ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଏକୋନସପ୍ତତିତମସ୍ସର୍ଗଃ ।
ୟାମେଵ ରାତ୍ରିଂ ତେ ଦୂତାଃ ପ୍ରଵିଶଂତି ସ୍ମ ତାଂ ପୁରୀମ୍ ।
ଭରତେନାପି ତାଂ ରାତ୍ରିଂ ସ୍ଵପ୍ନୋ ଦୃଷ୍ଟୋଽୟମପ୍ରିୟଃ ॥ 1 ॥
ଵ୍ୟୁଷ୍ଟାମେଵ ତୁ ତାଂ ରାତ୍ରିଂ ଦୃଷ୍ଟ୍ଵା ତଂ ସ୍ଵପ୍ନମପ୍ରିୟମ୍ ।
ପୁତ୍ରୋ ରାଜାଧିରାଜସ୍ୟ ସୁଭୃଶଂ ପର୍ୟତପ୍ୟତ ॥ 2 ॥
ତପ୍ୟମାନଂ ସମାଜ୍ଞାୟ ଵୟସ୍ୟାଃ ପ୍ରିୟଵାଦିନଃ ।
ଆୟାସଂ ହି ଵିନେଷ୍ୟଂତ ସ୍ସଭାୟାଂ ଚକ୍ରିରେ କଥାଃ ॥ 3 ॥
ଵାଦୟଂତି ତଥା ଶାଂତିଂ ଲାସ ୟଂତ୍ୟପି ଚାପରେ ।
ନାଟକାନ୍ୟପରେ ପ୍ରାହୁର୍ହାସ୍ୟାନି ଵିଵିଧାନି ଚ ॥ 4 ॥
ସ ତୈର୍ମହାତ୍ମା ଭରତସ୍ସଖିଭିଃ ପ୍ରିୟଵାଦିଭିଃ ।
ଗୋଷ୍ଠୀହାସ୍ୟାନି କୁର୍ଵଦ୍ଭିର୍ନ ପ୍ରାହୃଷ୍ୟତ ରାଘଵଃ ॥ 5 ॥
ତମବ୍ରଵୀତ୍ପ୍ରିୟସଖୋ ଭରତଂ ସଖିଭିର୍ଵୃତମ୍ ।
ସୁହୃଦ୍ଭିଃ ପର୍ୟୁପାସୀନଃ କିଂ ସଖେ ନାନୁମୋଦସେ ॥ 6 ॥
ଏଵଂ ବ୍ରୁଵାଣଂ ସୁହୃଦଂ ଭରତଃ ପ୍ରତ୍ୟୁଵାଚ ହ ।
ଶ୍ରୁଣୁ ତ୍ଵଂ ୟନ୍ନିମିତ୍ତଂ ମେ ଦୈନ୍ୟମେତଦୁପାଗତମ୍ ॥ 7 ॥
ସ୍ଵପ୍ନେ ପିତରମଦ୍ରାକ୍ଷଂ ମଲିନଂ ମୁକ୍ତ ମୂର୍ଧଜମ୍ ।
ପତଂତମଦ୍ରିଶିଖରାତ୍କଲୁଷେ ଗୋମୟହ୍ରଦେ ॥ 8 ॥
ପ୍ଲଵମାନଶ୍ଚ ମେ ଦୃଷ୍ଟସ୍ସ ତସ୍ମିନ୍ଗୋମୟହ୍ରଦେ ।
ପିବନ୍ନଂଜଲିନା ତୈଲଂ ହସନ୍ନପି ମୁହୁର୍ମୁହୁଃ ॥ 9 ॥
ତତସ୍ତିଲୌଦନଂ ଭୁକ୍ତ୍ଵା ପୁନଃ ପୁନରଧଶ୍ଶିରାଃ ।
ତୈଲେନାଭ୍ୟକ୍ତସର୍ଵାଂଗଃ ତୈଲମେଵାନ୍ଵଗାହତ ॥ 10 ॥
ସ୍ଵପ୍ନେଽପି ସାଗରଂ ଶୁଷ୍କଂ ଚଂଦ୍ରଂ ଚ ପତିତଂ ଭଵି ।
ଉପରୁଦ୍ଧାଂ ଚ ଜଗତୀଂ ତମସେଵ ସମାଵୃତାମ୍ ॥ 11 ॥
