ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകോനസപ്തതിതമസ്സര്ഗഃ ।
യാമേവ രാത്രിം തേ ദൂതാഃ പ്രവിശംതി സ്മ താം പുരീമ് ।
ഭരതേനാപി താം രാത്രിം സ്വപ്നോ ദൃഷ്ടോഽയമപ്രിയഃ ॥ 1 ॥
വ്യുഷ്ടാമേവ തു താം രാത്രിം ദൃഷ്ട്വാ തം സ്വപ്നമപ്രിയമ് ।
പുത്രോ രാജാധിരാജസ്യ സുഭൃശം പര്യതപ്യത ॥ 2 ॥
തപ്യമാനം സമാജ്ഞായ വയസ്യാഃ പ്രിയവാദിനഃ ।
ആയാസം ഹി വിനേഷ്യംത സ്സഭായാം ചക്രിരേ കഥാഃ ॥ 3 ॥
വാദയംതി തഥാ ശാംതിം ലാസ യംത്യപി ചാപരേ ।
നാടകാന്യപരേ പ്രാഹുര്ഹാസ്യാനി വിവിധാനി ച ॥ 4 ॥
സ തൈര്മഹാത്മാ ഭരതസ്സഖിഭിഃ പ്രിയവാദിഭിഃ ।
ഗോഷ്ഠീഹാസ്യാനി കുർവദ്ഭിര്ന പ്രാഹൃഷ്യത രാഘവഃ ॥ 5 ॥
തമബ്രവീത്പ്രിയസഖോ ഭരതം സഖിഭിർവൃതമ് ।
സുഹൃദ്ഭിഃ പര്യുപാസീനഃ കിം സഖേ നാനുമോദസേ ॥ 6 ॥
ഏവം ബ്രുവാണം സുഹൃദം ഭരതഃ പ്രത്യുവാച ഹ ।
ശ്രുണു ത്വം യന്നിമിത്തം മേ ദൈന്യമേതദുപാഗതമ് ॥ 7 ॥
സ്വപ്നേ പിതരമദ്രാക്ഷം മലിനം മുക്ത മൂര്ധജമ് ।
പതംതമദ്രിശിഖരാത്കലുഷേ ഗോമയഹ്രദേ ॥ 8 ॥
പ്ലവമാനശ്ച മേ ദൃഷ്ടസ്സ തസ്മിന്ഗോമയഹ്രദേ ।
പിബന്നംജലിനാ തൈലം ഹസന്നപി മുഹുര്മുഹുഃ ॥ 9 ॥
തതസ്തിലൌദനം ഭുക്ത്വാ പുനഃ പുനരധശ്ശിരാഃ ।
തൈലേനാഭ്യക്തസർവാംഗഃ തൈലമേവാന്വഗാഹത ॥ 10 ॥
സ്വപ്നേഽപി സാഗരം ശുഷ്കം ചംദ്രം ച പതിതം ഭവി ।
ഉപരുദ്ധാം ച ജഗതീം തമസേവ സമാവൃതാമ് ॥ 11 ॥
ഔപവാഹ്യസ്യ നാഗസ്യ വിഷാണം ശകലീകൃതമ് ।
സഹസാചാപി സംശാംതം ജ്വലിതം ജാതവേദസമ് ॥ 12 ॥
അവതീര്ണാം ച പൃഥിവീം ശുഷ്കാം ശ്ച വിവിധാന് ദ്രുമാന് ।
അഹം പശ്യാമി വിധ്വസ്താന് സധൂമാംശ്ചാപി പർവതാന് ॥ 13 ॥
പീഠേ കാര്ഷ്ണായസേ ചൈനം നിഷണ്ണം കൃഷ്ണവാസസമ് ।
പ്രഹസംതി സ്മ രാജാനം പ്രമദാഃ കൃഷ്ണപിംഗലാഃ ॥ 14 ॥
ത്വരമാണശ്ച ധര്മാത്മാ രക്തമാല്യാനുലേപനഃ ।
രഥേന ഖരയുക്തേന പ്രയാതോ ദക്ഷിണാമുഖഃ ॥ 15 ॥
പ്രഹസംതീവ രാജാനം പ്രമദാ രക്തവാസിനീ ।
പ്രകര്ഷംതീ മയാ ദൃഷ്ടാ രാക്ഷസീ വികൃതാനനാ ॥ 16 ॥
ഏവമേതന്മയാ ദൃഷ്ടമിമാം രാത്രിം ഭയാവഹമ് ।
അഹം രാമോഽഥവാ രാജാ ലക്ഷ്മണോ വാ മരിഷ്യതി ॥ 17 ॥
നരോ യാനേന യ സ്സ്വപ്നേ സ്വരയുക്തേന യാതി ഹി ।
അചിരാത്തസ്യ ധൂമാഗ്രം ചിതായാം സംപ്രദൃശ്യതേ ॥ 18 ॥
ഏതന്നിമിത്തം ദീനോഽഹം തന്നവഃ പ്രതിപൂജയേ ।
ശുഷ്യതീവ ച മേ കംഠഃ ന സ്വസ്ഥമിവ മേ മനഃ ॥ 19 ॥
ന പശ്യാമി ഭയസ്ഥാനം ഭയം ചൈവോപധാരയേ ഭ്രഷ്ടശ്ച സ്വരയോഗോ മേ ഛായാ ചോപഹതാ മമ ।
ജുഗുപ്സന്നിവ ചാഽത്മാനം ന പശ്യമി ച കാരണമ് ॥ 20 ॥
ഇമാം ച ദുസ്സ്വപ്നഗതിം നിശാമ്യതാമനേകരൂപാമവിതര്കിതാം പുരാ ।
ഭയം മഹത്തദ്ധൃദയാന്നയാതി മേ വിചിംത്യ രാജാനമചിംതദര്ശനമ് ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകോനസപ്തതിതമസ്സര്ഗഃ ॥
