ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකෝනසප්තතිතමස්සර්ගඃ ।
යාමේව රාත්රිං තේ දූතාඃ ප්රවිශංති ස්ම තාං පුරීම් ।
භරතේනාපි තාං රාත්රිං ස්වප්නෝ දෘෂ්ටෝऽයමප්රියඃ ॥ 1 ॥
ව්යුෂ්ටාමේව තු තාං රාත්රිං දෘෂ්ට්වා තං ස්වප්නමප්රියම් ।
පුත්රෝ රාජාධිරාජස්ය සුභෘශං පර්යතප්යත ॥ 2 ॥
තප්යමානං සමාජ්ඤාය වයස්යාඃ ප්රියවාදිනඃ ।
ආයාසං හි විනේෂ්යංත ස්සභායාං චක්රිරේ කථාඃ ॥ 3 ॥
වාදයංති තථා ශාංතිං ලාස යංත්යපි චාපරේ ।
නාටකාන්යපරේ ප්රාහුර්හාස්යානි විවිධානි ච ॥ 4 ॥
ස තෛර්මහාත්මා භරතස්සඛිභිඃ ප්රියවාදිභිඃ ।
ගෝෂ්ඨීහාස්යානි කුර්වද්භිර්න ප්රාහෘෂ්යත රාඝවඃ ॥ 5 ॥
තමබ්රවීත්ප්රියසඛෝ භරතං සඛිභිර්වෘතම් ।
සුහෘද්භිඃ පර්යුපාසීනඃ කිං සඛේ නානුමෝදසේ ॥ 6 ॥
ඒවං බ්රුවාණං සුහෘදං භරතඃ ප්රත්යුවාච හ ।
ශ්රුණු ත්වං යන්නිමිත්තං මේ දෛන්යමේතදුපාගතම් ॥ 7 ॥
ස්වප්නේ පිතරමද්රාක්ෂං මලිනං මුක්ත මූර්ධජම් ।
පතංතමද්රිශිඛරාත්කලුෂේ ගෝමයහ්රදේ ॥ 8 ॥
ප්ලවමානශ්ච මේ දෘෂ්ටස්ස තස්මින්ගෝමයහ්රදේ ।
පිබන්නංජලිනා තෛලං හසන්නපි මුහුර්මුහුඃ ॥ 9 ॥
තතස්තිලෞදනං භුක්ත්වා පුනඃ පුනරධශ්ශිරාඃ ।
තෛලේනාභ්යක්තසර්වාංගඃ තෛලමේවාන්වගාහත ॥ 10 ॥
ස්වප්නේऽපි සාගරං ශුෂ්කං චංද්රං ච පතිතං භවි ।
උපරුද්ධාං ච ජගතීං තමසේව සමාවෘතාම් ॥ 11 ॥
ඖපවාහ්යස්ය නාගස්ය විෂාණං ශකලීකෘතම් ।
සහසාචාපි සංශාංතං ජ්වලිතං ජාතවේදසම් ॥ 12 ॥
අවතීර්ණාං ච පෘථිවීං ශුෂ්කාං ශ්ච විවිධාන් ද්රුමාන් ।
අහං පශ්යාමි විධ්වස්තාන් සධූමාංශ්චාපි පර්වතාන් ॥ 13 ॥
පීඨේ කාර්ෂ්ණායසේ චෛනං නිෂණ්ණං කෘෂ්ණවාසසම් ।
ප්රහසංති ස්ම රාජානං ප්රමදාඃ කෘෂ්ණපිංගලාඃ ॥ 14 ॥
ත්වරමාණශ්ච ධර්මාත්මා රක්තමාල්යානුලේපනඃ ।
රථේන ඛරයුක්තේන ප්රයාතෝ දක්ෂිණාමුඛඃ ॥ 15 ॥
ප්රහසංතීව රාජානං ප්රමදා රක්තවාසිනී ।
ප්රකර්ෂංතී මයා දෘෂ්ටා රාක්ෂසී විකෘතානනා ॥ 16 ॥
ඒවමේතන්මයා දෘෂ්ටමිමාං රාත්රිං භයාවහම් ।
අහං රාමෝऽථවා රාජා ලක්ෂ්මණෝ වා මරිෂ්යති ॥ 17 ॥
නරෝ යානේන ය ස්ස්වප්නේ ස්වරයුක්තේන යාති හි ।
අචිරාත්තස්ය ධූමාග්රං චිතායාං සංප්රදෘශ්යතේ ॥ 18 ॥
ඒතන්නිමිත්තං දීනෝऽහං තන්නවඃ ප්රතිපූජයේ ।
ශුෂ්යතීව ච මේ කංඨඃ න ස්වස්ථමිව මේ මනඃ ॥ 19 ॥
න පශ්යාමි භයස්ථානං භයං චෛවෝපධාරයේ භ්රෂ්ටශ්ච ස්වරයෝගෝ මේ ඡායා චෝපහතා මම ।
ජුගුප්සන්නිව චාऽත්මානං න පශ්යමි ච කාරණම් ॥ 20 ॥
ඉමාං ච දුස්ස්වප්නගතිං නිශාම්යතාමනේකරූපාමවිතර්කිතාං පුරා ।
භයං මහත්තද්ධෘදයාන්නයාති මේ විචිංත්ය රාජානමචිංතදර්ශනම් ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකෝනසප්තතිතමස්සර්ගඃ ॥
