VR 3.21 Aranya Kanda - Sarga 21 - Grantha

Collection of Spiritual and Devotional Literature in Various Indian Languages

View this in:

3.21 𑌅𑌰𑌣𑍍𑌯𑌕𑌾𑌂𑌡 - 𑌏𑌕𑌵𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑌵𑌿𑌂𑌶𑌸𑍍𑌸𑌰𑍍𑌗𑌃 ।

𑌸 𑌪𑍁𑌨𑌃 𑌪𑌤𑌿𑌤𑌾𑌂 𑌦𑍃𑌷𑍍𑌟𑍍𑌵𑌾 𑌕𑍍𑌰𑍋𑌧𑌾𑌚𑍍𑌛𑍂𑌰𑍍𑌪𑌣𑌖𑌾𑌂 𑌖𑌰𑌃 ।
𑌉𑌵𑌾𑌚 𑌵𑍍𑌯𑌕𑍍𑌤𑌯𑌾 𑌵𑌾𑌚𑌾 𑌤𑌾𑌮𑌨𑌰𑍍𑌥𑌾𑌰𑍍𑌥𑌮𑌾𑌗𑌤𑌾𑌮𑍍 ॥ 1 ॥

𑌮𑌯𑌾 𑌤𑍍𑌵𑌿𑌦𑌾𑌨𑍀𑌂 𑌶𑍂𑌰𑌾𑌸𑍍𑌤𑍇 𑌰𑌾𑌕𑍍𑌷𑌸𑌾 𑌰𑍁𑌧𑌿𑌰𑌾𑌶𑌨𑌾𑌃 ।
𑌤𑍍𑌵𑌤𑍍𑌪𑍍𑌰𑌿𑌯𑌾𑌰𑍍𑌥𑌂 𑌵𑌿𑌨𑌿𑌰𑍍𑌦𑌿𑌷𑍍𑌟𑌾𑌃 𑌕𑌿𑌮𑌰𑍍𑌥𑌂 𑌰𑍁𑌦𑍍𑌯𑌤𑍇 𑌪𑍁𑌨𑌃 ॥ 2 ॥

𑌭𑌕𑍍𑌤𑌾𑌶𑍍𑌚𑍈𑌵𑌾𑌨𑍁𑌰𑌕𑍍𑌤𑌾𑌶𑍍𑌚 𑌹𑌿𑌤𑌾𑌶𑍍𑌚 𑌮𑌮 𑌨𑌿𑌤𑍍𑌯𑌶𑌃 ।
𑌹𑌨𑍍𑌯𑌮𑌾𑌨𑌾 𑌨 𑌹𑌨𑍍𑌯𑌂𑌤𑍇 𑌨 𑌨 𑌕𑍁𑌰𑍍𑌯𑍁𑌰𑍍𑌵𑌚𑍋 𑌮𑌮 ॥ 3 ॥

𑌕𑌿𑌮𑍇𑌤𑌚𑍍𑌛𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌕𑌾𑌰𑌣𑌂 𑌯𑌤𑍍𑌕𑍃𑌤𑍇 𑌪𑍁𑌨𑌃 ।
𑌹𑌾 𑌨𑌾𑌥𑍇𑌤𑌿 𑌵𑌿𑌨𑌰𑍍𑌦𑌂𑌤𑍀 𑌸𑌰𑍍𑌪𑌵𑌲𑍍𑌲𑍁𑌠𑌸𑌿 𑌕𑍍𑌷𑌿𑌤𑍌 ॥ 4 ॥

𑌅𑌨𑌾𑌥𑌵𑌦𑍍𑌵𑌿𑌲𑌪𑌸𑌿 𑌨𑌾𑌥𑍇 𑌤𑍁 𑌮𑌯𑌿 𑌸𑌂𑌸𑍍𑌥𑌿𑌤𑍇 ।
𑌉𑌤𑍍𑌤𑌿𑌷𑍍𑌠𑍋𑌤𑍍𑌤𑌿𑌷𑍍𑌠 𑌮𑌾𑌭𑍈𑌷𑍀𑌰𑍍𑌵𑍈𑌕𑍍𑌲𑌵𑍍𑌯𑌂 𑌤𑍍𑌯𑌜𑍍𑌯𑌤𑌾𑌮𑌿𑌹 ॥ 5 ॥

