ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଏକଵିଂଶସ୍ସର୍ଗଃ ।
ସ ପୁନଃ ପତିତାଂ ଦୃଷ୍ଟ୍ଵା କ୍ରୋଧାଚ୍ଛୂର୍ପଣଖାଂ ଖରଃ ।
ଉଵାଚ ଵ୍ୟକ୍ତୟା ଵାଚା ତାମନର୍ଥାର୍ଥମାଗତାମ୍ ॥ 1 ॥
ମୟା ତ୍ଵିଦାନୀଂ ଶୂରାସ୍ତେ ରାକ୍ଷସା ରୁଧିରାଶନାଃ ।
ତ୍ଵତ୍ପ୍ରିୟାର୍ଥଂ ଵିନିର୍ଦିଷ୍ଟାଃ କିମର୍ଥଂ ରୁଦ୍ୟତେ ପୁନଃ ॥ 2 ॥
ଭକ୍ତାଶ୍ଚୈଵାନୁରକ୍ତାଶ୍ଚ ହିତାଶ୍ଚ ମମ ନିତ୍ୟଶଃ ।
ହନ୍ୟମାନା ନ ହନ୍ୟଂତେ ନ ନ କୁର୍ୟୁର୍ଵଚୋ ମମ ॥ 3 ॥
କିମେତଚ୍ଛ୍ରୋତୁମିଚ୍ଛାମି କାରଣଂ ୟତ୍କୃତେ ପୁନଃ ।
ହା ନାଥେତି ଵିନର୍ଦଂତୀ ସର୍ପଵଲ୍ଲୁଠସି କ୍ଷିତୌ ॥ 4 ॥
ଅନାଥଵଦ୍ଵିଲପସି ନାଥେ ତୁ ମୟି ସଂସ୍ଥିତେ ।
ଉତ୍ତିଷ୍ଠୋତ୍ତିଷ୍ଠ ମାଭୈଷୀର୍ଵୈକ୍ଲଵ୍ୟଂ ତ୍ୟଜ୍ୟତାମିହ ॥ 5 ॥
ଇତ୍ୟେଵମୁକ୍ତା ଦୁର୍ଧର୍ଷା ଖରେଣ ପରିସାଂତ୍ଵିତା ।
ଵିମୃଜ୍ୟ ନୟନେ ସାସ୍ରେ ଖରଂ ଭ୍ରାତରମବ୍ରଵୀତ୍ ॥ 6 ॥
ଅସ୍ମୀଦାନୀମହଂ ପ୍ରାପ୍ତା ହୃତଶ୍ରଵଣନାସିକା ।
ଶୋଣିତୌଘପରିକ୍ଲିନ୍ନା ତ୍ଵୟା ଚ ପରିସାଂତ୍ଵିତା ॥ 7 ॥
ପ୍ରେଷିତାଶ୍ଚ ତ୍ଵୟା ଵୀର ରାକ୍ଷସାସ୍ତେ ଚତୁର୍ଦଶ ।
ନିହଂତୁଂ ରାଘଵଂ କ୍ରୋଧାନ୍ମତ୍ପ୍ରିୟାର୍ଥଂ ସଲକ୍ଷଣମ୍ ॥ 8 ॥
ତେ ତୁ ରାମେଣ ସାମର୍ଷାଃ ଶୂଲପଟ୍ଟସପାଣୟଃ ।
ସମରେ ନିହତାସ୍ସର୍ଵେ ସାୟକୈର୍ମର୍ମଭେଦିଭିଃ ॥ 9 ॥
ତାଂଦୃଷ୍ଟ୍ଵା ପତିତାନ୍ଭୂମୌ କ୍ଷଣେନୈଵ ମହାବଲାନ୍ ।
ରାମସ୍ୟ ଚ ମହତ୍କର୍ମ ମହାଂସ୍ତ୍ରାସୋଽଭଵନ୍ମମ ॥ 10 ॥
ଅହମସ୍ମି ସମୁଦ୍ଵିଗ୍ନା ଵିଷଣ୍ଣା ଚ ନିଶାଚର ।
ଶରଣଂ ତ୍ଵାଂ ପୁନଃ ପ୍ରାପ୍ତା ସର୍ଵତୋଭୟଦର୍ଶିନୀ ॥ 11 ॥
