શ્રીમદ્વાલ્મીકીય રામાયણે અરણ્યકાંડમ્ ।
અથ સપ્તવિંશસ્સર્ગઃ ।
ખરં તુ રામાભિમુખં પ્રયાંતં વાહિનીપતિઃ ।
રાક્ષસસ્ત્રિશિરા નામ સન્નિપત્યેદમબ્રવીત્ ॥ 1 ॥
માં નિયોજય વિક્રાંત સન્નિવર્તસ્વ સાહસાત્ ।
પશ્ય રામં મહાબાહું સંયુગે વિનિપાતિતમ્ ॥ 2 ॥
પ્રતિજાનામિ તે સત્યમાયુધં ચાહમાલભે ।
યથા રામં વધિષ્યામિ વધાર્હં સર્વરક્ષસામ્ ॥ 3 ॥
અહં વાસ્ય રણે મૃત્યુરેષ વા સમરે મમ ।
વિનિવૃત્ય રણોત્સાહાન્મુહૂર્તં પ્રાશ્નિકો ભવ ॥ 4 ॥
પ્રહૃષ્ટો વા હતે રામે જનસ્થાનં પ્રયાસ્યસિ ।
મયિ વા નિહતે રામં સંયુગાયોપયાસ્યસિ ॥ 5 ॥
ખરસ્ત્રિશિરસા તેન મૃત્યુલોભાત્પ્રસાદિતઃ ।
ગચ્છ યુધ્યેત્યનુજ્ઞાતો રાઘવાભિમુખો યયૌ ॥ 6 ॥
ત્રિશિરાશ્ચ રથેનૈવ વાજિયુક્તેન ભાસ્વતા ।
અભ્યદ્રવદ્રણે રામં ત્રિશૃંગ ઇવ પર્વતઃ ॥ 7 ॥
શરધારાસમૂહાન્સ મહામેઘ ઇવોત્સૃજન્ ।
વ્યસૃજત્સદૃશં નાદં જલાર્દ્રસ્ય તુ દુંદુભેઃ ॥ 8 ॥
આગચ્છંતં ત્રિશિરસં રાક્ષસં પ્રેક્ષ્ય રાઘવઃ ।
ધનુષા પ્રતિજગ્રાહ વિધુન્વન્સાયકાન્ શિતાન્ ॥ 9 ॥
સ સંપ્રહારસ્તુમુલો રામત્રિશિરસોર્મહાન્ ।
બભૂવાતીવ બલિનોસ્સિંહકુંજરયોરિવ ॥ 10 ॥
તતસ્ત્રિશિરસા બાણૈર્લલાટે તાડિતસ્ત્રિભિઃ ।
અમર્ષી કુપિતોરામસ્સંરબ્ધમિદમબ્રવીત્ ॥ 11 ॥
અહો વિક્રમશૂરસ્ય રાક્ષસસ્યેદૃશં બલમ્ ।
પુષ્પૈરિવ શરૈર્યસ્ય લલાટેઽસ્મિન્પરિક્ષતઃ ॥ 12 ॥
મમાપિ પ્રતિગૃહ્ણીષ્વ શરાંશ્ચાપગુણાચ્ચ્યુતાન્ ।
એવમુક્ત્વા તુ સંરબ્ધશ્શરાનાશીવિષોપમાન્ ॥ 13 ॥
ત્રિશિરોવક્ષસિ ક્રુદ્ધો નિજઘાન ચતુર્દશ ।
ચતુર્ભિસ્તુરગાનસ્ય શરૈઃ સન્નતપર્વભિઃ ॥ 14 ॥
ન્યપાતયત તેજસ્વી ચતુરસ્તસ્ય વાજિનઃ ।
અષ્ટભિસ્સાયકૈસ્સૂતં રથોપસ્થાન્ન્યપાતયત્ ॥ 15 ॥
રામશ્ચિચ્છેદ બાણેન ધ્વજં ચાસ્ય સમુચ્છ્રિતમ્ ।
તતો હતરથાત્તસ્માદુત્પતંતં નિશાચરમ્ ॥ 16 ॥
બિભેદ રામસ્તં બાણૈર્હૃદયે સોઽભવજ્જડઃ ।
સાયકૈશ્ચાપ્રમેયાત્મા સામર્ષસ્તસ્ય રક્ષસઃ ॥ 17 ॥
શિરાંસ્યપાતયદ્રામો વેગવદ્ભિસ્ત્રિભિશ્શિતૈઃ ।
સ ભૂમૌ રુધિરોદ્ગારી રામબાણાભિપીડિતઃ ॥ 18 ॥
ન્યપતત્પતિતૈઃ પૂર્વં સ્વશિરોભિર્નિશાચરઃ ।
હતશેષાસ્તતો ભગ્ના રાક્ષસાઃ ખરસંશ્રયા ॥ 19 ॥
દ્રવંતિ સ્મ ન તિષ્ઠંતિ વ્યાઘ્રત્રસ્તા મૃગા ઇવ ।
તાન્ખરો દ્રવતો દૃષ્ટ્વા નિવર્ત્ય રુષિતસ્સ્વયમ્ ॥ 20 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે સપ્તવિંશસ્સર્ગઃ ॥