𑌇𑌤𑍍𑌯𑍇𑌵𑌮𑍁𑌕𑍍𑌤𑌾 𑌦𑍁𑌰𑍍𑌧𑌰𑍍𑌷𑌾 𑌖𑌰𑍇𑌣 𑌪𑌰𑌿𑌸𑌾𑌂𑌤𑍍𑌵𑌿𑌤𑌾 ।
𑌵𑌿𑌮𑍃𑌜𑍍𑌯 𑌨𑌯𑌨𑍇 𑌸𑌾𑌸𑍍𑌰𑍇 𑌖𑌰𑌂 𑌭𑍍𑌰𑌾𑌤𑌰𑌮𑌬𑍍𑌰𑌵𑍀𑌤𑍍 ॥ 6 ॥

𑌅𑌸𑍍𑌮𑍀𑌦𑌾𑌨𑍀𑌮𑌹𑌂 𑌪𑍍𑌰𑌾𑌪𑍍𑌤𑌾 𑌹𑍃𑌤𑌶𑍍𑌰𑌵𑌣𑌨𑌾𑌸𑌿𑌕𑌾 ।
𑌶𑍋𑌣𑌿𑌤𑍌𑌘𑌪𑌰𑌿𑌕𑍍𑌲𑌿𑌨𑍍𑌨𑌾 𑌤𑍍𑌵𑌯𑌾 𑌚 𑌪𑌰𑌿𑌸𑌾𑌂𑌤𑍍𑌵𑌿𑌤𑌾 ॥ 𑍭 ॥

𑌪𑍍𑌰𑍇𑌷𑌿𑌤𑌾𑌶𑍍𑌚 𑌤𑍍𑌵𑌯𑌾 𑌵𑍀𑌰 𑌰𑌾𑌕𑍍𑌷𑌸𑌾𑌸𑍍𑌤𑍇 𑌚𑌤𑍁𑌰𑍍𑌦𑌶 ।
𑌨𑌿𑌹𑌂𑌤𑍁𑌂 𑌰𑌾𑌘𑌵𑌂 𑌕𑍍𑌰𑍋𑌧𑌾𑌨𑍍𑌮𑌤𑍍𑌪𑍍𑌰𑌿𑌯𑌾𑌰𑍍𑌥𑌂 𑌸𑌲𑌕𑍍𑌷𑌣𑌮𑍍 ॥ 𑍮 ॥

𑌤𑍇 𑌤𑍁 𑌰𑌾𑌮𑍇𑌣 𑌸𑌾𑌮𑌰𑍍𑌷𑌾𑌃 𑌶𑍂𑌲𑌪𑌟𑍍𑌟𑌸𑌪𑌾𑌣𑌯𑌃 ।
𑌸𑌮𑌰𑍇 𑌨𑌿𑌹𑌤𑌾𑌸𑍍𑌸𑌰𑍍𑌵𑍇 𑌸𑌾𑌯𑌕𑍈𑌰𑍍𑌮𑌰𑍍𑌮𑌭𑍇𑌦𑌿𑌭𑌿𑌃 ॥ 𑍯 ॥

𑌤𑌾𑌂𑌦𑍃𑌷𑍍𑌟𑍍𑌵𑌾 𑌪𑌤𑌿𑌤𑌾𑌨𑍍𑌭𑍂𑌮𑍌 𑌕𑍍𑌷𑌣𑍇𑌨𑍈𑌵 𑌮𑌹𑌾𑌬𑌲𑌾𑌨𑍍 ।
𑌰𑌾𑌮𑌸𑍍𑌯 𑌚 𑌮𑌹𑌤𑍍𑌕𑌰𑍍𑌮 𑌮𑌹𑌾𑌂𑌸𑍍𑌤𑍍𑌰𑌾𑌸𑍋𑌽𑌭𑌵𑌨𑍍𑌮𑌮 ॥ 10 ॥

