শ্রীমদ্বাল্মীকীয় রামাযণে অরণ্যকাংডম্ ।
অথ সপ্তবিংশস্সর্গঃ ।
খরং তু রামাভিমুখং প্রয়াংতং বাহিনীপতিঃ ।
রাক্ষসস্ত্রিশিরা নাম সন্নিপত্য়েদমব্রবীত্ ॥ 1 ॥
মাং নিয়োজয় বিক্রাংত সন্নিবর্তস্ব সাহসাত্ ।
পশ্য় রামং মহাবাহুং সংয়ুগে বিনিপাতিতম্ ॥ 2 ॥
প্রতিজানামি তে সত্যমায়ুধং চাহমালভে ।
যথা রামং বধিষ্য়ামি বধার্হং সর্বরক্ষসাম্ ॥ 3 ॥
অহং বাস্য় রণে মৃত্য়ুরেষ বা সমরে মম ।
বিনিবৃত্য় রণোত্সাহান্মুহূর্তং প্রাশ্নিকো ভব ॥ 4 ॥
প্রহৃষ্টো বা হতে রামে জনস্থানং প্রয়াস্যসি ।
ময়ি বা নিহতে রামং সংয়ুগায়োপয়াস্যসি ॥ 5 ॥
খরস্ত্রিশিরসা তেন মৃত্য়ুলোভাত্প্রসাদিতঃ ।
গচ্ছ যুধ্য়েত্যনুজ্ঞাতো রাঘবাভিমুখো যয়ৌ ॥ 6 ॥
ত্রিশিরাশ্চ রথেনৈব বাজিয়ুক্তেন ভাস্বতা ।
অভ্যদ্রবদ্রণে রামং ত্রিশৃংগ ইব পর্বতঃ ॥ 7 ॥
শরধারাসমূহান্স মহামেঘ ইবোত্সৃজন্ ।
ব্যসৃজত্সদৃশং নাদং জলার্দ্রস্য় তু দুংদুভেঃ ॥ 8 ॥
আগচ্ছংতং ত্রিশিরসং রাক্ষসং প্রেক্ষ্য় রাঘবঃ ।
ধনুষা প্রতিজগ্রাহ বিধুন্বন্সাযকান্ শিতান্ ॥ 9 ॥
স সংপ্রহারস্তুমুলো রামত্রিশিরসোর্মহান্ ।
বভূবাতীব বলিনোস্সিংহকুংজরয়োরিব ॥ 10 ॥
ততস্ত্রিশিরসা বাণৈর্ললাটে তাডিতস্ত্রিভিঃ ।
অমর্ষী কুপিতোরামস্সংরব্ধমিদমব্রবীত্ ॥ 11 ॥
অহো বিক্রমশূরস্য় রাক্ষসস্য়েদৃশং বলম্ ।
পুষ্পৈরিব শরৈর্যস্য় ললাটেঽস্মিন্পরিক্ষতঃ ॥ 12 ॥
মমাপি প্রতিগৃহ্ণীষ্ব শরাংশ্চাপগুণাচ্চ্য়ুতান্ ।
এবমুক্ত্বা তু সংরব্ধশ্শরানাশীবিষোপমান্ ॥ 13 ॥
ত্রিশিরোবক্ষসি ক্রুদ্ধো নিজঘান চতুর্দশ ।
চতুর্ভিস্তুরগানস্য় শরৈঃ সন্নতপর্বভিঃ ॥ 14 ॥
ন্যপাতযত তেজস্বী চতুরস্তস্য় বাজিনঃ ।
অষ্টভিস্সাযকৈস্সূতং রথোপস্থান্ন্যপাতযত্ ॥ 15 ॥
রামশ্চিচ্ছেদ বাণেন ধ্বজং চাস্য় সমুচ্ছ্রিতম্ ।
ততো হতরথাত্তস্মাদুত্পতংতং নিশাচরম্ ॥ 16 ॥
বিভেদ রামস্তং বাণৈর্হৃদয়ে সোঽভবজ্জডঃ ।
সাযকৈশ্চাপ্রমেয়াত্মা সামর্ষস্তস্য় রক্ষসঃ ॥ 17 ॥
শিরাংস্যপাতযদ্রামো বেগবদ্ভিস্ত্রিভিশ্শিতৈঃ ।
স ভূমৌ রুধিরোদ্গারী রামবাণাভিপীডিতঃ ॥ 18 ॥
ন্যপতত্পতিতৈঃ পূর্বং স্বশিরোভির্নিশাচরঃ ।
হতশেষাস্ততো ভগ্না রাক্ষসাঃ খরসংশ্রয়া ॥ 19 ॥
দ্রবংতি স্ম ন তিষ্ঠংতি ব্য়াঘ্রত্রস্তা মৃগা ইব ।
তান্খরো দ্রবতো দৃষ্ট্বা নিবর্ত্য় রুষিতস্স্বযম্ ॥ 20 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে সপ্তবিংশস্সর্গঃ ॥
