસ્ય સુભૃશં પર્યતપ્યત ॥ 2 ॥
તપ્યમાનં સમાજ્ઞાય વયસ્યાઃ પ્રિયવાદિનઃ ।
આયાસં હિ વિનેષ્યંત સ્સભાયાં ચક્રિરે કથાઃ ॥ 3 ॥
વાદયંતિ તથા શાંતિં લાસ યંત્યપિ ચાપરે ।
નાટકાન્યપરે પ્રાહુર્હાસ્યાનિ વિવિધાનિ ચ ॥ 4 ॥
સ તૈર્મહાત્મા ભરતસ્સખિભિઃ પ્રિયવાદિભિઃ ।
ગોષ્ઠીહાસ્યાનિ કુર્વદ્ભિર્ન પ્રાહૃષ્યત રાઘવઃ ॥ 5 ॥
તમબ્રવીત્પ્રિયસખો ભરતં સખિભિર્વૃતમ્ ।
સુહૃદ્ભિઃ પર્યુપાસીનઃ કિં સખે નાનુમોદસે ॥ 6 ॥
એવં બ્રુવાણં સુહૃદં ભરતઃ પ્રત્યુવાચ હ ।
શ્રુણુ ત્વં યન્નિમિત્તં મે દૈન્યમેતદુપાગતમ્ ॥ 7 ॥
સ્વપ્ને પિતરમદ્રાક્ષં મલિનં મુક્ત મૂર્ધજમ્ ।
પતંતમદ્રિશિખરાત્કલુષે ગોમયહ્રદે ॥ 8 ॥
પ્લવમાનશ્ચ મે દૃષ્ટસ્સ તસ્મિન્ગોમયહ્રદે ।
પિબન્નંજલિના તૈલં હસન્નપિ મુહુર્મુહુઃ ॥ 9 ॥
તતસ્તિલૌદનં ભુક્ત્વા પુનઃ પુનરધશ્શિરાઃ ।
તૈલેનાભ્યક્તસર્વાંગઃ તૈલમેવાન્વગાહત ॥ 10 ॥
સ્વપ્નેઽપિ સાગરં શુષ્કં ચંદ્રં ચ પતિતં ભવિ ।
ઉપરુદ્ધાં ચ જગતીં તમસેવ સમાવૃતામ્ ॥ 11 ॥
ઔપવાહ્યસ્ય નાગસ્ય વિષાણં શકલીકૃતમ્ ।
સહસાચાપિ સંશાંતં જ્વલિતં જાતવેદસમ્ ॥ 12 ॥
અવતીર્ણાં ચ પૃથિવીં શુષ્કાં શ્ચ વિવિધાન્ દ્રુમાન્ ।
અહં પશ્યામિ વિધ્વસ્તાન્ સધૂમાંશ્ચાપિ પર્વતાન્ ॥ 13 ॥
પીઠે કાર્ષ્ણાયસે ચૈનં નિષણ્ણં કૃષ્ણવાસસમ્ ।
પ્રહસંતિ સ્મ રાજાનં પ્રમદાઃ કૃષ્ણપિંગલાઃ ॥ 14 ॥
ત્વરમાણશ્ચ ધર્માત્મા રક્તમાલ્યાનુલેપનઃ ।
રથેન ખરયુક્તેન પ્રયાતો દક્ષિણામુખઃ ॥ 15 ॥
પ્રહસંતીવ રાજાનં પ્રમદા રક્તવાસિની ।
પ્રકર્ષંતી મયા દૃષ્ટા રાક્ષસી વિકૃતાનના ॥ 16 ॥
એવમેતન્મયા દૃષ્ટમિમાં રાત્રિં ભયાવહમ્ ।
અહં રામોઽથવા રાજા લક્ષ્મણો વા મરિષ્યતિ ॥ 17 ॥
નરો યાનેન ય સ્સ્વપ્ને સ્વરયુક્તેન યાતિ હિ ।
અચિરાત્તસ્ય ધૂમાગ્રં ચિતાયાં સંપ્રદૃશ્યતે ॥ 18 ॥
એતન્નિમિત્તં દીનોઽહં તન્નવઃ પ્રતિપૂજયે ।
શુષ્યતીવ ચ મે કંઠઃ ન સ્વસ્થમિવ મે મનઃ ॥ 19 ॥
ન પશ્યામિ ભયસ્થાનં ભયં ચૈવોપધારયે ભ્રષ્ટશ્ચ સ્વરયોગો મે છાયા ચોપહતા મમ ।
જુગુપ્સન્નિવ ચાઽત્માનં ન પશ્યમિ ચ કારણમ્ ॥ 20 ॥
ઇમાં ચ દુસ્સ્વપ્નગતિં નિશામ્યતામનેકરૂપામવિતર્કિતાં પુરા ।
ભયં મહત્તદ્ધૃદયાન્નયાતિ મે વિચિંત્ય રાજાનમચિંતદર્શનમ્ ॥ 21 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે એકોનસપ્તતિતમસ્સર્ગઃ ॥