𑌅𑌹𑌮𑌸𑍍𑌮𑌿 𑌸𑌮𑍁𑌦𑍍𑌵𑌿𑌗𑍍𑌨𑌾 𑌵𑌿𑌷𑌣𑍍𑌣𑌾 𑌚 𑌨𑌿𑌶𑌾𑌚𑌰 ।
𑌶𑌰𑌣𑌂 𑌤𑍍𑌵𑌾𑌂 𑌪𑍁𑌨𑌃 𑌪𑍍𑌰𑌾𑌪𑍍𑌤𑌾 𑌸𑌰𑍍𑌵𑌤𑍋𑌭𑌯𑌦𑌰𑍍𑌶𑌿𑌨𑍀 ॥ 11 ॥

𑌵𑌿𑌷𑌾𑌦𑌨𑌕𑍍𑌰𑌾𑌧𑍍𑌯𑍁𑌷𑌿𑌤𑍇 𑌪𑌰𑌿𑌤𑍍𑌰𑌾𑌸𑍋𑌰𑍍𑌮𑌿𑌮𑌾𑌲𑌿𑌨𑌿 ।
𑌕𑌿𑌂 𑌮𑌾𑌂 𑌨 𑌤𑍍𑌰𑌾𑌯𑌸𑍇 𑌮𑌗𑍍𑌨𑌾𑌂 𑌵𑌿𑌪𑍁𑌲𑍇 𑌶𑍋𑌕𑌸𑌾𑌗𑌰𑍇 ॥ 12 ॥

𑌏𑌤𑍇 𑌚 𑌨𑌿𑌹𑌤𑌾 𑌭𑍂𑌮𑍌 𑌰𑌾𑌮𑍇𑌣 𑌨𑌿𑌶𑌿𑌤𑍈𑌃 𑌶𑌰𑍈𑌃 ।
𑌯𑍇𑌽𑌪𑌿 𑌮𑍇 𑌪𑌦𑌵𑍀𑌂 𑌪𑍍𑌰𑌾𑌪𑍍𑌤𑌾 𑌰𑌾𑌕𑍍𑌷𑌸𑌾𑌃 𑌪𑌿𑌶𑌿𑌤𑌾𑌶𑌨𑌾𑌃 ॥ 13 ॥

𑌮𑌯𑌿 𑌤𑍇 𑌯𑌦𑍍𑌯𑌨𑍁𑌕𑍍𑌰𑍋𑌶𑍋 𑌯𑌦𑌿 𑌰𑌕𑍍𑌷𑌸𑍍𑌸𑍁 𑌤𑍇𑌷𑍁 𑌚 ।
𑌰𑌾𑌮𑍇𑌣 𑌯𑌦𑌿 𑌤𑍇 𑌶𑌕𑍍𑌤𑌿𑌸𑍍𑌤𑍇𑌜𑍋 𑌵𑌾𑌸𑍍𑌤𑌿 𑌨𑌿𑌶𑌾𑌚𑌰 ॥ 14 ॥

𑌦𑌂𑌡𑌕𑌾𑌰𑌣𑍍𑌯𑌨𑌿𑌲𑌯𑌂 𑌜𑌹𑌿 𑌰𑌾𑌕𑍍𑌷𑌸𑌕𑌂𑌟𑌕𑌮𑍍 ।
𑌯𑌦𑌿 𑌰𑌾𑌮𑌂 𑌮𑌮𑌾𑌮𑌿𑌤𑍍𑌰𑌂 𑌨 𑌤𑍍𑌵𑌮𑌦𑍍𑌯𑌵𑌧𑌿𑌷𑍍𑌯𑌸𑌿 ॥ 15 ॥

𑌤𑌵𑍈𑌵 𑌚𑌾𑌗𑍍𑌰𑌤𑌃 𑌪𑍍𑌰𑌾𑌣𑌾𑌂𑌸𑍍𑌤𑍍𑌯𑌕𑍍𑌷𑌾𑌮𑌿 𑌨𑌿𑌰𑌪𑌤𑍍𑌰𑌪 ।
𑌬𑍁𑌦𑍍𑌧𑍍𑌯𑌾𑌹𑌮𑌨𑍁𑌪𑌶𑍍𑌯𑌾𑌮𑌿 𑌨 𑌤𑍍𑌵𑌂 𑌰𑌾𑌮𑌸𑍍𑌯 𑌸𑌂𑌯𑍁𑌗𑍇 ॥ 16 ॥

