শ্রীমদ্বাল্মীকীয় রামাযণে অরণ্যকাংডম্ ।
অথ একবিংশস্সর্গঃ ।
স পুনঃ পতিতাং দৃষ্ট্বা ক্রোধাচ্ছূর্পণখাং খরঃ ।
উবাচ ব্যক্তয়া বাচা তামনর্থার্থমাগতাম্ ॥ 1 ॥
ময়া ত্বিদানীং শূরাস্তে রাক্ষসা রুধিরাশনাঃ ।
ত্বত্প্রিয়ার্থং বিনির্দিষ্টাঃ কিমর্থং রুদ্যতে পুনঃ ॥ 2 ॥
ভক্তাশ্চৈবানুরক্তাশ্চ হিতাশ্চ মম নিত্যশঃ ।
হন্যমানা ন হন্য়ংতে ন ন কুর্য়ুর্বচো মম ॥ 3 ॥
কিমেতচ্ছ্রোতুমিচ্ছামি কারণং যত্কৃতে পুনঃ ।
হা নাথেতি বিনর্দংতী সর্পবল্লুঠসি ক্ষিতৌ ॥ 4 ॥
অনাথবদ্বিলপসি নাথে তু ময়ি সংস্থিতে ।
উত্তিষ্ঠোত্তিষ্ঠ মাভৈষীর্বৈক্লব্য়ং ত্যজ্যতামিহ ॥ 5 ॥
ইত্য়েবমুক্তা দুর্ধর্ষা খরেণ পরিসাংত্বিতা ।
বিমৃজ্য় নযনে সাস্রে খরং ভ্রাতরমব্রবীত্ ॥ 6 ॥
অস্মীদানীমহং প্রাপ্তা হৃতশ্রবণনাসিকা ।
শোণিতৌঘপরিক্লিন্না ত্বয়া চ পরিসাংত্বিতা ॥ 7 ॥
প্রেষিতাশ্চ ত্বয়া বীর রাক্ষসাস্তে চতুর্দশ ।
নিহংতুং রাঘবং ক্রোধান্মত্প্রিয়ার্থং সলক্ষণম্ ॥ 8 ॥
তে তু রামেণ সামর্ষাঃ শূলপট্টসপাণয়ঃ ।
সমরে নিহতাস্সর্বে সাযকৈর্মর্মভেদিভিঃ ॥ 9 ॥
তাংদৃষ্ট্বা পতিতান্ভূমৌ ক্ষণেনৈব মহাবলান্ ।
রামস্য় চ মহত্কর্ম মহাংস্ত্রাসোঽভবন্মম ॥ 10 ॥
অহমস্মি সমুদ্বিগ্না বিষণ্ণা চ নিশাচর ।
শরণং ত্বাং পুনঃ প্রাপ্তা সর্বতোভযদর্শিনী ॥ 11 ॥
বিষাদনক্রাধ্য়ুষিতে পরিত্রাসোর্মিমালিনি ।
কিং মাং ন ত্রাযসে মগ্নাং বিপুলে শোকসাগরে ॥ 12 ॥
এতে চ নিহতা ভূমৌ রামেণ নিশিতৈঃ শরৈঃ ।
যেঽপি মে পদবীং প্রাপ্তা রাক্ষসাঃ পিশিতাশনাঃ ॥ 13 ॥
ময়ি তে যদ্যনুক্রোশো যদি রক্ষস্সু তেষু চ ।
রামেণ যদি তে শক্তিস্তেজো বাস্তি নিশাচর ॥ 14 ॥
দংডকারণ্যনিলয়ং জহি রাক্ষসকংটকম্ ।
যদি রামং মমামিত্রং ন ত্বমদ্যবধিষ্যসি ॥ 15 ॥
তবৈব চাগ্রতঃ প্রাণাংস্ত্যক্ষামি নিরপত্রপ ।
বুদ্ধ্য়াহমনুপশ্য়ামি ন ত্বং রামস্য় সংয়ুগে ॥ 16 ॥
স্থাতুং প্রতিমুখে শক্তস্সবলশ্চ মহাত্মনঃ ।
শূরমানী ন শূরস্ত্বং মিথ্য়ারোপিতবিক্রমঃ ॥ 17 ॥
মানুষৌ যো ন শক্নোষি হংতুং তৌ রামলক্ষ্মণৌ ।
রামেণ যদি তে শক্তিস্তেজো বাস্তি নিশাচর ॥ 18 ॥
দংডকারণ্যনিলয়ং জহি তং কুলপাংসন ।
নিস্সত্বস্য়াল্প বীর্যস্য় বাসস্তে কীদৃশস্ত্বিহ ॥ 19 ॥
অপয়াহি জনস্থানাতত্বরিতস্সহবাংধবঃ ।
রামতেজোভিভূতো হি ত্বং ক্ষিপ্রং বিনশিষ্যসি ॥ 20 ॥
স হি তেজস্সমায়ুক্তো রামো দশরথাত্মজঃ ।
ভ্রাতা চাস্য় মহাবীর্য়ো যেন চাস্মি বিরূপিতা ॥ 21 ॥
এবং বিলপ্য় বহুশো রাক্ষসী বিততোদরী ।
করাভ্য়ামুদরং হত্বা রুরোদ ভৃশদুঃখিতা ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে একবিংশস্সর্গঃ ॥
