ශ්රීමද්වාල්මීකීය රාමායණේ අරණ්යකාංඩම් ।
අථ සප්තවිංශස්සර්ගඃ ।
ඛරං තු රාමාභිමුඛං ප්රයාංතං වාහිනීපතිඃ ।
රාක්ෂසස්ත්රිශිරා නාම සන්නිපත්යේදමබ්රවීත් ॥ 1 ॥
මාං නියෝජය වික්රාංත සන්නිවර්තස්ව සාහසාත් ।
පශ්ය රාමං මහාබාහුං සංයුගේ විනිපාතිතම් ॥ 2 ॥
ප්රතිජානාමි තේ සත්යමායුධං චාහමාලභේ ।
යථා රාමං වධිෂ්යාමි වධාර්හං සර්වරක්ෂසාම් ॥ 3 ॥
අහං වාස්ය රණේ මෘත්යුරේෂ වා සමරේ මම ।
විනිවෘත්ය රණෝත්සාහාන්මුහූර්තං ප්රාශ්නිකෝ භව ॥ 4 ॥
ප්රහෘෂ්ටෝ වා හතේ රාමේ ජනස්ථානං ප්රයාස්යසි ।
මයි වා නිහතේ රාමං සංයුගායෝපයාස්යසි ॥ 5 ॥
ඛරස්ත්රිශිරසා තේන මෘත්යුලෝභාත්ප්රසාදිතඃ ।
ගච්ඡ යුධ්යේත්යනුජ්ඤාතෝ රාඝවාභිමුඛෝ යයෞ ॥ 6 ॥
ත්රිශිරාශ්ච රථේනෛව වාජියුක්තේන භාස්වතා ।
අභ්යද්රවද්රණේ රාමං ත්රිශෘංග ඉව පර්වතඃ ॥ 7 ॥
ශරධාරාසමූහාන්ස මහාමේඝ ඉවෝත්සෘජන් ।
ව්යසෘජත්සදෘශං නාදං ජලාර්ද්රස්ය තු දුංදුභේඃ ॥ 8 ॥
ආගච්ඡංතං ත්රිශිරසං රාක්ෂසං ප්රේක්ෂ්ය රාඝවඃ ।
ධනුෂා ප්රතිජග්රාහ විධුන්වන්සායකාන් ශිතාන් ॥ 9 ॥
ස සංප්රහාරස්තුමුලෝ රාමත්රිශිරසෝර්මහාන් ।
බභූවාතීව බලිනෝස්සිංහකුංජරයෝරිව ॥ 10 ॥
තතස්ත්රිශිරසා බාණෛර්ලලාටේ තාඩිතස්ත්රිභිඃ ।
අමර්ෂී කුපිතෝරාමස්සංරබ්ධමිදමබ්රවීත් ॥ 11 ॥
අහෝ වික්රමශූරස්ය රාක්ෂසස්යේදෘශං බලම් ।
පුෂ්පෛරිව ශරෛර්යස්ය ලලාටේऽස්මින්පරික්ෂතඃ ॥ 12 ॥
මමාපි ප්රතිගෘහ්ණීෂ්ව ශරාංශ්චාපගුණාච්ච්යුතාන් ।
ඒවමුක්ත්වා තු සංරබ්ධශ්ශරානාශීවිෂෝපමාන් ॥ 13 ॥
ත්රිශිරෝවක්ෂසි ක්රුද්ධෝ නිජඝාන චතුර්දශ ।
චතුර්භිස්තුරගානස්ය ශරෛඃ සන්නතපර්වභිඃ ॥ 14 ॥
න්යපාතයත තේජස්වී චතුරස්තස්ය වාජිනඃ ।
අෂ්ටභිස්සායකෛස්සූතං රථෝපස්ථාන්න්යපාතයත් ॥ 15 ॥
රාමශ්චිච්ඡේද බාණේන ධ්වජං චාස්ය සමුච්ඡ්රිතම් ।
තතෝ හතරථාත්තස්මාදුත්පතංතං නිශාචරම් ॥ 16 ॥
බිභේද රාමස්තං බාණෛර්හෘදයේ සෝऽභවජ්ජඩඃ ।
සායකෛශ්චාප්රමේයාත්මා සාමර්ෂස්තස්ය රක්ෂසඃ ॥ 17 ॥
ශිරාංස්යපාතයද්රාමෝ වේගවද්භිස්ත්රිභිශ්ශිතෛඃ ।
ස භූමෞ රුධිරෝද්ගාරී රාමබාණාභිපීඩිතඃ ॥ 18 ॥
න්යපතත්පතිතෛඃ පූර්වං ස්වශිරෝභිර්නිශාචරඃ ।
හතශේෂාස්තතෝ භග්නා රාක්ෂසාඃ ඛරසංශ්රයා ॥ 19 ॥
ද්රවංති ස්ම න තිෂ්ඨංති ව්යාඝ්රත්රස්තා මෘගා ඉව ।
තාන්ඛරෝ ද්රවතෝ දෘෂ්ට්වා නිවර්ත්ය රුෂිතස්ස්වයම් ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තවිංශස්සර්ගඃ ॥