ଵିଷାଦନକ୍ରାଧ୍ୟୁଷିତେ ପରିତ୍ରାସୋର୍ମିମାଲିନି ।
କିଂ ମାଂ ନ ତ୍ରାୟସେ ମଗ୍ନାଂ ଵିପୁଲେ ଶୋକସାଗରେ ॥ 12 ॥
ଏତେ ଚ ନିହତା ଭୂମୌ ରାମେଣ ନିଶିତୈଃ ଶରୈଃ ।
ୟେଽପି ମେ ପଦଵୀଂ ପ୍ରାପ୍ତା ରାକ୍ଷସାଃ ପିଶିତାଶନାଃ ॥ 13 ॥
ମୟି ତେ ୟଦ୍ୟନୁକ୍ରୋଶୋ ୟଦି ରକ୍ଷସ୍ସୁ ତେଷୁ ଚ ।
ରାମେଣ ୟଦି ତେ ଶକ୍ତିସ୍ତେଜୋ ଵାସ୍ତି ନିଶାଚର ॥ 14 ॥
ଦଂଡକାରଣ୍ୟନିଲୟଂ ଜହି ରାକ୍ଷସକଂଟକମ୍ ।
ୟଦି ରାମଂ ମମାମିତ୍ରଂ ନ ତ୍ଵମଦ୍ୟଵଧିଷ୍ୟସି ॥ 15 ॥
ତଵୈଵ ଚାଗ୍ରତଃ ପ୍ରାଣାଂସ୍ତ୍ୟକ୍ଷାମି ନିରପତ୍ରପ ।
ବୁଦ୍ଧ୍ୟାହମନୁପଶ୍ୟାମି ନ ତ୍ଵଂ ରାମସ୍ୟ ସଂୟୁଗେ ॥ 16 ॥
ସ୍ଥାତୁଂ ପ୍ରତିମୁଖେ ଶକ୍ତସ୍ସବଲଶ୍ଚ ମହାତ୍ମନଃ ।
ଶୂରମାନୀ ନ ଶୂରସ୍ତ୍ଵଂ ମିଥ୍ୟାରୋପିତଵିକ୍ରମଃ ॥ 17 ॥
ମାନୁଷୌ ୟୋ ନ ଶକ୍ନୋଷି ହଂତୁଂ ତୌ ରାମଲକ୍ଷ୍ମଣୌ ।
ରାମେଣ ୟଦି ତେ ଶକ୍ତିସ୍ତେଜୋ ଵାସ୍ତି ନିଶାଚର ॥ 18 ॥
ଦଂଡକାରଣ୍ୟନିଲୟଂ ଜହି ତଂ କୁଲପାଂସନ ।
ନିସ୍ସତ୍ଵସ୍ୟାଲ୍ପ ଵୀର୍ୟସ୍ୟ ଵାସସ୍ତେ କୀଦୃଶସ୍ତ୍ଵିହ ॥ 19 ॥
ଅପୟାହି ଜନସ୍ଥାନାତତ୍ଵରିତସ୍ସହବାଂଧଵଃ ।
ରାମତେଜୋଭିଭୂତୋ ହି ତ୍ଵଂ କ୍ଷିପ୍ରଂ ଵିନଶିଷ୍ୟସି ॥ 20 ॥
ସ ହି ତେଜସ୍ସମାୟୁକ୍ତୋ ରାମୋ ଦଶରଥାତ୍ମଜଃ ।
ଭ୍ରାତା ଚାସ୍ୟ ମହାଵୀର୍ୟୋ ୟେନ ଚାସ୍ମି ଵିରୂପିତା ॥ 21 ॥
ଏଵଂ ଵିଲପ୍ୟ ବହୁଶୋ ରାକ୍ଷସୀ ଵିତତୋଦରୀ ।
କରାଭ୍ୟାମୁଦରଂ ହତ୍ଵା ରୁରୋଦ ଭୃଶଦୁଃଖିତା ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଏକଵିଂଶସ୍ସର୍ଗଃ ॥
