śrīmadvālmīkīya rāmāyaṇē araṇyakāṇḍam ।
atha saptaviṃśassargaḥ ।
kharaṃ tu rāmābhimukhaṃ prayāntaṃ vāhinīpatiḥ ।
rākṣasastriśirā nāma sannipatyēdamabravīt ॥ 1 ॥
māṃ niyōjaya vikrānta sannivartasva sāhasāt ।
paśya rāmaṃ mahābāhuṃ saṃyugē vinipātitam ॥ 2 ॥
pratijānāmi tē satyamāyudhaṃ chāhamālabhē ।
yathā rāmaṃ vadhiṣyāmi vadhārhaṃ sarvarakṣasām ॥ 3 ॥
ahaṃ vāsya raṇē mṛtyurēṣa vā samarē mama ।
vinivṛtya raṇōtsāhānmuhūrtaṃ prāśnikō bhava ॥ 4 ॥
prahṛṣṭō vā hatē rāmē janasthānaṃ prayāsyasi ।
mayi vā nihatē rāmaṃ saṃyugāyōpayāsyasi ॥ 5 ॥
kharastriśirasā tēna mṛtyulōbhātprasāditaḥ ।
gachCha yudhyētyanujñātō rāghavābhimukhō yayau ॥ 6 ॥
triśirāścha rathēnaiva vājiyuktēna bhāsvatā ।
abhyadravadraṇē rāmaṃ triśṛṅga iva parvataḥ ॥ 7 ॥
śaradhārāsamūhānsa mahāmēgha ivōtsṛjan ।
vyasṛjatsadṛśaṃ nādaṃ jalārdrasya tu dundubhēḥ ॥ 8 ॥
āgachChantaṃ triśirasaṃ rākṣasaṃ prēkṣya rāghavaḥ ।
dhanuṣā pratijagrāha vidhunvansāyakān śitān ॥ 9 ॥
sa samprahārastumulō rāmatriśirasōrmahān ।
babhūvātīva balinōssiṃhakuñjarayōriva ॥ 10 ॥
tatastriśirasā bāṇairlalāṭē tāḍitastribhiḥ ।
amarṣī kupitōrāmassaṃrabdhamidamabravīt ॥ 11 ॥
ahō vikramaśūrasya rākṣasasyēdṛśaṃ balam ।
puṣpairiva śarairyasya lalāṭē'sminparikṣataḥ ॥ 12 ॥
mamāpi pratigṛhṇīṣva śarāṃśchāpaguṇāchchyutān ।
ēvamuktvā tu saṃrabdhaśśarānāśīviṣōpamān ॥ 13 ॥
triśirōvakṣasi kruddhō nijaghāna chaturdaśa ।
chaturbhisturagānasya śaraiḥ sannataparvabhiḥ ॥ 14 ॥
nyapātayata tējasvī chaturastasya vājinaḥ ।
aṣṭabhissāyakaissūtaṃ rathōpasthānnyapātayat ॥ 15 ॥
rāmaśchichChēda bāṇēna dhvajaṃ chāsya samuchChritam ।
tatō hatarathāttasmādutpatantaṃ niśācharam ॥ 16 ॥
bibhēda rāmastaṃ bāṇairhṛdayē sō'bhavajjaḍaḥ ।
sāyakaiśchāpramēyātmā sāmarṣastasya rakṣasaḥ ॥ 17 ॥
śirāṃsyapātayadrāmō vēgavadbhistribhiśśitaiḥ ।
sa bhūmau rudhirōdgārī rāmabāṇābhipīḍitaḥ ॥ 18 ॥
nyapatatpatitaiḥ pūrvaṃ svaśirōbhirniśācharaḥ ।
hataśēṣāstatō bhagnā rākṣasāḥ kharasaṃśrayā ॥ 19 ॥
dravanti sma na tiṣṭhanti vyāghratrastā mṛgā iva ।
tānkharō dravatō dṛṣṭvā nivartya ruṣitassvayam ॥ 20 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē saptaviṃśassargaḥ ॥
