ශ්රීමද්වාල්මීකීය රාමායණේ අරණ්යකාංඩම් ।
අථ ඒකවිංශස්සර්ගඃ ।
ස පුනඃ පතිතාං දෘෂ්ට්වා ක්රෝධාච්ඡූර්පණඛාං ඛරඃ ।
උවාච ව්යක්තයා වාචා තාමනර්ථාර්ථමාගතාම් ॥ 1 ॥
මයා ත්විදානීං ශූරාස්තේ රාක්ෂසා රුධිරාශනාඃ ।
ත්වත්ප්රියාර්ථං විනිර්දිෂ්ටාඃ කිමර්ථං රුද්යතේ පුනඃ ॥ 2 ॥
භක්තාශ්චෛවානුරක්තාශ්ච හිතාශ්ච මම නිත්යශඃ ।
හන්යමානා න හන්යංතේ න න කුර්යුර්වචෝ මම ॥ 3 ॥
කිමේතච්ඡ්රෝතුමිච්ඡාමි කාරණං යත්කෘතේ පුනඃ ।
හා නාථේති විනර්දංතී සර්පවල්ලුඨසි ක්ෂිතෞ ॥ 4 ॥
අනාථවද්විලපසි නාථේ තු මයි සංස්ථිතේ ।
උත්තිෂ්ඨෝත්තිෂ්ඨ මාභෛෂීර්වෛක්ලව්යං ත්යජ්යතාමිහ ॥ 5 ॥
ඉත්යේවමුක්තා දුර්ධර්ෂා ඛරේණ පරිසාංත්විතා ।
විමෘජ්ය නයනේ සාස්රේ ඛරං භ්රාතරමබ්රවීත් ॥ 6 ॥
අස්මීදානීමහං ප්රාප්තා හෘතශ්රවණනාසිකා ।
ශෝණිතෞඝපරික්ලින්නා ත්වයා ච පරිසාංත්විතා ॥ 7 ॥
ප්රේෂිතාශ්ච ත්වයා වීර රාක්ෂසාස්තේ චතුර්දශ ।
නිහංතුං රාඝවං ක්රෝධාන්මත්ප්රියාර්ථං සලක්ෂණම් ॥ 8 ॥
තේ තු රාමේණ සාමර්ෂාඃ ශූලපට්ටසපාණයඃ ।
සමරේ නිහතාස්සර්වේ සායකෛර්මර්මභේදිභිඃ ॥ 9 ॥
තාංදෘෂ්ට්වා පතිතාන්භූමෞ ක්ෂණේනෛව මහාබලාන් ।
රාමස්ය ච මහත්කර්ම මහාංස්ත්රාසෝऽභවන්මම ॥ 10 ॥
අහමස්මි සමුද්විග්නා විෂණ්ණා ච නිශාචර ।
ශරණං ත්වාං පුනඃ ප්රාප්තා සර්වතෝභයදර්ශිනී ॥ 11 ॥
විෂාදනක්රාධ්යුෂිතේ පරිත්රාසෝර්මිමාලිනි ।
කිං මාං න ත්රායසේ මග්නාං විපුලේ ශෝකසාගරේ ॥ 12 ॥
ඒතේ ච නිහතා භූමෞ රාමේණ නිශිතෛඃ ශරෛඃ ।
යේऽපි මේ පදවීං ප්රාප්තා රාක්ෂසාඃ පිශිතාශනාඃ ॥ 13 ॥
මයි තේ යද්යනුක්රෝශෝ යදි රක්ෂස්සු තේෂු ච ।
රාමේණ යදි තේ ශක්තිස්තේජෝ වාස්ති නිශාචර ॥ 14 ॥
දංඩකාරණ්යනිලයං ජහි රාක්ෂසකංටකම් ।
යදි රාමං මමාමිත්රං න ත්වමද්යවධිෂ්යසි ॥ 15 ॥
තවෛව චාග්රතඃ ප්රාණාංස්ත්යක්ෂාමි නිරපත්රප ।
බුද්ධ්යාහමනුපශ්යාමි න ත්වං රාමස්ය සංයුගේ ॥ 16 ॥
ස්ථාතුං ප්රතිමුඛේ ශක්තස්සබලශ්ච මහාත්මනඃ ।
ශූරමානී න ශූරස්ත්වං මිථ්යාරෝපිතවික්රමඃ ॥ 17 ॥
මානුෂෞ යෝ න ශක්නෝෂි හංතුං තෞ රාමලක්ෂ්මණෞ ।
රාමේණ යදි තේ ශක්තිස්තේජෝ වාස්ති නිශාචර ॥ 18 ॥
දංඩකාරණ්යනිලයං ජහි තං කුලපාංසන ।
නිස්සත්වස්යාල්ප වීර්යස්ය වාසස්තේ කීදෘශස්ත්විහ ॥ 19 ॥
අපයාහි ජනස්ථානාතත්වරිතස්සහබාංධවඃ ।
රාමතේජෝභිභූතෝ හි ත්වං ක්ෂිප්රං විනශිෂ්යසි ॥ 20 ॥
ස හි තේජස්සමායුක්තෝ රාමෝ දශරථාත්මජඃ ।
භ්රාතා චාස්ය මහාවීර්යෝ යේන චාස්මි විරූපිතා ॥ 21 ॥
ඒවං විලප්ය බහුශෝ රාක්ෂසී විතතෝදරී ।
කරාභ්යාමුදරං හත්වා රුරෝද භෘශදුඃඛිතා ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකවිංශස්සර්ගඃ ॥
