śrīmadvālmīkīya rāmāyaṇē araṇyakāṇḍam ।
atha ēkaviṃśassargaḥ ।
sa punaḥ patitāṃ dṛṣṭvā krōdhāchChūrpaṇakhāṃ kharaḥ ।
uvācha vyaktayā vāchā tāmanarthārthamāgatām ॥ 1 ॥
mayā tvidānīṃ śūrāstē rākṣasā rudhirāśanāḥ ।
tvatpriyārthaṃ vinirdiṣṭāḥ kimarthaṃ rudyatē punaḥ ॥ 2 ॥
bhaktāśchaivānuraktāścha hitāścha mama nityaśaḥ ।
hanyamānā na hanyantē na na kuryurvachō mama ॥ 3 ॥
kimētachChrōtumichChāmi kāraṇaṃ yatkṛtē punaḥ ।
hā nāthēti vinardantī sarpavalluṭhasi kṣitau ॥ 4 ॥
anāthavadvilapasi nāthē tu mayi saṃsthitē ।
uttiṣṭhōttiṣṭha mābhaiṣīrvaiklavyaṃ tyajyatāmiha ॥ 5 ॥
ityēvamuktā durdharṣā kharēṇa parisāntvitā ।
vimṛjya nayanē sāsrē kharaṃ bhrātaramabravīt ॥ 6 ॥
asmīdānīmahaṃ prāptā hṛtaśravaṇanāsikā ।
śōṇitaughapariklinnā tvayā cha parisāntvitā ॥ 7 ॥
prēṣitāścha tvayā vīra rākṣasāstē chaturdaśa ।
nihantuṃ rāghavaṃ krōdhānmatpriyārthaṃ salakṣaṇam ॥ 8 ॥
tē tu rāmēṇa sāmarṣāḥ śūlapaṭṭasapāṇayaḥ ।
samarē nihatāssarvē sāyakairmarmabhēdibhiḥ ॥ 9 ॥
tāndṛṣṭvā patitānbhūmau kṣaṇēnaiva mahābalān ।
rāmasya cha mahatkarma mahāṃstrāsō'bhavanmama ॥ 10 ॥
ahamasmi samudvignā viṣaṇṇā cha niśāchara ।
śaraṇaṃ tvāṃ punaḥ prāptā sarvatōbhayadarśinī ॥ 11 ॥
viṣādanakrādhyuṣitē paritrāsōrmimālini ।
kiṃ māṃ na trāyasē magnāṃ vipulē śōkasāgarē ॥ 12 ॥
ētē cha nihatā bhūmau rāmēṇa niśitaiḥ śaraiḥ ।
yē'pi mē padavīṃ prāptā rākṣasāḥ piśitāśanāḥ ॥ 13 ॥
mayi tē yadyanukrōśō yadi rakṣassu tēṣu cha ।
rāmēṇa yadi tē śaktistējō vāsti niśāchara ॥ 14 ॥
daṇḍakāraṇyanilayaṃ jahi rākṣasakaṇṭakam ।
yadi rāmaṃ mamāmitraṃ na tvamadyavadhiṣyasi ॥ 15 ॥
tavaiva chāgrataḥ prāṇāṃstyakṣāmi nirapatrapa ।
buddhyāhamanupaśyāmi na tvaṃ rāmasya saṃyugē ॥ 16 ॥
sthātuṃ pratimukhē śaktassabalaścha mahātmanaḥ ।
śūramānī na śūrastvaṃ mithyārōpitavikramaḥ ॥ 17 ॥
mānuṣau yō na śaknōṣi hantuṃ tau rāmalakṣmaṇau ।
rāmēṇa yadi tē śaktistējō vāsti niśāchara ॥ 18 ॥
daṇḍakāraṇyanilayaṃ jahi taṃ kulapāṃsana ।
nissatvasyālpa vīryasya vāsastē kīdṛśastviha ॥ 19 ॥
apayāhi janasthānātatvaritassahabāndhavaḥ ।
rāmatējōbhibhūtō hi tvaṃ kṣipraṃ vinaśiṣyasi ॥ 20 ॥
sa hi tējassamāyuktō rāmō daśarathātmajaḥ ।
bhrātā chāsya mahāvīryō yēna chāsmi virūpitā ॥ 21 ॥
ēvaṃ vilapya bahuśō rākṣasī vitatōdarī ।
karābhyāmudaraṃ hatvā rurōda bhṛśaduḥkhitā ॥ 22 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē ēkaviṃśassargaḥ ॥