𑌸𑍍𑌥𑌾𑌤𑍁𑌂 𑌪𑍍𑌰𑌤𑌿𑌮𑍁𑌖𑍇 𑌶𑌕𑍍𑌤𑌸𑍍𑌸𑌬𑌲𑌶𑍍𑌚 𑌮𑌹𑌾𑌤𑍍𑌮𑌨𑌃 ।
𑌶𑍂𑌰𑌮𑌾𑌨𑍀 𑌨 𑌶𑍂𑌰𑌸𑍍𑌤𑍍𑌵𑌂 𑌮𑌿𑌥𑍍𑌯𑌾𑌰𑍋𑌪𑌿𑌤𑌵𑌿𑌕𑍍𑌰𑌮𑌃 ॥ 1𑍭 ॥

𑌮𑌾𑌨𑍁𑌷𑍌 𑌯𑍋 𑌨 𑌶𑌕𑍍𑌨𑍋𑌷𑌿 𑌹𑌂𑌤𑍁𑌂 𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌰𑌾𑌮𑍇𑌣 𑌯𑌦𑌿 𑌤𑍇 𑌶𑌕𑍍𑌤𑌿𑌸𑍍𑌤𑍇𑌜𑍋 𑌵𑌾𑌸𑍍𑌤𑌿 𑌨𑌿𑌶𑌾𑌚𑌰 ॥ 1𑍮 ॥

𑌦𑌂𑌡𑌕𑌾𑌰𑌣𑍍𑌯𑌨𑌿𑌲𑌯𑌂 𑌜𑌹𑌿 𑌤𑌂 𑌕𑍁𑌲𑌪𑌾𑌂𑌸𑌨 ।
𑌨𑌿𑌸𑍍𑌸𑌤𑍍𑌵𑌸𑍍𑌯𑌾𑌲𑍍𑌪 𑌵𑍀𑌰𑍍𑌯𑌸𑍍𑌯 𑌵𑌾𑌸𑌸𑍍𑌤𑍇 𑌕𑍀𑌦𑍃𑌶𑌸𑍍𑌤𑍍𑌵𑌿𑌹 ॥ 1𑍯 ॥

𑌅𑌪𑌯𑌾𑌹𑌿 𑌜𑌨𑌸𑍍𑌥𑌾𑌨𑌾𑌤𑌤𑍍𑌵𑌰𑌿𑌤𑌸𑍍𑌸𑌹𑌬𑌾𑌂𑌧𑌵𑌃 ।
𑌰𑌾𑌮𑌤𑍇𑌜𑍋𑌭𑌿𑌭𑍂𑌤𑍋 𑌹𑌿 𑌤𑍍𑌵𑌂 𑌕𑍍𑌷𑌿𑌪𑍍𑌰𑌂 𑌵𑌿𑌨𑌶𑌿𑌷𑍍𑌯𑌸𑌿 ॥ 20 ॥

𑌸 𑌹𑌿 𑌤𑍇𑌜𑌸𑍍𑌸𑌮𑌾𑌯𑍁𑌕𑍍𑌤𑍋 𑌰𑌾𑌮𑍋 𑌦𑌶𑌰𑌥𑌾𑌤𑍍𑌮𑌜𑌃 ।
𑌭𑍍𑌰𑌾𑌤𑌾 𑌚𑌾𑌸𑍍𑌯 𑌮𑌹𑌾𑌵𑍀𑌰𑍍𑌯𑍋 𑌯𑍇𑌨 𑌚𑌾𑌸𑍍𑌮𑌿 𑌵𑌿𑌰𑍂𑌪𑌿𑌤𑌾 ॥ 21 ॥

𑌏𑌵𑌂 𑌵𑌿𑌲𑌪𑍍𑌯 𑌬𑌹𑍁𑌶𑍋 𑌰𑌾𑌕𑍍𑌷𑌸𑍀 𑌵𑌿𑌤𑌤𑍋𑌦𑌰𑍀 ।
𑌕𑌰𑌾𑌭𑍍𑌯𑌾𑌮𑍁𑌦𑌰𑌂 𑌹𑌤𑍍𑌵𑌾 𑌰𑍁𑌰𑍋𑌦 𑌭𑍃𑌶𑌦𑍁𑌃𑌖𑌿𑌤𑌾 ॥ 22 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑌵𑌿𑌂𑌶𑌸𑍍𑌸𑌰𑍍𑌗𑌃 ॥

Browse Related Categories: