śrīmadvālmīkīya rāmāyaṇē ayōdhyākāṇḍam ।
atha ēkōnasaptatitamassargaḥ ।
yāmēva rātriṃ tē dūtāḥ praviśanti sma tāṃ purīm ।
bharatēnāpi tāṃ rātriṃ svapnō dṛṣṭō'yamapriyaḥ ॥ 1 ॥
vyuṣṭāmēva tu tāṃ rātriṃ dṛṣṭvā taṃ svapnamapriyam ।
putrō rājādhirājasya subhṛśaṃ paryatapyata ॥ 2 ॥
tapyamānaṃ samājñāya vayasyāḥ priyavādinaḥ ।
āyāsaṃ hi vinēṣyanta ssabhāyāṃ chakrirē kathāḥ ॥ 3 ॥
vādayanti tathā śāntiṃ lāsa yantyapi chāparē ।
nāṭakānyaparē prāhurhāsyāni vividhāni cha ॥ 4 ॥
sa tairmahātmā bharatassakhibhiḥ priyavādibhiḥ ।
gōṣṭhīhāsyāni kurvadbhirna prāhṛṣyata rāghavaḥ ॥ 5 ॥
tamabravītpriyasakhō bharataṃ sakhibhirvṛtam ।
suhṛdbhiḥ paryupāsīnaḥ kiṃ sakhē nānumōdasē ॥ 6 ॥
ēvaṃ bruvāṇaṃ suhṛdaṃ bharataḥ pratyuvācha ha ।
śruṇu tvaṃ yannimittaṃ mē dainyamētadupāgatam ॥ 7 ॥
svapnē pitaramadrākṣaṃ malinaṃ mukta mūrdhajam ।
patantamadriśikharātkaluṣē gōmayahradē ॥ 8 ॥
plavamānaścha mē dṛṣṭassa tasmingōmayahradē ।
pibannañjalinā tailaṃ hasannapi muhurmuhuḥ ॥ 9 ॥
tatastilaudanaṃ bhuktvā punaḥ punaradhaśśirāḥ ।
tailēnābhyaktasarvāṅgaḥ tailamēvānvagāhata ॥ 10 ॥
svapnē'pi sāgaraṃ śuṣkaṃ chandraṃ cha patitaṃ bhavi ।
uparuddhāṃ cha jagatīṃ tamasēva samāvṛtām ॥ 11 ॥
aupavāhyasya nāgasya viṣāṇaṃ śakalīkṛtam ।
sahasāchāpi saṃśāntaṃ jvalitaṃ jātavēdasam ॥ 12 ॥
avatīrṇāṃ cha pṛthivīṃ śuṣkāṃ ścha vividhān drumān ।
ahaṃ paśyāmi vidhvastān sadhūmāṃśchāpi parvatān ॥ 13 ॥
pīṭhē kārṣṇāyasē chainaṃ niṣaṇṇaṃ kṛṣṇavāsasam ।
prahasanti sma rājānaṃ pramadāḥ kṛṣṇapiṅgalāḥ ॥ 14 ॥
tvaramāṇaścha dharmātmā raktamālyānulēpanaḥ ।
rathēna kharayuktēna prayātō dakṣiṇāmukhaḥ ॥ 15 ॥
prahasantīva rājānaṃ pramadā raktavāsinī ।
prakarṣantī mayā dṛṣṭā rākṣasī vikṛtānanā ॥ 16 ॥
ēvamētanmayā dṛṣṭamimāṃ rātriṃ bhayāvaham ।
ahaṃ rāmō'thavā rājā lakṣmaṇō vā mariṣyati ॥ 17 ॥
narō yānēna ya ssvapnē svarayuktēna yāti hi ।
achirāttasya dhūmāgraṃ chitāyāṃ sampradṛśyatē ॥ 18 ॥
ētannimittaṃ dīnō'haṃ tannavaḥ pratipūjayē ।
śuṣyatīva cha mē kaṇṭhaḥ na svasthamiva mē manaḥ ॥ 19 ॥
na paśyāmi bhayasthānaṃ bhayaṃ chaivōpadhārayē bhraṣṭaścha svarayōgō mē Chāyā chōpahatā mama ।
jugupsanniva chā'tmānaṃ na paśyami cha kāraṇam ॥ 20 ॥
imāṃ cha dussvapnagatiṃ niśāmyatāmanēkarūpāmavitarkitāṃ purā ।
bhayaṃ mahattaddhṛdayānnayāti mē vichintya rājānamachintadarśanam ॥ 21 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkōnasaptatitamassargaḥ ॥
