ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തവിംശസ്സര്ഗഃ ।
ഖരം തു രാമാഭിമുഖം പ്രയാംതം വാഹിനീപതിഃ ।
രാക്ഷസസ്ത്രിശിരാ നാമ സന്നിപത്യേദമബ്രവീത് ॥ 1 ॥
മാം നിയോജയ വിക്രാംത സന്നിവര്തസ്വ സാഹസാത് ।
പശ്യ രാമം മഹാബാഹും സംയുഗേ വിനിപാതിതമ് ॥ 2 ॥
പ്രതിജാനാമി തേ സത്യമായുധം ചാഹമാലഭേ ।
യഥാ രാമം വധിഷ്യാമി വധാര്ഹം സർവരക്ഷസാമ് ॥ 3 ॥
അഹം വാസ്യ രണേ മൃത്യുരേഷ വാ സമരേ മമ ।
വിനിവൃത്യ രണോത്സാഹാന്മുഹൂര്തം പ്രാശ്നികോ ഭവ ॥ 4 ॥
പ്രഹൃഷ്ടോ വാ ഹതേ രാമേ ജനസ്ഥാനം പ്രയാസ്യസി ।
മയി വാ നിഹതേ രാമം സംയുഗായോപയാസ്യസി ॥ 5 ॥
ഖരസ്ത്രിശിരസാ തേന മൃത്യുലോഭാത്പ്രസാദിതഃ ।
ഗച്ഛ യുധ്യേത്യനുജ്ഞാതോ രാഘവാഭിമുഖോ യയൌ ॥ 6 ॥
ത്രിശിരാശ്ച രഥേനൈവ വാജിയുക്തേന ഭാസ്വതാ ।
അഭ്യദ്രവദ്രണേ രാമം ത്രിശൃംഗ ഇവ പർവതഃ ॥ 7 ॥
ശരധാരാസമൂഹാന്സ മഹാമേഘ ഇവോത്സൃജന് ।
വ്യസൃജത്സദൃശം നാദം ജലാര്ദ്രസ്യ തു ദുംദുഭേഃ ॥ 8 ॥
ആഗച്ഛംതം ത്രിശിരസം രാക്ഷസം പ്രേക്ഷ്യ രാഘവഃ ।
ധനുഷാ പ്രതിജഗ്രാഹ വിധുന്വന്സായകാന് ശിതാന് ॥ 9 ॥
സ സംപ്രഹാരസ്തുമുലോ രാമത്രിശിരസോര്മഹാന് ।
ബഭൂവാതീവ ബലിനോസ്സിംഹകുംജരയോരിവ ॥ 10 ॥
തതസ്ത്രിശിരസാ ബാണൈര്ലലാടേ താഡിതസ്ത്രിഭിഃ ।
അമര്ഷീ കുപിതോരാമസ്സംരബ്ധമിദമബ്രവീത് ॥ 11 ॥
അഹോ വിക്രമശൂരസ്യ രാക്ഷസസ്യേദൃശം ബലമ് ।
പുഷ്പൈരിവ ശരൈര്യസ്യ ലലാടേഽസ്മിന്പരിക്ഷതഃ ॥ 12 ॥
മമാപി പ്രതിഗൃഹ്ണീഷ്വ ശരാംശ്ചാപഗുണാച്ച്യുതാന് ।
ഏവമുക്ത്വാ തു സംരബ്ധശ്ശരാനാശീവിഷോപമാന് ॥ 13 ॥
ത്രിശിരോവക്ഷസി ക്രുദ്ധോ നിജഘാന ചതുര്ദശ ।
ചതുര്ഭിസ്തുരഗാനസ്യ ശരൈഃ സന്നതപർവഭിഃ ॥ 14 ॥
ന്യപാതയത തേജസ്വീ ചതുരസ്തസ്യ വാജിനഃ ।
അഷ്ടഭിസ്സായകൈസ്സൂതം രഥോപസ്ഥാന്ന്യപാതയത് ॥ 15 ॥
രാമശ്ചിച്ഛേദ ബാണേന ധ്വജം ചാസ്യ സമുച്ഛ്രിതമ് ।
തതോ ഹതരഥാത്തസ്മാദുത്പതംതം നിശാചരമ് ॥ 16 ॥
ബിഭേദ രാമസ്തം ബാണൈര്ഹൃദയേ സോഽഭവജ്ജഡഃ ।
സായകൈശ്ചാപ്രമേയാത്മാ സാമര്ഷസ്തസ്യ രക്ഷസഃ ॥ 17 ॥
ശിരാംസ്യപാതയദ്രാമോ വേഗവദ്ഭിസ്ത്രിഭിശ്ശിതൈഃ ।
സ ഭൂമൌ രുധിരോദ്ഗാരീ രാമബാണാഭിപീഡിതഃ ॥ 18 ॥
ന്യപതത്പതിതൈഃ പൂർവം സ്വശിരോഭിര്നിശാചരഃ ।
ഹതശേഷാസ്തതോ ഭഗ്നാ രാക്ഷസാഃ ഖരസംശ്രയാ ॥ 19 ॥
ദ്രവംതി സ്മ ന തിഷ്ഠംതി വ്യാഘ്രത്രസ്താ മൃഗാ ഇവ ।
താന്ഖരോ ദ്രവതോ ദൃഷ്ട്വാ നിവര്ത്യ രുഷിതസ്സ്വയമ് ॥ 20 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തവിംശസ്സര്ഗഃ ॥
