શ્રીમદ્વાલ્મીકીય રામાયણે અરણ્યકાંડમ્ ।
અથ એકવિંશસ્સર્ગઃ ।
સ પુનઃ પતિતાં દૃષ્ટ્વા ક્રોધાચ્છૂર્પણખાં ખરઃ ।
ઉવાચ વ્યક્તયા વાચા તામનર્થાર્થમાગતામ્ ॥ 1 ॥
મયા ત્વિદાનીં શૂરાસ્તે રાક્ષસા રુધિરાશનાઃ ।
ત્વત્પ્રિયાર્થં વિનિર્દિષ્ટાઃ કિમર્થં રુદ્યતે પુનઃ ॥ 2 ॥
ભક્તાશ્ચૈવાનુરક્તાશ્ચ હિતાશ્ચ મમ નિત્યશઃ ।
હન્યમાના ન હન્યંતે ન ન કુર્યુર્વચો મમ ॥ 3 ॥
કિમેતચ્છ્રોતુમિચ્છામિ કારણં યત્કૃતે પુનઃ ।
હા નાથેતિ વિનર્દંતી સર્પવલ્લુઠસિ ક્ષિતૌ ॥ 4 ॥
અનાથવદ્વિલપસિ નાથે તુ મયિ સંસ્થિતે ।
ઉત્તિષ્ઠોત્તિષ્ઠ માભૈષીર્વૈક્લવ્યં ત્યજ્યતામિહ ॥ 5 ॥
ઇત્યેવમુક્તા દુર્ધર્ષા ખરેણ પરિસાંત્વિતા ।
વિમૃજ્ય નયને સાસ્રે ખરં ભ્રાતરમબ્રવીત્ ॥ 6 ॥
અસ્મીદાનીમહં પ્રાપ્તા હૃતશ્રવણનાસિકા ।
શોણિતૌઘપરિક્લિન્ના ત્વયા ચ પરિસાંત્વિતા ॥ 7 ॥
પ્રેષિતાશ્ચ ત્વયા વીર રાક્ષસાસ્તે ચતુર્દશ ।
નિહંતું રાઘવં ક્રોધાન્મત્પ્રિયાર્થં સલક્ષણમ્ ॥ 8 ॥
તે તુ રામેણ સામર્ષાઃ શૂલપટ્ટસપાણયઃ ।
સમરે નિહતાસ્સર્વે સાયકૈર્મર્મભેદિભિઃ ॥ 9 ॥
તાંદૃષ્ટ્વા પતિતાન્ભૂમૌ ક્ષણેનૈવ મહાબલાન્ ।
રામસ્ય ચ મહત્કર્મ મહાંસ્ત્રાસોઽભવન્મમ ॥ 10 ॥
અહમસ્મિ સમુદ્વિગ્ના વિષણ્ણા ચ નિશાચર ।
શરણં ત્વાં પુનઃ પ્રાપ્તા સર્વતોભયદર્શિની ॥ 11 ॥
વિષાદનક્રાધ્યુષિતે પરિત્રાસોર્મિમાલિનિ ।
કિં માં ન ત્રાયસે મગ્નાં વિપુલે શોકસાગરે ॥ 12 ॥
એતે ચ નિહતા ભૂમૌ રામેણ નિશિતૈઃ શરૈઃ ।
યેઽપિ મે પદવીં પ્રાપ્તા રાક્ષસાઃ પિશિતાશનાઃ ॥ 13 ॥
મયિ તે યદ્યનુક્રોશો યદિ રક્ષસ્સુ તેષુ ચ ।
રામેણ યદિ તે શક્તિસ્તેજો વાસ્તિ નિશાચર ॥ 14 ॥
દંડકારણ્યનિલયં જહિ રાક્ષસકંટકમ્ ।
યદિ રામં મમામિત્રં ન ત્વમદ્યવધિષ્યસિ ॥ 15 ॥
તવૈવ ચાગ્રતઃ પ્રાણાંસ્ત્યક્ષામિ નિરપત્રપ ।
બુદ્ધ્યાહમનુપશ્યામિ ન ત્વં રામસ્ય સંયુગે ॥ 16 ॥
સ્થાતું પ્રતિમુખે શક્તસ્સબલશ્ચ મહાત્મનઃ ।
શૂરમાની ન શૂરસ્ત્વં મિથ્યારોપિતવિક્રમઃ ॥ 17 ॥
માનુષૌ યો ન શક્નોષિ હંતું તૌ રામલક્ષ્મણૌ ।
રામેણ યદિ તે શક્તિસ્તેજો વાસ્તિ નિશાચર ॥ 18 ॥
દંડકારણ્યનિલયં જહિ તં કુલપાંસન ।
નિસ્સત્વસ્યાલ્પ વીર્યસ્ય વાસસ્તે કીદૃશસ્ત્વિહ ॥ 19 ॥
અપયાહિ જનસ્થાનાતત્વરિતસ્સહબાંધવઃ ।
રામતેજોભિભૂતો હિ ત્વં ક્ષિપ્રં વિનશિષ્યસિ ॥ 20 ॥
સ હિ તેજસ્સમાયુક્તો રામો દશરથાત્મજઃ ।
ભ્રાતા ચાસ્ય મહાવીર્યો યેન ચાસ્મિ વિરૂપિતા ॥ 21 ॥
એવં વિલપ્ય બહુશો રાક્ષસી વિતતોદરી ।
કરાભ્યામુદરં હત્વા રુરોદ ભૃશદુઃખિતા ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે એકવિંશસ્સર્ગઃ ॥