ଔପଵାହ୍ୟସ୍ୟ ନାଗସ୍ୟ ଵିଷାଣଂ ଶକଲୀକୃତମ୍ ।
ସହସାଚାପି ସଂଶାଂତଂ ଜ୍ଵଲିତଂ ଜାତଵେଦସମ୍ ॥ 12 ॥
ଅଵତୀର୍ଣାଂ ଚ ପୃଥିଵୀଂ ଶୁଷ୍କାଂ ଶ୍ଚ ଵିଵିଧାନ୍ ଦ୍ରୁମାନ୍ ।
ଅହଂ ପଶ୍ୟାମି ଵିଧ୍ଵସ୍ତାନ୍ ସଧୂମାଂଶ୍ଚାପି ପର୍ଵତାନ୍ ॥ 13 ॥
ପୀଠେ କାର୍ଷ୍ଣାୟସେ ଚୈନଂ ନିଷଣ୍ଣଂ କୃଷ୍ଣଵାସସମ୍ ।
ପ୍ରହସଂତି ସ୍ମ ରାଜାନଂ ପ୍ରମଦାଃ କୃଷ୍ଣପିଂଗଲାଃ ॥ 14 ॥
ତ୍ଵରମାଣଶ୍ଚ ଧର୍ମାତ୍ମା ରକ୍ତମାଲ୍ୟାନୁଲେପନଃ ।
ରଥେନ ଖରୟୁକ୍ତେନ ପ୍ରୟାତୋ ଦକ୍ଷିଣାମୁଖଃ ॥ 15 ॥
ପ୍ରହସଂତୀଵ ରାଜାନଂ ପ୍ରମଦା ରକ୍ତଵାସିନୀ ।
ପ୍ରକର୍ଷଂତୀ ମୟା ଦୃଷ୍ଟା ରାକ୍ଷସୀ ଵିକୃତାନନା ॥ 16 ॥
ଏଵମେତନ୍ମୟା ଦୃଷ୍ଟମିମାଂ ରାତ୍ରିଂ ଭୟାଵହମ୍ ।
ଅହଂ ରାମୋଽଥଵା ରାଜା ଲକ୍ଷ୍ମଣୋ ଵା ମରିଷ୍ୟତି ॥ 17 ॥
ନରୋ ୟାନେନ ୟ ସ୍ସ୍ଵପ୍ନେ ସ୍ଵରୟୁକ୍ତେନ ୟାତି ହି ।
ଅଚିରାତ୍ତସ୍ୟ ଧୂମାଗ୍ରଂ ଚିତାୟାଂ ସଂପ୍ରଦୃଶ୍ୟତେ ॥ 18 ॥
ଏତନ୍ନିମିତ୍ତଂ ଦୀନୋଽହଂ ତନ୍ନଵଃ ପ୍ରତିପୂଜୟେ ।
ଶୁଷ୍ୟତୀଵ ଚ ମେ କଂଠଃ ନ ସ୍ଵସ୍ଥମିଵ ମେ ମନଃ ॥ 19 ॥
ନ ପଶ୍ୟାମି ଭୟସ୍ଥାନଂ ଭୟଂ ଚୈଵୋପଧାରୟେ ଭ୍ରଷ୍ଟଶ୍ଚ ସ୍ଵରୟୋଗୋ ମେ ଛାୟା ଚୋପହତା ମମ ।
ଜୁଗୁପ୍ସନ୍ନିଵ ଚାଽତ୍ମାନଂ ନ ପଶ୍ୟମି ଚ କାରଣମ୍ ॥ 20 ॥
ଇମାଂ ଚ ଦୁସ୍ସ୍ଵପ୍ନଗତିଂ ନିଶାମ୍ୟତାମନେକରୂପାମଵିତର୍କିତାଂ ପୁରା ।
ଭୟଂ ମହତ୍ତଦ୍ଧୃଦୟାନ୍ନୟାତି ମେ ଵିଚିଂତ୍ୟ ରାଜାନମଚିଂତଦର୍ଶନମ୍ ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଏକୋନସପ୍ତତିତମସ୍ସର୍ଗଃ ॥
