ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകവിംശസ്സര്ഗഃ ।
സ പുനഃ പതിതാം ദൃഷ്ട്വാ ക്രോധാച്ഛൂര്പണഖാം ഖരഃ ।
ഉവാച വ്യക്തയാ വാചാ താമനര്ഥാര്ഥമാഗതാമ് ॥ 1 ॥
മയാ ത്വിദാനീം ശൂരാസ്തേ രാക്ഷസാ രുധിരാശനാഃ ।
ത്വത്പ്രിയാര്ഥം വിനിര്ദിഷ്ടാഃ കിമര്ഥം രുദ്യതേ പുനഃ ॥ 2 ॥
ഭക്താശ്ചൈവാനുരക്താശ്ച ഹിതാശ്ച മമ നിത്യശഃ ।
ഹന്യമാനാ ന ഹന്യംതേ ന ന കുര്യുർവചോ മമ ॥ 3 ॥
കിമേതച്ഛ്രോതുമിച്ഛാമി കാരണം യത്കൃതേ പുനഃ ।
ഹാ നാഥേതി വിനര്ദംതീ സര്പവല്ലുഠസി ക്ഷിതൌ ॥ 4 ॥
അനാഥവദ്വിലപസി നാഥേ തു മയി സംസ്ഥിതേ ।
ഉത്തിഷ്ഠോത്തിഷ്ഠ മാഭൈഷീർവൈക്ലവ്യം ത്യജ്യതാമിഹ ॥ 5 ॥
ഇത്യേവമുക്താ ദുര്ധര്ഷാ ഖരേണ പരിസാംത്വിതാ ।
വിമൃജ്യ നയനേ സാസ്രേ ഖരം ഭ്രാതരമബ്രവീത് ॥ 6 ॥
അസ്മീദാനീമഹം പ്രാപ്താ ഹൃതശ്രവണനാസികാ ।
ശോണിതൌഘപരിക്ലിന്നാ ത്വയാ ച പരിസാംത്വിതാ ॥ 7 ॥
പ്രേഷിതാശ്ച ത്വയാ വീര രാക്ഷസാസ്തേ ചതുര്ദശ ।
നിഹംതും രാഘവം ക്രോധാന്മത്പ്രിയാര്ഥം സലക്ഷണമ് ॥ 8 ॥
തേ തു രാമേണ സാമര്ഷാഃ ശൂലപട്ടസപാണയഃ ।
സമരേ നിഹതാസ്സർവേ സായകൈര്മര്മഭേദിഭിഃ ॥ 9 ॥
താംദൃഷ്ട്വാ പതിതാന്ഭൂമൌ ക്ഷണേനൈവ മഹാബലാന് ।
രാമസ്യ ച മഹത്കര്മ മഹാംസ്ത്രാസോഽഭവന്മമ ॥ 10 ॥
അഹമസ്മി സമുദ്വിഗ്നാ വിഷണ്ണാ ച നിശാചര ।
ശരണം ത്വാം പുനഃ പ്രാപ്താ സർവതോഭയദര്ശിനീ ॥ 11 ॥
വിഷാദനക്രാധ്യുഷിതേ പരിത്രാസോര്മിമാലിനി ।
കിം മാം ന ത്രായസേ മഗ്നാം വിപുലേ ശോകസാഗരേ ॥ 12 ॥
ഏതേ ച നിഹതാ ഭൂമൌ രാമേണ നിശിതൈഃ ശരൈഃ ।
യേഽപി മേ പദവീം പ്രാപ്താ രാക്ഷസാഃ പിശിതാശനാഃ ॥ 13 ॥
മയി തേ യദ്യനുക്രോശോ യദി രക്ഷസ്സു തേഷു ച ।
രാമേണ യദി തേ ശക്തിസ്തേജോ വാസ്തി നിശാചര ॥ 14 ॥
ദംഡകാരണ്യനിലയം ജഹി രാക്ഷസകംടകമ് ।
യദി രാമം മമാമിത്രം ന ത്വമദ്യവധിഷ്യസി ॥ 15 ॥
തവൈവ ചാഗ്രതഃ പ്രാണാംസ്ത്യക്ഷാമി നിരപത്രപ ।
ബുദ്ധ്യാഹമനുപശ്യാമി ന ത്വം രാമസ്യ സംയുഗേ ॥ 16 ॥
സ്ഥാതും പ്രതിമുഖേ ശക്തസ്സബലശ്ച മഹാത്മനഃ ।
ശൂരമാനീ ന ശൂരസ്ത്വം മിഥ്യാരോപിതവിക്രമഃ ॥ 17 ॥
മാനുഷൌ യോ ന ശക്നോഷി ഹംതും തൌ രാമലക്ഷ്മണൌ ।
രാമേണ യദി തേ ശക്തിസ്തേജോ വാസ്തി നിശാചര ॥ 18 ॥
ദംഡകാരണ്യനിലയം ജഹി തം കുലപാംസന ।
നിസ്സത്വസ്യാല്പ വീര്യസ്യ വാസസ്തേ കീദൃശസ്ത്വിഹ ॥ 19 ॥
അപയാഹി ജനസ്ഥാനാതത്വരിതസ്സഹബാംധവഃ ।
രാമതേജോഭിഭൂതോ ഹി ത്വം ക്ഷിപ്രം വിനശിഷ്യസി ॥ 20 ॥
സ ഹി തേജസ്സമായുക്തോ രാമോ ദശരഥാത്മജഃ ।
ഭ്രാതാ ചാസ്യ മഹാവീര്യോ യേന ചാസ്മി വിരൂപിതാ ॥ 21 ॥
ഏവം വിലപ്യ ബഹുശോ രാക്ഷസീ വിതതോദരീ ।
കരാഭ്യാമുദരം ഹത്വാ രുരോദ ഭൃശദുഃഖിതാ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകവിംശസ്സര്ഗഃ ॥
